شارو زیورخو سویسراینە، ۋەرا ۋەر بە گێرتەی نوێنەرا کەمپو پەنابەرا گەشمەرڎە ڕۆستەم جودی (مەخموور)ی و تەوقدای کەمپەکەی ۋێنیشاندایۍ ناڕەزایی لواڕاوە.

کوردۍ و دۆسەکېشا جە وێستگەو قیتارو مېیانو شارو زیورخینە گلېرۍ بیێوە و پەی یاڎو گەشمەرڎا ئازادی دەیەقێوە بێدەنگیشا مردنا.

جە ۋێنیشانداکەینە بەنامۍ مېیانو گلېرگەو دیموکراتیکی کوردا زیورخیوە بەیاننامێوە بە زوانی ئەڵمانی، جە لایەنو ئەمرە کارایۆ ۋنیاوە.

جە ئەرەیاۋناکەینە ئاماژە پانەی کریا، فشارەکۍ سەرو کەمپو مەخمووری بەردەوامێنۍ، پەنەوازیە سەرەتاییەکۍ مەیسەرۍ نمەکریا، هامکارییە مرۆییەکۍ مردێنۍ، نوێنەرۍ کەمپەکەیچ بە شیوێوە هەرەمەکی باڵبەسۍ کریێنۍ.

'مشۊم دەمودەس تەوقەکۍ هۊرگیریا'

هەرپاسە جە ئەرەیاۋناکەینە ئامان: "پەنەوازا دەمودەس تەوق و ڕاگیریەکۍ سەرو کەمپو مەخمووری هۊرگیریا. پەنەوازا دڎان بە ئاژەو پەنابەرا ئەرەنیشتۍ کەمپەکەیرە بنریۆ. پەنەوازا گلېرگەی مېیاننەتەوەیی و نەتەوە یۊگێرتەکۍ سەرو ئی بێ یاساییا ۋەرپرسیاری جە ئەستۆ گێرا و دەمودەس هەنگامە بنیا."

دماو بەیاننامێوە، چالاکا بەردەوام بە زوانی کوردی، تورکی و ئەڵمانی دروشمێشا واتێوە و ناڕەزایی ۋێشا جە دژو فشارەکا سەرو کەمپو پەنابەرا مەخمووری نیشانەدا.