پەرلەمانتاراو پارتوو دیموکراسی و یەکسانی گەلا (دەم پارتی) گۆشەگیری سەروو ڕابەروو گەلوو کوردی عەبدوڵا ئۆجالانیشا وست ڕۆژەڤۆ و داواشا جە کۆمسیۆنوو مافوو مرۆڤوو پەرلەمانی کەرڎ دەموودەس چا بارۆ کوۍ باوە.
پەرلەمانتاراو دەم پارتی داواشا جە لوجنە پەیوەندیدارەکا ئەوەکۊڵیای جە مافەکا زینڎانیا و سزادریایا، سەر بە کۆمیسیۆنوو ئەوەکۊڵیای جە مافەکاو مرۆڤوو پەرلەمانوو تورکیای کەرڎ، بەمەبەسوو سەردای جە زینڎانوو ئیمراڵی گلېرۊبیەیۍ بە پەلە ساز کەرۆ.
جە داواکارییەکەنە ئامان، پۍ ڕاگېرتەی جە ئەشکەنجەی مشۊم سەردای دوورگەو ئیمراڵی کریۆ کە ئانەیچ مژارېوە یاساییا و ئانەیچ وزیان ڕووە، گۆشەگیری و ئەشکەنجە دژوو دەستووری هەمیشەیی و پەیماننامە میان نەتەوەییەکان.
جە داواکارییەکەنە ئینەیچ ئامان، ئەگەر ئەشکەنجە بەردەوام بۆ و کۆمسیۆنەکە ئەرکەکاش جە داکۆکی جە مافەکاو مرۆڤی جابەجۍ نەکەرۆ، ئینە بەماناو داکۆکیکەرڎەین جە سیستموو ئەشکەنجەی.
حەرپاسە ویروزیانۆ کە کۆمسیۆنوو مافەکاو مرۆڤی جە نەتەوەیۊگېرتەکانە سیستموو دوورگەو ئیمراڵیش بە ئەشکەنجە پێناسە کەرڎەن و داواکریان کە قەرارەکاو نەتەوەیۊگېرتەکا پۍ هۊرگېرتەی ئاستەنگەکا ۋەروودەم و دیڎاری و چەمپنەکۊتەی هۊرگیریۆ. پا داوېوە داوا جە لوجنەکا پەیوەس بە کۆمسیۆنەکەی کریا دەموودەس سەردای دوورگەو ئیمراڵی کەرا.
جە ڕاو ئا داواکارییەیۆ حۊڵ مڎریۆ هەلومەرجوو عەبدوڵا ئۆجالانی بە پاو بنەماکاو مافوو مرۆڤی سەرڕاس کریۆوە، پا ئاراستەرە حۊڵەکۍ وزیا گەڕوو سەردای دوورگەو ئیمراڵی کریۆ.
