ئۊنور دوشونمەز کاندیدو پارتو چەپی سەوزی جە جۊلەمێرگ پۍ پەرلەمانی ئەرەیاۋناش، ھەرمانە پۍ لابەرڎەو گۊشەگیریی سەرو ڕابەرو گەلوو کورڎی عەبدوڵا ئۊجالانی و چارەسەرکەرڎەو کێشەو گرفتەکا جۊلەمێرگی مکەرۊ.

نامۍ کاندیدەکا پارتو چەپی سەوزی پۍ ھورچنیاکا ١٤و ئایاری ۋەڵاکریاۋە. جۊلەمێرگ ٣ پەرلەمانتارۍ ھورچنۊ. پارتو چەپی سەوزی "وەزیر جۊشکون پارلاک و ئۊنزور پارتین و ئۊنور دۊشونمەزی"ش جە جۊلەمێرگەنە کاندید کەرڎێنۍ.

دوشونمەز کاندیدو پارتو چەپی سەوزی جە جۊلەمێرگەنە کێن؟

پارێزنەر ئۊنور دوشونمەز جە ١٦و تشرینی دوۋەمو ۱۹۹۰ ی جە مەنتیقەو گەڤەرو پارێزگاو جۊلەمێرگی جە ئەڎۍ بیەن. دماو تەمامکەرڎەو ۋەنای سەرەتایی و ناوەنڎی و ئامادەیی جە گەڤەرنە، ساڵەو ۲۰۱۲ی جە زانکۊو دیجلەینە دەسش بە ۋەناو یاسای کەرڎ و جە ساڵەو ٢٠١٦ینە ۋەناو یاسایش تەمام کەرڎ. دوشونمەز دماو تەمامکەرڎەو ۋەنای و ھەرمانو کاری ڕۊتینی جە ئەستەنبول دەسش کەرڎ بە ھەرمانەو پارێزنەری. دماو ئانەی جە ساڵەو ۲۰۱۷ ی جە گەڤەرەنە ئەرەنیشتەبی و چاگە ۋەردەوام بۍ جە ھەرمانەو پارێزنەری. ساڵەو ۲۰۱۹ی بی بە ئەنڎامو لوجنەو ڕاۋەبەری کۊمەڵەو پارێزنەرا جۊلەمێرگی، جە ساڵەو ۲۰۲۰ینە سکرتێریش پۍ پرۊژەو پەشتیوانی پارێزنەرا مافەکا مرۊڤی کەرڎ، کە پڕۊژێۋە هامبەشو "ئیهەدەی و تیهەڤ"ی بۍ جە سەرنیشتوو کورڎسانی. دوشونمەز پارێزنەرییش پۍ کەیسەکا کۊبانۍ و ژیتەمی کەرڎ، جە ساڵەو ٢٠٢٢ێوە هامسەرۊکو لقو جۊلەمێرگو کۊمەڵەو پارێزنەران پۍ ئازاڎیی. دوشونمەز شارەزاو زوۋانەکا کورڎی و تورکی و ئینگلیزییا.

بەرنامەو ئەساسی من لابەردەی گۊشەگیری بۊ

دوشونمەز بە ئاژانسو هەواڵی فورات (ANF)یش ئەرەیاۋنا، بەرنامەی ئەساسیش ھەرمانکەرڎەین پۍ لابەرڎەو گۊشەگیریی سەرو عەبدوڵا ئۊجالانی رابەرو گەلو کورڎی و حۊڵ مڎۊ حەتا گۊشەگیری بۊ بە ڕۊژەڤو ئەساسی و سەرتاسەری ۋڵاتی.

 دوشونمەز ئاماژەش پانەی دا، جە کەیسە کۊمەڵایەتییەکا پېسە کۊبانۍ و ژیتەمینە پارێزنەرا و ئەرەیاۋناش، گەرەکشانە چا چۋارچێۋەنە دەورو ۋێشا جە فاراو سیاسەتو دۊڵەتینە گێڵنا. دوشونمەز ۋاتش، حۊڵ مڎا پڕۊژەکا پەیوەنڎیدار بە بۍ ھەرمانی و ناڕەحەتی و بێزاری جوۋانا بەتایبەتی جە جۊلەمێرگەنە پەرە پنە بڎا.

ھ.ش