سەرۆککۆمارق تورکی تەیب ئەردۆگان پەی هجوومی ئەرەگیرکاری پەی سەرو پانیشتوو کوردستانی و کەردەی چند کۆبییەیوا سەرێ عێراقیش دا. بەغدانە چەنی سەرۆککۆمارو عێراقی عەبدول لەتیف ڕەشیدی و سەرۆکوەزیرانو عێراقی محەمەد شیاع سودانی کۆ بییۆ.

بە چەمداریی سودانی و ئەردۆگانی بەینو عێراق و تورکیا و قەتەر و ئیماراتینە چوارچوەو پرۆژەو ڕاو گەشەپنەداینە ڕێککەوتەێوی چوارلایەنە ئیمزیا کریا. مەراسیمەکەنە وەزیرو فاڕیایوە-چێرخانو حەر یەرە وڵاتەکەی و وەزیرو وزە-چێرخانو ئیماراتی ئامادێ بێنێ.

حەرپاسە بەینو عێراقی و تورکیاینە ٢٤ ڕێککەوتەیێ ئیمزێ کریێنێ، پێسەو "ڕێککەوتەی چوارچوەو هامکاری بوارو ئاوێ" و "ڕێککەوتەی چوارچوەی ستراتیژی". هەرپاسە پێوەس بە سەرچەمەکاو ئاوێ ڕێککەوتەێوە پەی ماوەو ١٠ ساڵا ئیمزا کریا.

هەنگامەی هامبەشە دژو پەکەکەی

دماو کۆبییەیۆ ئەردۆگانی و سودانی، کۆنگرەی ڕۆنامەوانیی هامبەش کریا، دلێشنە ئەردۆگان دڵوەشیی وێش بەروست بە ئشناسنای پەکەکەی پێسەو "ڕێکوزیێوی قەدەغەکریای" لاو عێراقیوە. واتش چنی عێراقی سەرو هەنگامێ هامبەشێ دژو پەکەکەی قسێشا کەردێنێ و تیشکەش وستە سەرو ڕێککەوتەیە ستراتیژییەکا چەنی عێراقی.

بارزانی هومێدو "ئاشتی و بەردەوامی"یش پەی ئەرەگیرا واست  

دماو ئانەیە ئەردۆگان لوا هەولێر و لاو نێچیرڤان بارزانییوە خێرامای کریا. بارزانی سەرو هەژمارو وێشۆ تۆڕەو کۆمەڵایەتیی ئێکسینە پەیامێوەش وەڵا کەردۆ و واتش بەختەوەرێنێ بە خێرامایکەردەی ئەردۆگانی، واتش سەرو چند پەرسێوی پێسەو "ئاشتی و ئارامی و ئابووری" قسێ مکەرانێ.