یۊ چا چېۋا کە ئەرکا سەرو شانا گرڎیماوە  کە پاڵو پارېزنای زۋانەکەیمانە و پارېزنای سرۇشتو ناوچەکەیمانە و پاڵو پاکۆکەرڎەی ناوچەکەیمانە چە کەرەسە کیمیاییەکا و شەخەڵە زېیانبەخشەکا و هەر پاسە پاڵو سۆزەڵان کەرڎەی کەشە ڕۇتەنەکا ناوچەکەیمانە بە درەختۍ کەشیۍ پېسەو هەنگامە سەرەتاییەکا پارېزنای سرۇشتو ناوچەکەی، تۊمارکەرڎەی ۋېنەو گژ و گېۋاۋڵا و گۊڕاڵۍ و دەۋەنا و درەختە بەتەمەنەکا هەنگامېۋە گۆرېنە پەی هەردەم مەنەیشا دلۍ یاڎەۋەری هۊشی دەسکرڎینە (ژیری دەسکردینە).

چنین تۊمار-کەرڎەی گژ و گېۋاۋ و گۊڕاڵۍ و ۋلی و دەۋەنۍ و درەختۍ دەگاکۊ یان ناوچەکەو وېت بە کامېراو مۆباییلەکەو وېت چە گوگڵ-سێرچەنە  google search، تۊمار-کەرڎەی بە چرکە و سات و ڕۊ و ساڵە و یاگۊ وېشاۋە ،  یۊ چا خزمەتانە کە گرڎ یۊ جە ئېمە متاۋۊ بە ئاسانتەرین شېۋاز ئەنجامش بڎۊ، تۊمارکەرڎەی ۋېنەو گژ و گیۋاۋ و گۊڕاڵەکا ناوچەو وېمان.

ساڵانە سەڎان جۊرۍ گژ و گیۋاۋڵۍ و گۊڕاڵۍ پەی هەتاهەتایی دلېنەملا و دلېنەلۋایشا بۊ بە نالەباری و ناهامسەنگی چە سرۇشتو ناوچەکەیمانە و نەۋەکۍ ئایەڼەی چە بېیەیشا و دېیەیشا بېبەشۍ با.

پەی هاگاڎاری، چە ئیسەنە ٥٠٪ گژ و گېۋاۋڵۍ و گۊڕاڵۍ جەهانی، کە ۋەڵتەر بېیېنۍ، نەمەنېنۍ و ئی نالەبارییەشا درۊس کەرڎەن، کە ئیسە ئېمە چنەشەنە گیرۊڎۍ بېیېنمۍ!