مزگین ئاکسو (بەسێ ڕاپەڕین)ە کە شاروو سێرتینە جە بنەیانېوە وڵاتپارێزینە جە ئەڎۍ بیېنە، بە کولتووری کۆچەری گۊرۍ بیېنە. مدرامانوو خەڵکوو هەرێمەکەیچ کاریگەریش سەروو کەسایەتی مزگین ئاکسوۍ بیەن. هەرێموو بۆتانی هەمیشە دەورېوە گرنگش جە تاریخوو کۊشیای ئازاڎینە بیەن. پی مەڵامەتیچۆ مزگین ئاکسوە جە نزیکۆ جمیەروو ئازاڎیی کوردسانی مشناسۆ. مزگین ئاکسوە کە شۊنەو ژیۋایۍ ماناڎاریرە گېڵۆ، ئامانجش تەنیا یەک چېوا و جە ساڵەو ٢٠١٢ینە بەشدارەو ڕیزەکا گەریلای بۆ.

مزگین ئاکسوە حەر جە زارۊڵەیۆ ئەویندارەو کەشی بیېنە، دماو ئانەی بیېنە بە گەریلاو یەژا ستاری، نامۍ بەسێ ڕاپەڕینێش هۊرچنیېنە. ئامانجوو ئەساسی بەسێ ڕاپەڕینۍ وەرموو لوای پۍ کەشی و بەدی ئامای ئازاڎیی گرڎوو گەلوو کوردسانی بیەن. سەروو ئا ئەساسیە پۍ بەقوەتکەرڎەی کۊشیای ۋېش جە گرڎ بوارێنە چالاکانە بەشداری ژیۋای کەرۆ. ئەندامەو یەژاستاری بەسێ ڕاپەڕینە وەختۍ ملۆ کەش فرە کاریگەرە بیېنە بە ژیۋای ژەنە گەریلاکا.

 بەسێ ڕاپەڕینە پۍ ئانەی بۊنە بە فیداییە و گەلەکەیش ، جە گرڎ بوارێنە ۋېش وەڵۍ وستەن، ئا گەریلا گەشمەرڎۍ بیېنۍ بە ڕەمزەو ئازاڎیی مشناسۊشا و خەتەو ۋېش دیاری کەرۆ. بەسێ ڕاپەڕینە پەی ئازاڎیی جەستەیی ڕابەروو گەلوو کوردی عەبدوڵا ئۆجالانی کۊشیا، یوۋەم چالاکیی گەریلای ۋېش هەرێموو مەتیناینە ئەنجامدان، جە سەختتەرین مەنتیقەکانە جەنگش کەرڎەن، بەشدارەو پەروەردەکا ئەکادیمیاو گەشمەرڎە ماهیریش کەرڎەن. دمایی دیسان گېڵۊوە پۍ مېڎانەکاو مدرامانی.

تا دما هەناسە کۊشیایش کەرڎ                              

گەریلا بەسێ ڕاپەڕینە کە مزانۆ جە هەر کەشېوە کوردسانینە داستانێوە منویسیۆ و ونەو هەزاران قارەمانا جە هەر بەشێوە کوردسانینە مجیۆ، پی ۋیرکەرڎەیۆ جەنگ دەس پنەکەرۆ. ساڵەو ٢٠١٤ ی ملۆ پۍ هەرێمەکاو گەشمەرڎا ڕەشید، سەردار، ڕۆژین گەودالاری جە زاگرۆس. بە درێژایی تاریخی زاگرۆس یاگېوەنە کە گەلوو کوردی چنەشەنە ئەرەنیشتە بیەن. ئی مەنتیقە بۊ بە سەرەتېوە تازە پۍ گەریلا بەسێ. کۊشیای جە کەشە سەختەکاو زاگرۆسینە پەنەوازش بە هێز و ئیرادەیا. بەڵام ئا کەسۍ کە سەرنجشا ئینا سەرو ئامانجەکەیشا، حیچ سەختی و بەربەسېوە مەشناسا. بەسێ یووەنە چا کەسا پابەندەنە بە ئامانجەکەیشۆ. دماو ئانەی دەوڵەتوو ئەرەگیروو تورکی ساڵەو ٢٠١٥ هجومش کەرڎ سەروو هەرێمەکاو گەریلای، هەڤاڵ بەسێ و هەڤاڵا هامڕایش مدرامانی بێهامتاشا جە ۋەران ۋەروو ئا هجومانە نیشانە دا.

هەڤاڵ بەسێ کە جە چالاکییەکاو هەرێموو چارچەلینە گورزەی قورسەش جە دوژمنی شانا، کۊشیایۍ گۊرەش پۍ پارېزنای دەسکۊتەکا گەلوو کوردی نیشانەدا. هەڤاڵ بەسێ فەرماندۍ گەنجەو یەژا ستاری حەجگیز هجوم و ئەرەگیریش کوردسانەنە قبوڵ نەکەرد و بەردەوام چالاکییەکاش دژوو ئەرەگیرا ڕېکوزۍ هەتا دوژمن بە ئیسراحەت سەروو خاکوو کوردسانیۆ نەژیوا، جە چالاکییەکاو ٦ ساڵەو زاگرۆسینە سەرکۊتەی گۊرەشا بەدەسئارد. بەسێ ڕاپەڕینە هەمیشە بە ئیراڎېوە فرۆ دژوو دوژمنی جەنگ و کۊشیایش کەرڎەن، فەلسەفەو ژیۋای ڕابەر ئاپۆیش قبوڵ کەرڎ و جە ژیۋایشەنە جابەجێش کەرڎ. گەشمەرڎە بەسێ چنی هەڤاڵەکەیش وەلات دڵبرین (عەلی ئۆگمەن) هەتا دما هەناسەشا دژوو هجومەکا دەوڵەتوو تورکی مدرامانشا کەرڎ، جە ڕۊو ١٤و تەمووزوو ٢٠١٩ ی لووا دلۍ قافڵەو گەشمەرڎاوە.