هامسەرۊکی وەڵینتەروو هەدەپەی، سەڵاحەدین دەمیرتاش، واتش: "ملوێنا کەسی عەبدوڵا ئۊجالانی پێسە ڕابەروو گەلی موینا. داڎگا مەتاوۊ قسێ سەروو ئینەیە بکەرۊ. ئۊجالان پەی ئاشتی هەوڵێ مدۊ. ویرێ جە چارەنویسوو وەڵاتی کەرۊوە".
ئەرەنیشتەی دۊزوو کۊبانێ بە وەرگێری هامسەرۊکی وەڵینتەروو هەدەپەی، سەڵاحەدین دەمیرتاشی بەرڎەوام بی.
دەمیرتاش تیشکەش وستە سەروو تۊمەتەکاو سەریش و بەتایبەت تۊمەتوو ژمارە ١٩ پێوەس بە قسەکەرەی دەمیرتاشی دەربارەو ڕابەروو گەلوو کوردی عەبدوڵا ئۊجالانی، وەختوو ڕاوەلوای یادوو نەورۊزینە ئامەدنە، واتش: "ئەگەر بە بەڕێز عەبدوڵا ئۊجالان بواچوو "بەڕێز ڕابەروو گەلوو کوردی"، ئینە چی بۊ بە تاوان؟ با قسێ سەروو ئینەیە کەرمێ. کەسێوە چەنی چۊن لاو گەلێوە پێسە ڕابەری قبووڵ کریۊ، ئینە یاگێ ڕەخنەی و قسەوباسی سیاسیین. مەسەلەکێ کلەدریێ داڎگای نییەنە. نەوەک من، ملوێنان کەسێ ئۊجالانی پێسە ڕابەروو وێشا وینا ".
دەمیرتاش واتش، "وەختێ قسەکامانە ماچمێ ڕابەروو گەلوو کوردی عەبدوڵا ئۊجالان، مەبەسما چێشین، ئێمە خاوەندارێتی جە هەوڵەکاو ئاشتی کەرمێ. ساڵەو ١٩٩٣ ـەوە ئۊجالان پەی ئاشتی هەوڵێ مدۊ. بەروو وەڵاتیوە پێسە موخاتەبی قبووڵ کریێ، وەختێ وەرپەرسێش چەنی کوێ بێنێوە پێسە "بەڕێز ئۊجالان"ی نامێش بریێ.
هەرپاسە دەمیرتاش واتش: "ئانە کە عەبدوڵا ئۊجالانیش پێسە ڕابەروو گەلوو کوردی ئشناسان، من نییەنا. نەوەک من، بەڵکو ملوێنان کەسێ عەبدوڵا ئۊجالانی پێسە ڕابەروو گەلی موینا. ملوێنا کەسی دەیان جارێ کەمپەینوو "چەنیش بنیشدێرە و کێشەکاما چارەسەرێ کەرڎێ "یشا دەس پەنە کەرد ".
دەمیرتاش ئاماژەش پانەیە کەرد، ١٢ ساڵێن پەرلەمانتارا و ٧ ساڵێن ئینا زینڎانە، هەزاران جارێ قسێش کەرڎێنێ و وەلێ وەروو ئانەیە ٤٠-٥٠ جارێ باسوو کوردی و کوردسانیش کەرڎەن داڎگاییش کەرا و بابەتەکە لکە دریان بە کوردیوە، واتش: "تەنیا قسەکام دەربارەو کوردی و کوردسانی پێسە تاوانی وینیێنێ. دەربارەو کۊکوشیی سۊما قسێ تندتەرێم کەرڎێنێ، چی دۊزێوە سەرم نەکریاوە؟ چونکوم باسوو کوردیش نیا چەنە. من وەروو واتەی کەلیمەکاو کوردی و کوردستانی داڎگایی کریەو".
