دەوڵەتوو تورکی و تەیب ئەرڎۊغانی سەرۊکش، کە دماو دەسپەنەکەرڎەی تپێکردنی جەنگوو غەززەیوە قسۍ تندێشا دژوو ئیسرائیلی کەرڎۍ، تا مۍ زیاتەر بەرگنۊ، کە ئا قسۍ پەی خەڵەتنای ڕای گردینینۍ و پەشتەو پەردیوە نەک پەیوەندییەکێشا مردنێنۍ بەڵکوم دماو ئا جەنگیوە پەیوەندییەکێشا جە ڕووەو بازرگانییوە زیاتەر پەرەشا سانان.

گۊڤاری خەبەریی (زە کرەیدڵ)ی، کە بابەتەکاو وەرنیشتوو ئاسیای و جیهانی وەڵۍ کەرۊوە، ڕاپۊرتێوەنە ئاماژە بە قەبارەو فاڕایۊ بازرگانیی بەینوو تورکیای و ئیسرائیلی کەرۊ، پانەیە گەرمەو قسە تندەکاو تورکیاینە دژوو ئیسرائیلی بە ڕێژەو ٣٤.٨٪ بەرز بییەنۊ.

 ڕاپۊرتەکێنە ئامان، کیانای توركیای پەی ئیسرائیلی مانگەو تشرینوو دووەموو ساڵەو پاری ٣١٩.٥ ملوێن دۊلارۍ بییەن، مانگەو كانوونوو یووەمینە بەرز بییەنۊ پەی ٤٣٠.٦ ملوێن دۊلارا، ئا ڕێژەیچە بڕوو مانگەو تەمووزوو ساڵۍ وەڵینێش ویەرنان، کە وەڵۍ گیسیاینەی هجوومەکەو حەماسی پەی سەروو ئیسرائیلی ٤٠٨.٣ بێ.

گۊڤارەکە ڕاپۊرتەکێنە قسۍ شارەزێوە ئابووریی تورکیایش بە نامۍ، (ئیبراهیم قەهوەچی) ورگێرتێنە و ماچۊ: دەوڵەتوو تورکی ڕووەو قینۍ و تووڕەیییش بەرەوستێنە، وەختێوەنە هەرمانە و مامەڵەکاش پەشتەو بەرە وزیارەکاوە بەئاسایی ملا ڕاوە.

ئی پەیوەندییە قەوەتە ئینا وەختێوەنە مانگەو تشرینوو یوەموو ٢٠٢٣ ئەرڎۊغان واتش، پەنەوازا ناتانیاهۊ بریۊ وەرڎەموو دادگای و پێسە بکەروو  تاوانوو جەنگی دادگایی کریۊ بۊنەو ئا تاواناوە کە غەززەنە کەرڎێنێش، هاموەخت ئیبراهیم قەهوەچی ماچۊ: بیلالوو كوڕوو ئەرڎۊغانی چی دمایۊ داواش جە گەلوو توركیای كەرڎە بایكۊتوو ئیسرائیلی کەرا، وەختێوەنە بوراكی براش ساعیبوو ئا كەشتییانە، كە سەرەمڕ کەلوپەل پەی ئیسرائیلی کیانا.  

مانگەو تشرینوو دووەموو ساڵۍ ویەرڎێنە، ڕۊنامەنویس مەتین جیهان، پەیوەندییەكاو بەینوو بوراک ئەرڎۊغانی و كۊمپانیا ئیسرائیلییەكاش ئاشكرا كەرڎۍ، كە بابەتەکەش پێسنە بێ: "وەختێوەنە ئەرڎۊغان  ١٧ـو تشرینوو یوەمینە ئیدانەو بۊردومانوو خەسەخانێوەش کەرد غەزەنە لاو ئیسرائیلیوە، كۊمپانیاكەو بوراكی كوڕیش، سەرەگەرموو بارگێرتەیرەینە بێنۍ بەندەرێوە ئیسرائیلینە، ٢٨ـوو تشرینوو یوەمینە، ئا وەختە ئەرڎۊغان ڕەخنە وەنەو ئیسرائیلی گێڕی و داوا وەنەو خەڵکی کەرۍ وێنیشانەدای کەرا، كەشتیی كوڕەكەیش گڵووەو کەشوو تارقینە بە بارەكەیشۊ بەرەو ئیسرائیل لوێ".

گۊڤاروو (زە کرەیدڵ)ی ڕاپۊرتەکێشەنە قسێوە هاکان فیدانی وەزیروو دلۍ دەوڵەتوو تورکیش ئەوەڵوو مانگەو کانوونوو یوەمینە یاد وستۊ، کە دماو ئاشکرابییەی ئا پەیوەندییە تەلەفونییاو پەیوەندیی قەوەتوو بەینوو بنەیانەو ئەرڎۊغانی دەسەڵاتداری و بازرگاناو ئیسرائیلی، وەرگێرییش چا پەیوەندییا کەرڎەبۍ و واتەبێش: 'ئا پەیوەندیۍ هیچ زەرەرێوە بە دۊزوو فەڵەستینی مەیاونا'.

حەر ڕاپۊرتەکێنە ئاماژە بە داتاکاو پەیمانگاو ئاماروو تورکیای "تورکستات"ی کریان، ئا بارۍ کە توركیاوە پەی ئیسرائیلی ڕوانەش کەرڎێنۍ گێرتێنێش وێش و بەتەنیا مانگەو تشرینوو یوەمینە وەراوەروو ١٠٥ هەزار دۊلارا چەکش پەی ئیسرائیلی کیانان و ساڵەو ٢٠٢٣ێچەنە كۊو بڕوو کیانای یاویان ٨٢٣ هەزارۍ و ١١٢ دۊلارۍ، سەرباروو پەیامە تندەكاو ئەنقەرەی دژوو تەلئەبیبی هەرمانەو بەینوو كۊمپانیا توركی و ئیسرائیلیەكایچ بەئاسایی لوێنە ڕاوە.

ئاخروو ڕاپۊرتەکۍ گۊڤاروو (زە کرەیدڵ)ینە ئامان، چەنی ئانەیچە توركیا ئیدانەو كرڎەوەكەو ٧ تشرینوو یوەمیش نەكەرڎەن و لاو چەکداراو حەماسیوە کریا، تەنانەت ئەرڎۊغان  ٢٥ـوو تشرینوو یەوەمینە بارەو جەنگوو بەینوو حەماسی و ئیسرائیلیوە واتش: حەماس تیرۊرستۍ نییەنۍ و بەڵکوم گرووپێوە ڕزگاریوازێنۍ پەی فەڵەستینی، دماتەریچ ناتانیاهۊش بە هیتلەری شوبهنا.