هۆتێلێوە شاروو ئەنقەرەینە لاو پارتوو یەکسانی و دیموکراسییوە هەرمانە و بەرنامەو ژەناش پەی ورچنیەی ٣١ ئازار ئاشکرا کریا. جگە جە ئامادەبییەی کاندیدەکا چندین کەسێ بە جلو بەرگی کوردییوە بەشداریی بەرنامەکەی بێنێ. هەیوانەو چالاکییەکەینە بە زوانی کوردی و چندین زوانێ پۆستەرێ ورواسیێبێنێ، بە ئاماژەدای سەروو گۆشەگیریی سەروو ڕابەروو گەلوو کوردی عەبدوڵا ئۆجالانی.

بەرنامەکە بە دەیەقێوە ڕێزگێرتەی جە گەشمەردا دەسش پەنە کەرد و دمایی هامسەرۆکەی گردینەو دەم پارتی تولای حاتەم ئۆغللارییە قسێش کەردێ و ئاماژەش دا بەرنامەو ژەنا ورچنیەینە سەرچەمەو وێش جە کۆشیای پەنج هەزار ساڵەو ژەنا و ژەنەو کوردیوە ورگێرۆ و واتش: "بەرنامێوە قەوەتا، دژوو سیستموو پیاسالاری، دژوو ژیوای شاری، کە پیاسالاری وەشکەردەن. ئێمەی ژەنی تێگەو شارەوانی سەروو بنەماو ئازادیوازیی ژەنێ، ئیکۆلۆژی و دیموکراتیکی پێشکەش کەرمێ ".

دماتەر تولای حاتەم ئۆغللارییە بەرنامەو ورچنیەیی ژەناش ئاشکرا کەرد:

*پەی ورگێرتەیۆ ئا چێوا لاو دەسەڵاتدارییوە جە ژەنا دزیێنێ، جارێوە تەر بە ئیرادێوە قەوەتوو ژەناوە پەی گێڵنمێوە. چەنی تەماموو ڕێکوستەیەکاو ژەنا، دەسوەڵێوزیی مەدەنی، ئەنجوومەنوو گەڕەکەکا و ئەنجوومەنوو ژەناو شارەوانییەکا، لوجنەو ژەنا مەرزنمێرە و ڕاو پەشتیوانی و وێڕێکوستەیوە چارەسەرێوە هامبەش خولقنمێ.

*بە سیستموو هامسەرۆکایەتی، ئیرادەو ژەنا گردوو مەیدانەکاو ژەنا قەوەتتەر کەرمێ و بەشداریی کەرمێ.

*لیستەکاو مەجلیسوو شارەوانی و نوێنەری گردینوو شاری پێسە ڕێبازوو یەک ژەن-یەک پیای ئامادە کەرمێ.

*پەشتیوانیکەردەی ژەناو هەرێمی و نەتەوەیی و میاننەتەوەیی زیاتەر کەرمێ.

*بە پەشتیوانی ژەنا پەشتیوانیی مدەیمێ لایەنی فرەشناسنامەی، فرەچاندی و فرەزوانی.

*پەی پارێزنای بەهاکاو یەکسانی و ئازادی، سیاسەتوو ژەنا بە پاو ڕەگەزەکا وێمانەیی مەرزنمێرە.

*پەی خزمەتکەردەی ژەنا، پیمەرەکاو یەکسانی بە شێوێوە چالاک کەرمێ بە میراتوو وێما.

*تا ژەنی بە شێوێوە کاریگەر بەشداریی جە پرۆسەو قەراردای شارەوانییەکانە کەرا، جارێوە تەر 'ئەنجوومەنوو ژەناو شارەوانی'ی مەرزنمێرە.

*بەردەوامێ بیمێ جە دژایەتیکەردەی ئا فشارانە کە کریا سەروو ژەنا.

*تەماموو یەکینەکاو سیاسەتوو ژەنانە ئانەیە دیاریی کەرمێ، ڕێکوستەی وێڕاوەبەریی ژەنا قەوەت کەرمێ و پەشتگیرییشا کەرمێ بە بەشدارییشا دلێ میکانیزمەکاو ڕابەروستەی و قەرارینە.

*کۆشیایما بەردەوام بۆ دژوو سیستەموو پیاسالاری.

*بە ئیرادەو ژەناوە دەس جە دیموکراسیی هەرێمی و سیستموو هامسەرۆکایەتی وەرمەدەیمێ.

*ئەکادیمیبییەی سیاسەتوو ژەنا، مەکتەبوو سیاسەتوو ژەنا و ڕاوەبەریی ژەنا وەڵا کەرمێوە.

*پلانەی ستراتیژییەو بودجەی و قسەوباس و قەراردایما، گردوو پرۆسەکانە بە بەشداریی چالاکانەو ئەنجوومەنوو ژەنا بۆ.

ناوەندەکاو یادەوەریی ژەنا

*دژوو سیاسەتوو تاونایۆ، بە زوانوو وێما هونەر وەش کەرمێ و پرۆژەکاو یانەو ڕۆشنویریی قەوەتتەر کەرمێ.

*فاڕای ئا یاگا، کە ژەنی بەتەمەنێ ئەزموونەکاشا دلێنە باس کەرا.

*کەردەی ڤیستیڤاڵوو ژەنا.

خزمەتکەردەی ژەنە ئازادا

*هەرێمە سەرەکی و سترتیژییەکا دیاری کەرمێ، کۆرسی پیشەیی و بازاڕی دیجیتاڵی کەرمێوە و وەڵا کەرمێوە.

*کەردەیۆ ناوەندەکاو ورەتەی پەی ژەنا پەی ئانەی بەرهەمەکاشا ورەشا.

*پڕۆژەو 'هامکاریی ژەنا' جارێوە تەر وزمێوە یاگێ.

*چوارچوەو پڕۆژەکامانە بە نامێ 'ئابووریی ژەن'ێوە پەرە پا ڤیستیڤاڵا مدەیمێ پەی زیاتەر وەڵیوەبەردەی هەرمانەو ژەنا.

*بەرنامەو (ژەن کارت)ی، گردوو شارەوانییەکانە کەرمێ.

پڕۆژەکا پەی ژەنە گەنجا

*گردوو شارەکانە پەرەوەردە و ئابووری پەی ژەنە گەنجا

*جە دەوربەروو وەرمگا(بەشەناوخۆیی)یەکانە کە ژەنی چەنش مەناوە، سیستموو ڕۆشنکەردەیۆی زیاتەری وەش کەرمێ.

*چارەسەرکەردەی کێشەو ئەرەنیشتەبییەی ژەنە گەنجا، کە ئینێ وەرمگاکانە.

*یارمەتیدای ژەنە گەنجا پەی تەمامنای زانکۆی.

پرۆژەکاو دژوو تندوتیژی

*چا یاگانە کە ڕێژەو ئەرەنیشتا فرەن، بارودۆخی گونجیا ڕەخسنمێ و پەناگەی سەر بە شارەوانیەکا مەرزنمێرە.

*کەردەیۆ ناوەندێوە پەی ئا ژەنا، کە بڕیێنێرە جە هامکاریی دەروونی و یاسایی.

* دژوو گرد تندوتیژیێوە مردمێوە، کە دژوو کەسە ئێڵ جی بی تی-یا کریا.

هەرپاسە جە هەرماننامەو ژەنا ورچنیەیی ژەناو دەم پارتینە؛ پلانێ و چالاکیی ژەنا دژوو کارەساتە سروشتییەکا مجیانراوە، کە دۆخوو قۆمیای کارەساتەکانە چەنی مامەڵە کەرا. حەر جە بەرنامەو هەرمانێنە هەرمانە سەروو ئا دۆخاکریۆ، کە با بە قۆرتێ ڕاو خەباتوو ژەنانە، بەرنامەکەنە مەیدانوو ئیکۆلۆژی و ژیوایی هامکار بە ژەنا وزیان وەروو باسی و چارەسەرکەردەی قۆرتەکاو ژەنا وزیان ڕەووە.