هەڵمەتەو 'ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کورد'ی، کە جە ١٠ و تشرینوو یووەمینە جە 74 ناوەنڎا جیا جیاو دنیێنە دەسشپنەکەرڎ، بە پەشتیوانی پێکئاما جیاوازەکاوە بەردەوامیش هەن. ئەکادیمیستە فلۆرنسیا گوارچە جە زانشتگەو فیدراڵی ڕیۆ گراند دو سۆلی جە بەرازیل کە سەروو پارادایموو عەبدوڵا ئۆجالانی هەرمانەکەرۆ جە بواری ئەکادیمینە، سەبارەڎ پا پرسەیە چنی ئاژانسوو هەواڵوو فوراتی قسێش کەردۍ.

'بە مەڵامەتوو فکرەکاو ئۆجالانیوە من عالتەر گلېرگەکەم ئشناسا'

ئەکادیمیستە فلۆرنسیا گوارچە باسش چانەی کەرد کە ساڵەو ٢٠١٥ کۊشیای ئازاڎیی کوردیش ئشناسان، دماتەر جمییەروو کوردی و پارادایموو عەبدوڵا ئۆجالانیش زیاتەر جە نزیکۆ ئشناسان. فلۆرنسیا گوارچە کە ئیسە جە زانشتگەی فیدراڵی ڕیۆ گراند دو سۆلی بەرازیلی سەروو پارادایموو عەبدوڵا ئۆجالانی هەرمانە کەرۆ، ماچۆ:"دماو ئانەی جمیەروو کوردیم ئشناسا، پەیوەندیم چنی گەلەکەیم زیاتەر حێقمتەر بی، جە ڕاسینە من فکرەکۍ عەبدوڵا ئۆجەلانیم پۍ ئانەی بتاوو جە نزیکۆ گلېرگەکەیم بشناس و بەکار ئاردۍ، حۊڵەکېم پۍ ئەنەیاوای جە پارادایموو ئۆجالانی و ئشناسای گلېرگەکەیم، پېوەرە وەشۍ بیۍ.

'ئۆجالان جوابێوە دروس پۍ پرسوو ئێمە کێنمۍ مڎۊوە'

ئەکادیمیست گوارچە واتش:"ئۆجالان جوابێوە دروس پۍ پرسوو ئێمە کێنمۍ مڎۊوە، پارادایموو ئۆجالانی، جووابو ئانەی چنی بتاومۍ نەتەوېوە دیموکراتیک بەبێ دەوڵەتی بنیاڎ بنیەیمۍ مڎۊوە و ڕاچارەکاش پێشکەش کەرۆ. پۊکەی گێڵای شۊنەو جووابو پرسوو"ئێمە کێنمۍ"رە پۍ من فرە گرنگ بۍ، ئۆجالان یاردیدەرېوە بەقووەتا پۍ ئانەی ۋېما بشناسمۍ، بەهاکاما بزانمۍ و جووابێوە پۍ پرسوو"ئێمە کێنمۍ" بێزمېوە .ئێمە گلېرگەکۍ جە نەتەوە جیا جیاکا دنیۍ، دماو ئانەی فێرۍ بیەیمۍ کە ئێمە کێنمۍ، متاومۍ پەیوەندیېوە بەقووەت و گلېرگێوە تێکەڵاو وەش کەرمۍ، جە ۋەران ۋەروو ئا سیستمەینە کە دەوڵەت سەروو فەرق و جیاکاریی بنیاڎش منیۆ، ئۆجالان دەرفەتما پنەمڎۆ ویر جە بێ دەوڵەتبیەی کەرمېوە.

'ژەنا کوردی هێز و ڕوومەتوو ئاخێزینۍ'

گوارچە ئاماژەش پانەیچ کەرڎ، کۊشیاو ژەنا کوردی ئا کۊشیایە بۍ کە فرەتەرین کاریگەریش نیارەو واتش:"کۊشیای ژەنا خۆسەری جمەیەروو کوردی ئارۆ جە گرڎوو بەشەکا جەهانینە دڎانش پۊرەنریان، کۊشیای سەربەخۆو ژەنا دلۍ جمیەروو کوردینە وینیۆ، جە گرڎوو بوارەکا گلېرگەینە ئی ئاژە کاریگەریش سەروو ئێمەی ژەناوە هەن، پۍ من ژەنەو کوردی ڕوومەتوو ڕاستەقینە و هێزوو ئا ئاخېزەینۍ، کۊشیای ژەنا کوردی بۊ بە مایۍ ئیسفاڎەی پۍ گردیما ".

'ئۆجالان هومېڎۍ گۊرەن پۍ ژەنا'

ئەکادیمیستە گوارچە ئانەیچش باسکەرڎ کە ئۆجالان گرنگیش بە ئاخېزوو ژەنا دان، ئینە بیەن بە هومێڎە گۊرە بۆ ژەنا جەهانی و واتش: "ئۆجالان ماچۆ ژەنی مشۊم سەرمەشقۍ ئاخێزی با، ئینە فرە گرنگا، ئێمە بە عالی جە گرنگیی ئی هەرمانۍ ڕووانە میاومېنە. ئۆجالان گرنگی بە ئاخېزوو ژەنا بەخشۆ، ئینە هومېڎۍ گۊرەن پۍ ئێمەی ژەنا".

'هەڵمەتەو ئازاڎیی ئوجالانی فرە گرنگەنە'

گوارچە سەرنجش وست سەروو هەڵمەتەو ئازاڎیی کە جە ١٠و تشرینوو یووەم و ساڵەی ویەردۍ پۍ ئازاڎیی ئۆجالانی و چارەسەری پرسوو کوردی دەسش پنەکەرد و واتش: "ئۆجالان جە چارەسەری پرسوو کوردینە ئەکتەرێوە سەرەکییا، پەی چارەسەری، وەڵۍ گرڎ چېوێنە مشۊم ئی کارەکتەرە بیەیش بۆ، ئی دیالۆگە و موخاتەبەکەش تەنیا ئۆجالانا، پۊکەی ئەگەر گەرەکشابۆ پرسوو کوردی چارەسەر کریۆ، مەبۆ گۆشەگیری سەروو ئۆجالانی بەردەوام بۆ، بە گۆشەگیرکەردەی ئۆجالانی گەرەکشانە ڕا جە گفتووگۊی گێرا، پۊکاتی هەڵمەتەو ئازاڎیی ئۆجالانی فرە گرنگەنە، ئینە هەڵمەتێوە ۋەرفراوانە و گرنگەنە کە سەروو ئاستی میان دەوڵەتینە پەشتگیری ئی داواکارییە پۍ ئازاڎیی ئۆجالانی و چارەسەری پرسوو کوردی  کریۆ".

'داواکاری ئازاڎیی ئۆجالانی، گلېرگە جیاوازەکېش جە دەوروو یۆی کوۍ کەردۍ'

جە درێژەو قسەکاشەنە گوارچە ئاماژەش پانەیچ کەرڎ، جە ڕاو ئی هەڵمەتێوە گەلا دەرفەتوو ئانەیشا پۍ ئامان وەڵۍ کە پارادایموو ئۆجالانی زیاتەر جە نزیکۆ بشناسا و واتش :"هەڵمەتەکۍ دەرفەتما پنەمڎۆ کە ڕووەی حەقەتینەو دەوڵەتوو تورکی بشناسمۍ. مشۊم دیالۆگ پۍ چارەسەری پرسوو کوردی دەس پنە کەرۊوە، پاکاتی ئازاڎیی ئۆجالانی جەوهەرییا. پێویسا گلېرگەی میان دەوڵەتی پارادایموو ئۆجالانی جە چوارچێوەو پاڵپەشتینە وەڵاکەرۊوە. جە سایەو پارادایموو ئۆجالانیەنە، ئارۆ متاومۍ باسوو فرەو پرسا کەرمۍ. گرنگا گرڎوو گلېرگەیچ گێرۊوە، کریۆ پارادایموو ئۆجالانی پېسە میتۆدێوە پۍ چارەسەرکەردەی قۊرتەکا بەکاربۍ. حەرپاسە هەڵمەتەو ئازاڎیی ئۆجالانی نیشانەش دایمۍ کە چنی گلېرگە جیاوازەکۍ متاوا پۍ ویستۍ هامبەشی جە دەوروو یۊی کوۍ باوە، چېگەنە گرنگی کۊشیایۍ میان نەتەوەیی ۋېش نیشانەدا. پۍ نمونەی ئەمەریکای لاتین چانەینە دوور جە کۊشیاو کوردی وینیۆ، بەڵام وەختۍ گەل باس جە ئاژەکەی کەرا، موینا کە پەیوەندیېوە هامبەششا هەن، ئانە دەوڵەتەکېنۍ شوناسوو گلېرگەیی بیەیما جیا کەراوە، مشۊم دژوو ئینەی گەلاو دنیۍ جە دەوروو یۊی کوۍ باوە و پېوەرە کۊشیای کەرا".