چەتەکێ جە حومس و تەرتوسەنە٣ کەسێشا کوشتێ
حومس و تەرتوسەنە دووێ کەسی بە گولـێ گرووپە چەکدارەکا کوشیێ. هەرپاسە زینانیێ بە مەڵامەتو ئەشکەنجەدای جە حومسەنە گیانش جەدەسدان.
بەپاو ڕاپۆرتەو ڕوانگەو سوری پەی مافەکا مرۆڤی (سۆهر)، جە ئەنجامو هرووژمە چەکدارییەکا شارو تەرتوسی کەسێوە کوشیا و کەسێوە تەریچ زامڏاری بی.
تەرمی بڕفانیا
ڕوانگەو سوری پەی مافەکا مرۆڤی ئەرەیاونانش کە تەرمو جوانێ جە چوارڕێیانو قسێرو شارو حومسینە ئیزریانۆ. هەرپاسە ئەرەیاویا کە نیشانێ فیشەکی بە جەسەشۆ دیاربییەن.
ئاماژەش پانەیە کەرد کە زینانو حومسینە بە مەڵامەتو ئەشکەنجەدای زینانیێوە حکوومەتو دیمەشقینە گیانش جەدەسدان. ڕوانگەی سوری پەی مافەکا مرۆڤی واتش: " کەسە کوشیاکە ١٥ڕوێ چاوەڵتەر جە دەگاو خزیلا جەلایەنو هێزە چەکدارەکا ڕژێمو دیمەشقیۆ باڵبەسکریابێ."
بەپاو ئامارەکا ڕوانگەو سوری پەی مافەکا مرۆڤی، جە سەرەتاو ساڵەو ٢٠٢٥ـی هەتا ئیسە ١٢٨ هەرمانێ کوشیێ و بڕفانای چا جۆرە جە ناوچە جیاجیاکا سوریای ئەنجامدریێنێ و جە ئەنجامەنە ٢٤٦ پیێ و ٦ ژەنێ و زاڕۆڵێ گیانشا جەدەسدان. بەگرڏو ژمارەو ئا کەسا جە زینانەکا حکومەتو دیمەشقینە گیانشا جەدەسدان ١٦ کەسێ کە فرەیش خەڵکو حومسینی.
