بەشێوە جە گەشتیارا دەگاو گەچینەی ماچا، ئی مەنتیقە هەڵای بە سروشتی ۋێش مەنەنۆ و واتیچشا: "پێویسا گەشتیارۍ پاک و تەمیزی ژیۋگەو دەگاکۍ پارێزنا"
دەگاو گەچینەی سەر بە ناحیەو بیارېن، کۊتەن پەشتەو هەردووە دەگاو گوڵپی و باخە کۆنی، ئی دەگۍ تاریخەکەش گېڵۊوە پەی نزیکەو ٧٠٠ ساڵا چېوەڵتەری و ساعیب کولتور و تایبەتمەندیی ۋێشا، دماو ساڵەکا ١٩٧٥ پەی ١٩٨٠ی و وەزنایرەو ئەرەنیشتا سەر سنوری، ئەرەنیشتۍ ئی دەگۍ فاڕیێنۍ پەی دلۍ چن گلېرگێوە زۆرەملێ حوکمەتوو بەعسی و جە ئیساتېنە تەنیا پېسە سەردای مەیاوە پەی دلۍ دەگاکۍ و بڕێچشا باخ و باخاتشا چی دەگێنە هەن.
بۆنەو ژیۋگە پاکەکەیش و ئاو هەوا وەشەکەیشۆ، بەشێوە جە هاموڵاتییا جە فەسڵوو ۋەهاری و هامنینە، جە وەختوو گەرمبیەو شار و قەزاکانە، ڕووە مکەرا ئی مەنتیقەیە پەی گەشتوگېڵی، بە مەڵامەتوو جیا ئاستەو زبڵی و خاشاکی شۊنەو ۋێشارە بیەن بە بایس و ئانەی بەشێوە جە دەگاکۍ وردە وردە پیسە بۆ.
نەبەز فایەق، فەرمانبەرا و یۆ چا گەشتیارابۍ کە سەردای دەگاگێش کەردەبۍ بە ئاژانسوو هەواڵوو فورات (ANF)یش وات: ژیۋگەکە هەڵای سروشتی بیە و جوانی ۋێش مەنەن و فرە دەسش لا نەیاوان، پۊکاتی گەشتیار حەز مکەرۆ سەردای ئی سرووشتە زەریفەیە بکەرۆ، بەڵام پێویسا گەشتیارۍ پاکوو تەمیزی ژیۋگەکەی ڕاگېرانۍ و حوکمەتیچ لایۍ ئەو مەنتیقەکەی بکەرۊوە و خزمەتگوزاری پەی گەشتیارا مەیسەر بکەرۆ.
لاو ۋێچشۆ بەرزان کەمالی-کاسبکارا واتش: ژیۋگە گرڎ پېسەنە یانەو ۋێما و پێویسا بە پاکوو تەمیزی ڕاشگېرمۍ و خزمەتش بکەرمۍ، تاوەکو پەیما مەنۊوە و بتاومۍ چنەشەنە بنیشمېرە.
