داواو زینانیکەردەی کابۆغلوی و ١٠ ئەنداما دەسەو ڕاوەبەری کریا
دەربارەو سەرۆکو نووسینگەو یاسایی ئیستەنبوڵی پرۆفیسۆر ئیبراهیم کابۆغلوی و ١٠ جە ئەنداما دەسەو ڕاوەبەری سزانامە ئاماڎەکریا. جە سزانامەکەنە داواو ٣ پەی ١٢ ساڵا سزاو زینانیکەردەی کریان.
جە ئەنجامو ۋنەپەرسایۆ داواکارو گرڎیی کۆماری باکرکۆی، سزانامێوە ئاماڎەکریا و ڕادەسو ١٣ ەمین دادگاو سزا قورسەکا باکرکۆی کریا. چنەشەنە داواکریان کابۆغلو و ئەنداماو دەسەو ڕاوەبەری بە تۆمەتو "پرۆپاگەنڎەی پەی ڕێکوستەی جە ڕاو ئەرەیاۋنایۆ" و "وەڵاکەردەیۆ هەواڵی ناڕاسی جە ئەرەیاۋنانە" دادگایی بکریا.
ئاماژە پانەی کریان، قسۍ تۆمەتبارەکا زەرەرش بە گلېرگەی یاونان و جە میدیای دیجیتاڵەنە یاوان بە جەماوەرێوە ۋەرفراوان. جە سزانامەکەنە داواو قەدەغەی سیاسی کریان.
١٣ ەمین دادگاو سزا قورسەکا باکرکۆی ئیجازەش بە تۆمەتبارەکا دان وەرگری جە ۋێشا بکەرا و بەڵگەکاشا وزانۍ ڕووە.
دادگا ئەرەیاۋناش ئەر ڕا بە دادگاییکەردەی بڎریۆ، ئانە دۆسیەکە ڕادەسو داواکاری گرڎیی کۆمارو ئیستەنبوڵی مکریۆ و جە دادگاو ئیستەنبوڵینە دادگاییەکە ملۊڕاوە.
