قەومێ زیندانییا و ئەدایاو ئاشتی بە داواو "ئازادیی پەی بۆ عەبدوڵا ئۆجالانی، چارەسەری سیاسی پەی بۆ پرسەو کوردی" ئێشکگێریی دادپەروەریشا دەس پەنە کەرد، چالاکییەکە شارەکاو ئامەد و وان و ئیستەنبوڵ و مێردین و ئەزمیرینە بەردەواما. چالاکییەکانە درووشمو "بژیوۆ سەرۆک ئاپۆ" و "بێ سەرۆکی ژیوای نمەبۆ" و "بژیوۆ مدرامانو زیندانی" و "ژەنی، ژیوای، ئازادی" بەرزێ کریێوە، ئەدێ هێلەکشا کەردەنە و پۆشو نویسیابێ "گۆشەگیری تاوانێوەن دژو ئینسانییەتی".

چالاکییەکەو ئامەدی، کە ١١٣ ڕوێن بەردەواما، قەومەو زیندانی مەریەم تورانە واتش: "پێسە ئەدایا تا ورگێرتەی گۆشەگیری سەرو ڕابەر ئاپۆی، مدرامان مکەرمێ. داوا جە گردو ئەدایا مکەرمێ بەتایبەت ئەدایاو زیندانییا، پەشتگیریی وەنەو چالاکییەکەی بکەران. تا ئی گۆشەگیرییە بەردەوام بۆ ئێمە ئارامێ نمەبیمێ. ئێمەیچ یانەکامانە ئینایمێ گۆشەگیریینە. تا داواو ئێمە، ورگێرتەی گۆشەگیریین. تەنیا ئا وەخت ئارامێ بیمێ و گێڵمێوە یانەکاما".

چالاکییەکەو وانینە، کە ١٠٩ ڕوێن بەردەواما، یوە جە ئەدایا کەوێ ئیشکە واتش: "ڕۆڵەکێما ١٢١ ڕوێن  زینداننە مانیشا گێرتێنە. ئی گۆشەگیرییە سەروو ڕۆڵەکاما و گەلوو کوردیوە هەن. داواو پەشتیوانی وەنەو گرد ئینسانیوی بەویژدانی مکەروو. تا گۆشەگیری سەرو بەڕێز ئۆجالانی ورنەگێریۆ، گۆشەگیریی سەرو زیندانییا ورمرگێریۆ، تاکە ڕاو ئاشتیی، کۆبییەیۆن چنی بەڕێز ئۆجالانی. پێویسا دەمودەس کۆبییەیۆ بکریۆ".