دەوڵەتوو تورکی ئەرەگیری ناوەندەکاو خزمەتگوزاری و ناوەندەکاو ژیوای خەڵکی مەدەنی سەرنیشت و وەرکەوتوو سوریاینە بە فڕۊکەی جەنگی و فڕۊکەی بێفڕۊکەوان بۊردومانۍ کەرۊ. قسەکەری ڕسمیی هێزەکاو ئاسایشوو دلۍ سەرنیشت و وەرکەوتوو سوریای، عەلی ئەلحەسەن، سەبارەت بە هجوومەکاو دەوڵەتوو تورکی ئەرەگیری، پەی ئاژانسوو ANF قسێش کەرڎۍ.  

عەلی ئەلحەسەن واتش،  کە  ٢٣ کانوونوو یوەمیوە، دەوڵەتوو تورکی ئەرەگیری بە سیستماتیک مەنتێقەکاو سەرنیشت و وەرکەوتوو سوریای بە فڕۊکەی بێفرۊکەوان و فڕۊکەی جەنگی کەرۊ ئامانج و واتش: "دەوڵەتوو تورکی ئەرەگیری ناوەندەکاو تەندروستی، خزمەتگوزاری و هێزە ئەمنییەکا کەرۊ ئامانج. دەگایەکاو قامیشلۊی و کۊبانی و ڕای سەرەکییەو عامودۍ لاو فڕۊکەکاو دەوڵەتوو تورکی ئەرەگیریوە بۊردومانۍ کریۍ.

ئەلحەسەن واتش کە دەوڵەتوو تورکی بە ئامانجگێرتەی ناوەندەکاو سەرنیشت و وەرکەوتوو سوریاینە هەوڵۍ مدۊ شانەکاو داعشی زینڎۍ کەرۊوە و واتش: "پی هجووما هەوڵۍ مدۊ ڕا پەی بۊ کەوتەی سەرنیشت و وەرکەوتوو سوریای کەرۊوە. هەوڵەکێما پەی سەقامگیریی ئاسایشوو مەنتێقەکاو سەرنیشت و وەرکەوتوو سوریای زیاتەرۍ کەرمۍ. ئێمە پەی پارێزنای و سەقامگیریی مەنتێقەکەی وەعدما ئەوەخوای کەرمێوە و بیمۍ بە جوابوو ئا هجوومە تیرۊریستییا، کە دژوو سەرنیشت و وەرکەوتوو سوریای کریانێ".