هامسەرۊکەی گرڎینەو هەدەپەی پەروین بوڵدانەە، بەشڎاری جە بانگەشەو ورچنیەی جە ڕحا و دیلۊکنە کەرۊ. بوڵدانەە دمابەدماو بەشڎارییش جە بانگەشەو ورچنیەی جە مەنتێقەکاو سێوەرەگی و حیلوانی و ڕحاینە، ملۊ دیلۊک. بوڵدانە جە سێوەرەگنە جە وەختوو کەرڎەیۊ نویسگەو ورچنیەینە قسێش کەرڎۍ و ناڕەزایەتیی تندش وەراوەروو ئاکەپە- مەهەپەی بەر وست.

بوڵدانە واتش ئا ورچنیەیە، کە ١٤وو نیسانینە ملۊ ڕاوە چارەنویسوو وڵاتەکەی فاڕۊ و ئەرەیاوناش، "ورچنیەیەکە هەم پەی پەرلەمانین و هەم پەی سەرۊکایەتیی کۊمارین. پەی فاڕیای و ورچەرخیای پەی دەسپەنەکەرڎەیۍ تازەی، پەی ئایندەو ئی وەڵاتی، ورچنیەی کریۊ. ژەنی و گەنجۍ، ئا ئینسانۍ کە نکۊڵییشا چەنە کریۊ پەی فاڕای ئی وەڵاتی واوەی دەنگ مداوە. ورچنیەی بەینوو دیموکراسی و فاشیزمی، ئاشتی و جەنگی، داڎپەروەری و ناداڎی-نە کریۊ. ٢١ ساڵێن ئی وەڵاتی بەرا ڕاوە. ٢١ ساڵێن چی وەڵاتەنە گرد ناداڎیێوە کەرا. زینڎانەکۍ پەڕێنۍ جە سیاسەتمەڎاری، ئاشتیوازی و ئەکادیمی. زینڎانەکۍ پەڕێنۍ جە هامسەرۊکا و شارەوانییەکا. ئێمە جە ١٤و ئایارینە حساب پەی گردوو ئانیشا کەرمۍ.

چی وەڵاتنە پەی داڎپەروەری، ئازاڎی و دیموکراسی کۊشیای ئینا ئارانە. ڕحایچ بییەن بە مێمانڎاروو ئی کۊشیایە. هاواروو داڎپەروەریی ئەدا "ئەمینە شەنیاشار"ۍ نەک حەر جە ڕحانە گردوو جیهانینە دەنگش داوە. وەروو ئینەی ئی دەنگوو داڎپەروەریوازییە خاستەر بژنەویۊ، ئێمە گردما ئینایمۍ چەنی ئەدا "ئەمینە شەنیاشار"ۍ. خەڵکوو ڕحای و سێوەرەگی وێشا بە کەسوو ئەدا "ئەمینە"ی مزانا، بەینوو ئەدا "ئەمینە"ی و "وەزیروو داڎ"ینە، ورچنیەو وێشا هەنشا.

من مزانوو کە ئاڎۍ دوژمنۍ داڎپەروەرینۍ، دوژمنۍ یاسێنۍ، دوژمنۍ کورڎانۍ. ئێمە مزانمۍ کە ئادۍ دوژمنۍ ئاشتی و دیموکراسینۍ. بە نکۊڵیکەرڎەی جە کورڎا، بە قەدەغەکەرڎەی زوانی ٢١ ساڵێن حەوڵۍ مدا بە هەمان مەژگ وەڵاتی بەرا ڕاوە. ئەرڎۊغان جارێوە تەر دوژمنایەتیی وێش پەی کورڎا، زوانوو کورڎی و تاریخوو کورڎی بەر وست. ماچۊ 'شمە چنڎە کورڎۍ بیدۍ، ئێمەیچ ئانڎە تورکێنمێ'. ئێمە چێوە ماچمۍ، 'بەڵۍ ئێمە کورڎێنمۍ و شانازی بە کوردبییەیماوە کەرمۍ. ئێمە کورڎێنمۍ، کرمانجێنمۍ، ئێمە کورڎێنمۍ زازێنمۍ، ئێمە کورڎێنمۍ. ئێمە جە تورکیانە کورڎێنمۍ، جە عێراقنە جە وەرنیشتنە جە گرد شۊنۍ جیهانینە کورڎێنمی و بە ئشناسنامەو وێماوە سەرەبەرزێنمۍ. ئێمە جە دەنگداینە نیشانەتا مدەیمۍ، کە کێنمۍ. جە ١٤و ئایارینە ویندێش".

بوڵدانە ئانەیچش وست ڕووە، کە جە ورچنیەیی پەرلەمانینە جگە جە پارتوو چەپی دەنگ بە حەر لایەنێوە تەری دریۊ ئینا مسڵەحەتوو ئاکەپەینە و واتش، "حەر دەنگێوە تەر کە بە پارتەکای تەری دریۊ، پێسەن بە ئاکەپەی دریۊ. ئێمەیچ داوا کەرمۍ بەتایبەتی بەئیرادەوە دەنگتا دەیدۍ بە پارتوو چەپی سەوزی. ئێمە داوا کەرمۍ کە شمە جە ڕحانە لاو کەمیوە ٨ پەرلەمانتارۍ پارتوو چەپی سەوزی کیاندۍ پەرلەمان".

س.ز