دادگاو فیدڕاڵی عێراقی شەکوێوەش جە دژوو کاندیدوو سەرۆکوو پەرلەمانی یەکلایکەردۆ
دادگاوو فیدراڵی عێراقی داواو ورشیونایۆو کاندید کەردەی شەعلان كەریم-یش پێ پۆستوو سەرۆكوو پەرلەمانی ڕەڎ کەردۆ، كە دەعواکۍ جە تەرەفوو چن پەرلەمانتارێوە عێراقیۆ پێشكەش کریابۍ.
دادگاو فیدڕاڵی عێراقی جە ئەرەنیشتەوو ئارۆینە چن دۆسیوەش تاوتوێ کەردێوە و دۆسیەو شەعلان کەریمی کاندیدوو پۆستوو سەرۆکوو پەرلەمانیچش یەکلایی کەردۆ.
جە ئەرەنیشتەکەینە دادگاو فیدراڵی عێراقی داواو ورشێونایۆ کاندیدکەردەی شەعلان كەریمیش پۍ پۆستوو سەرۆكوو پەرلەمانی ڕەڎ کەردۆ، كە جە تەرەفوو پەرلەمانتارا یوسف كەلابی، فالح خەزعەلی و حسێن موعنس فەرەجیوە تۆمار کریابۍ.
سکاڵاکەرەکی داواشا جە دادگاو فیدراڵی كەرد، قەرارێوە پێ هورشێونایۆ و پووچکەردەیۆ ئەندامیەتی (شەعلان عەبدول جەبار كریم)ی بەرکەرۆنە، بەمەڵامەتوو نەبییەی شەرتە دەستووری و یاساییەكاوە، كە مشۊم ئەندامێوە پەرلەمانی بۆنەش.
ئینە جە وەختێنە، جە دماین ئەرەنیشتەوو پەرلەمانینە پۍ هۆرچنییەو كاندیدو سەرۆكو پەرلەمانی جە گەڕو یووەمینە شەعلان كەریم فرەتەرین دەنگوو پەرلەمانتاراش بەدەس ئارد، دماتەر پرۆسەو دەنگداکەی لوا گەڕوو دوووەمی ، بەڵام باعزۍ جە پەرلەمانتارا ناستشا شەعلان كەریم بۆ بە سەرۆكو پەرلەمانی و گلێرۊبیەکەیشا پۍ وەختێوە ناڎیاری دما وست.
پۆست و سەرۆکو پەرلەمانوو عێراقی پشکوو پێکئامای سونەکان و چی خولەو پەرلەمانینە محەمەد حەلبوسی تاوابێش جارێوەتەر ئا پۆستەیە بەدەس بارۆوە ، بەڵام جە مانگەو تشرینوو دووەموو ساڵەو ئەرەویەردەینە دادگاو فیدڕاڵی عێراقی قەرارش دا بەهۆرشێونایۆ ئەندامیەتی محەمەد حەلبوسی سەرۆکوو پەرلەمانوو عێراقی جە پەرلەمانەنە و دوور ووستەیۆ نام بریای.
ئا قەرارە سەروو شەکوێوە لەیس دلێمی پەرلەمانتاری وەڵینی بییەن، کە حەلبوسیش بەگەندەڵی و هەرمانۍ ساختەیۆ تۆمەتبار کەردەبۍ.
