بە پاڵپەشتی دەسەو کولتوری و هونەری کانتۆنوو عەفرینی و شەهبای، پەنجەمین فێستیڤاڵوو میتانی بە دورشمەو "گێڵایۆ نزیکا، ئێمە بە هومېڎێنمۍ" جە ١٠و ڕابڕانیەنە دەسش پنەکەرڎ. جە ڕۊو چوارەمیەنە شانۆگەریێوە بەنامۍ 'نا ڕەوا'ی جە بەرئاورڎەو بەرهەم ئەحمەڎی، جە تەرەفوو هەردووە شانۆکارا بەرهەم ئەحمەڎی و نویسەری و شانۆکار نالی عەسکەریوە، کە جە شاروو کەرکوکیوە ئامۍ بێنۍ، نمایشکریا.

شانۆکار و بەرئاوەر بەرهەم ئەحمەڎ، باسوو ئامانجوو شانۆکەی و وەرموو ئامایش پۍ ۋەرنیشتوو کوردسانی کەرد.

'وینای ۋەرنیشتوو کوردسانی پۍ من پېسە وەرمېوە بۍ'

بەرهەم ئەحمەڎ، باسوو ئانەیش کەرڎ کە چنی شانۆکار نالی عەسکەری شانۆی 'نا ڕەوا'شا بە شێوەزاروو زۋانی سۆرانی نمایشکەرڎ و واتش: " سەرەڕاو تەوقدای هەرێمەکەی، بە جۆش و خرۆشێوە فرۆ جە کەرکوکۆ ئامایمۍ پۍ هەرێموو شەهبای. جە تەرەفوو شانۆکارا و بەرئاوەرا هەرێموو شەهبای و عەفرینیوە خێرئامایۍ گەرمما ۋنە کریا. ئەوەڵجارما مەو ۋەرنیشتوو کوردسانی. وەرمۍ بۍ پۍ من کە ڕووۍ بەو پۍ ۋەرنیشتوو کوردسانی و بە شانۆیێوە خزمەتوو کولتور و هونەروو  گەلوو ۋەرنیشتی کەروو".

'ئامانج نیشاندای هجومی ئەرەگیرییا'

ئەحمەد باسش چانەیچ کەرد بە ئامانجوو 'گرڎ ژەن و پیێوە سەروو زەمینیۆ ئەکتەرێنۍ چی شانۆییەنە' دەسشا بە نیشانەدای شانۆیی ۋێشا کەرد و واتش: "وەختۍ ماچوو کارەکتەری شانۆی، مەبەسم جە گەلین. کارەکتەری شانۆیی دەوروو وینەری موینۆ و وینەریچ دەوروو کارەکتەری شانۆیی گێڵنۆ. من جە شانۆکەمەنە ڕەخنەو کارەکتەری شانۆیم کەردەن، حەرپاسە ژیۋای هەرچوار پارچەو کوردسانیم ڕەخنە کەردەن کە ئینا چێروو ئەرەگیرینە. هۊرچنیەی و نویستەی ئی شانۆییە کاریگەریێوە گۊرەش سەروو من وەشکەرڎ. چونکی گوزارشت جە حەقەتینەو کوردا کەرۆ. بە درێژایی وەڵینگەی وڵاتا هامسایما هجومشا کەردەن سەروو کوردی و کوردسانی، ئامانج چی شانۆگەرییە، نیشاندای جەنگوو ئەرەگیرییا جە کوردسانەنە کە دژوو مرۆڤایەتی و گەلوو کوردیا".