چالاکا مافەکا ژەنا شاروو سنەی بایکۆتوو هۊرچنیەکا ئێرانی کەرا
ژەنا چالاکۍ شاروو سنەو ۋەرکەوتوو کوردسانی ئەرەیاۋناشا، بایکۆتوو هۊرچنیەو پەرلەمانوو ئێرانی کەرا.
چالاکاو مافوو ژەنا جە شاروو سنەینە ئەرەیاۋناشا کە دوانزەهەمین هۊرچنیەو پەرلەمانوو ئێرانی بایکۆت کەرا.حەرپاسە داواشا جە گەلاو ئێرانی کەرد جە ڕۊو هۊرچنیەینە یانەکاشانە مەناوە و پی جۊرە هۊرچنیەی بایکۆت کەرا .جە بەیاننامەکەنە ئاماژە پانەی کریان: سەرهۊرداو "ژەنی، ژیۋای، ئازاڎیی'' فاڕیایۍ گۊرەش جە بواروو سیاسی ئێرانینە ئاردەن وەڵۍ. حەرپۊکەی ئێمە پێسە ژەنە چالاکا سنەی ئی هۊرچنیەیە قبوڵ مەکەرمۍ. چونکی بناغەو سیستموو ئێرانی جە فرەو کەموکوڵیا پێکمۍ. ئێمە ئی هۊرچنیەیە قبووڵ مەکەرمۍ کە تەنیا پێسە 'نمایشێوە' ملۊڕاوە.
جە ڕۊو هۊرچنیەو ١و مارسینە جە یانەکامانە مەنمێوە و دژوو سیستموو دیکتاتۆری و هۊرچنیەی نمایشی دروشمەکا:
"نا پۍ جە قەنارەدای
بە مەڵامەتوو ناکۆکی سیاسییوە با کەس نەگیریۆ
نا پۍ دەسەڵاتی ئایدیۆلۆژی
نا پۍ پاشێلکەردەو مافەکا مرۆڤی
نا پۍ جیاکاری جنسی
نا پۍ دووروستەیۆ مامۆسایا
نا پۍ هەڕەشا جە خۊنکارا
نا پۍ هەڕەشا جە کرێکارا
ئێمە یانەکامانە مەنمێوە و پۍ ئانەی نیشانەش بڎەیمۍ کە تەڤگەروو ئازاڎیی ژەنا زینڎەن و چالاکا."
شیاوو باسیا پارتوو ژیۋای ئازاڎیی کوردسانی (پژاک) جە بەیاننامێوەنە سەبارەڎ بە هۊرچنیەکا ١و ئاداری ئەرەیاۋناش؛ کە ئا هۊرچنیۍ دژوو ئامانجی و ویستەکا "ژەنی، ژیۋای، ئازاڎیی"ن و داواش جە گرڎ لێوە کەرد هۊرچنیەی بایکۆت کەرا.
