چالاکاو وەرکەوتو کورڎسانی نەرویجنە پەیامێوەنە پەشتیوانیی وێشا پەی هەڵمەتەو 'ئازاڎیی پەی ئۊجالانی و چارەسەری سیاسی پەی پەرەسەو کوردی' بەروست و داواشا وەنەو گەلاو ئێرانی و بەتایبەتی گەلو کوردی وەرکەوتنە کەرد، بەشڎاریی هەڵمەتەکێنە کەرا.
پەیامێوەنە بڕۍ خەباتکارۍ و چالاکۍ وەرکەوتو کورڎسانی کە ئەرەنیشتۍ وەڵاتو نەرویجینۍ جگە جە شەرمەزارکەرڎەی گۊشەگیری ڕەهاو سەرو ڕابەرو گەلو کوردی عەبدوڵا ئۊجالانی، پەشتیوانیی وێشا پەی هەڵمەتەو 'ئازاڎی پەی ئۊجالانی و چارەسەری سیاسی پەی پەرسەو کوردی' بەروستەن.
پەیامەکەنە ئامان، "کە ئازاڎیی ڕابەر ئاپۊی لکی دریانب بە ئازاڎیی کورڎسان"یوە و وزیانیچ ڕووە، کە پاڕادیگمای ڕابەرو گەلو کوردی هومێدێوەن پەی گەلا و داواشا کەرڎێنە، گەلاو ئێرانی بەتایبەتی گەلو کوردی وەرکەوتو کورڎسانینە پەشتیوانیی هەڵمەتەو 'ئازاڎیی پەی ئۊجالانی و چارەسەری سیاسی پەی پەرسەو کوردی کەرا' کە جە ١٠و مانگەو تشرینو یوەم/ ئۊکتۊبەرینە زیاتەر جە ٧٤ ناوەندانە سەرتاسەرو جیهانینە دەسش پەنە کریان.
دەقو پەیامەکەی:
ئێمە پێسە خەباتکارا و چالاکاو وەرکەوتو کورڎسانی، ئەرەنیشتۍ وەڵاتو نەرویجی، متاومۍ واچمۍ پیلانگێڵنی میاندەوڵەتی پەی سەرو ڕابەر ئۊجاڵانی، ئەوەڵ دژو گەلو کوردی و گەلاو مەنتێقەکەی بۍ دماتەر دژو سیستمو کۊنفیدراڵی دیموکراتیکی، پارادیگماو نەتەوەی دیموکراتیکی، پارادیگماو ئازاڎیی ژەنێن، پارادیگماو ئیکۊلۊژی، پیلانگێڵنی کریان. تا چی بازنە ئاویرەیە ڕزگارما بۊ تەنیا یەک پارادیگما هەن، پارادیگماو نەتەوەی دیموکراتیکی و سیستەمو کۊنفیدراڵی دیموکراتیکین، یانۍ پێوەژیوای و ئازاڎیی گلێرگەی و ویروباوەڕو گەلا. پەوکای مشۊم، هەنگامەی جیددیە بنریۊ، ئەوەڵ کێشەو کوردی بەئاشتییانە و دیموکراسییانە چارەسەر کریۊ. وەرکەوتو دلیڕاسەینە گەلۍ متاوا پێوە بژیوا و نەبا بە دوژمنۍ یۊترینی، فورمووڵەو ڕابەر ئۊجالانی بەڕۊشنی ئانەشە دیاریی کەرڎەن. وەلۍ ئیساتۍ موینمێش، کە ماوەو ٢٥ ساڵا سەروو ڕابەر ئۊجالانی و زیندانییە سیاسییای تەریرە، سیاسەتو گۊشەگیری قورسی کریۊ، بە تایبەت کەسێوە کە ئاڵترناتیڤێوە ئارڎەینەرانەی پێسە ژەنی، ژیوای، ئازاڎییش وەراوەرو مۊدێرنیتەی سەرمایەداری وستەبۊ ڕووە، سەرنجەو فرەو کەساش پەی وێش کێشتێبۊ بیەبۊ بە هومێدو گەلا، پەوکای حەرگیز نمەبۊ ڕووبەڕوو ئی نۊعە ستەم و فشارا بۊوە. ئێمە پێسە خەباتکارا و چالاکاو وەرکەوتو کورڎسانی پەشتگیریی هەڵمەتەو "ئازاڎیی پەی عەبدوڵا ئۊجالانی، چارەسەرێوە سیاسی پەی کێشەو کوردی" کەرمۍ بە ڕاو ئێمە ئازاڎیی ڕابەر ئاپۊی لکەدریان بە ئازاڎیی کورڎسانیوە، پەوکای یوەم چێو کە پێویسا کەرمێش ئازاڎیی ڕابەر ئۊجالانین.
هەرپاسە داوا وەنەو سەرجەمو گەلا و ئازاڎیخوازاو ئێرانی بەتایبەت گەلو کوردی وەرکەوتو کورڎسانینە کەرمۍ، کە پاڵپەشتۍ ئی هەنگامە تاریخیۍ با و چی چوارچوەنە کۊشیای وەرفراوان کەرا.
