دمانیمەڕۆو ئارۆی، سەکۆی ئازادوو پارکی ئازادیینە، شاروو سلێمانیینە دژوو بۆردومانەکەو قەزاو سەیدسادەقی و بەئامانجگێرتەی دووێ سەیاراو ڕۆنامەوانا و بۆردومانکەردەیشا ٢٣ێ ئابوو ٢٠٢٤، کە بی بایسوو گەشمەردەبییەی هەردووە ژەنە ڕۆنامەوانا (گوڵستان تارا) و (هێرۆ بەهادین)ێ، بە ئامادەبییەی فرەو ڕۆنامەنویسە ئازادا و کەسە ئازادیوازا کۆنگرێوی ڕۆنامەوانی کریا.

ئەوەڵوو کۆنگرەکەی بە دەیەقێوە مدرای پەی گیانی پاکوو گەشمەردا دەسش پەنە کەرد.

دماو ئانەیە سنوور ڕەحمانەی رۆنامەنویسە بە نامێ ڕۆنامەنویساو پانیشتوو کوردسانیوە بەیاننامێوە ننویسیاش واناوە.

بەیاننامەکە ئینەنە: " ٢٣ێ ئی مانگێ دەوڵەتی ئەرەگیروو تورکی نزیکوو دەگاو تەپەڕەشینە، سەیدسادەقوو سنوورو پارێزگاو سلێمانیینە، ڕاو فڕۆکەی بێفڕۆکەوانیوە، سەیاریوە ڕۆنامەنویساشا بۆردومان کەرد، کە هەرمانەی میدیاییەو وێشانە بێنێ و گولستان تارا خەڵکوو سەرنیشتوو کوردسانی، کە سالەو ٢٠٠٠یوە هەرمانەیڕۆنامەوانییە مکەرۆ و  ماوەو یەرێ ساڵان پێسەو راوێژکاری سیاسیێ ئینا کۆمپانیاو چەترینە، هێرۆ بەهادینە خەڵکوو سەنگاوینە و هەرمانەو مۆنتێریی کەرێ کۆمپانیاو چەترینە گیانسا بەخت کەرد و ڕۆنامەنویسێوەیچ  بە نامێ ڕێبین بەکریوە، کە ٣٠ ساڵێن و خەڵکوو سلێمانیین و سەرپەرشتوو  دیجیتاڵ میدیاو کۆمپانیاو چەترین بریندار بی.

ئی هجوومەو دەوڵەتوو تورکی پەی سەروو ڕۆنامنویسە ئازادا، بە تەمامی شکس و بێدەسەڵاتیی ئەنجومەنوو ئاسایشو حکومەتو هەرێموو کوردسانی و دەوڵەتوو عێراقی بەرموزۆ وەراوەروو ئەرەگیرییەکاو دەوڵەتوو تورکیای، کە بەرەو خاکەکەیشا واز کەردەن و بەئاسانی ئەرەگیریی خاکی، سۆچنای مێوە دەیمێ و باخی و چۆڵکەردەی دەگایەکا و فشار و هەڕەشەکەردەی جە دەگانشینا و بەئامانجگێرتەی هاموەڵاتە مەدەنییا و ڕۆنامەنویسا بکەرۆ، هیچ لایەنیوە ڕسمییچ حکومەتوو هەرێموو کوردسانی و عێراقنە دەنگش چۆوە نمێ.

ڕاسیینە ئی هجوومێ ئەنجاموو ڕێککەوتەی بەینوو ئەرەگیراو خاکوو کوردسانی و بەتایبەت رێککەوتەی بەینوو عێراقی و تورکیاین، بە چەمساقیی پەدەکەی کە حەر ڕوێو پیلانیوە دژوو گەلوو کوردی مکەرا، شەنگالۆ تا حەمرین سیاسەتی نۆعاونۆعێ تاڵانکاری و دلێنەبەردەی و ئەرەگیرکاری و دەسملەرەگێرتەی مکەرانێ و حەرکەسیچ دەنگش چۆوە بێ بە سیخوڕ و هامکارو دوژمنی نامێش منیا و مکەرانێش کونجوو زیندانیوە.

ئارۆ کە زوڵم و فاشیزم و ئەرەگیرکاری دەوڵەتوو تورکی بە ڕانمایی وێورەشا و سیخوڕاو دلێ یاوان قەلاپۆپە، کوردی ئازاد هەر چوارپارچەو کوردسانی و دنیانە و کەشەسەرەبەرزەکاو کوردسانینە ئینێ مدرامانی دژوارەنە.  هەرمانەی سەرەکییەیچ کەوتێنە سەروو ڕۆنامەنویسا کە هەقیقەتوو ئەرەگیرییەکا و  پیلانە گڵیاوەکاشا بوزانە ڕووە، پیسەو کۆشیای ڤیان جاف، نوژیان ئارهان، دەنیز فورات و پەخشان عەزیزی و  ناگیهان ئاکارسەلدایێ، ڕێبازوو گوڵستان تارێ و هێرۆ بەهادینێ بگێرانە وەر و تا دمایی ڕاویارێ ڕاو ئازادی و حەقیقەتی و سەربەوێیی با.

گەشمەردەکەردەی هامڕایاما گوڵستانێ و هێرۆی کاریگەریی دەوروو ڕۆنامەوانە ژەنا بەرموزۆ، بەتایبەت  پانیشتوو کوردسانینە کە گردوو نۆعەکاو تندوتیژی، دەسدرێژی و هەراسانکەردەی و بەکاڵاکەردەی ژەنێ و ئەرەگیری خاکی و کولتووری و زوانی ڕووبەڕووێ ژەنا و بەتایبەتگوڵستان و هێرۆ کاریگەری ڕۆڵی ڕۆژنامەوانیی ژن دەستنیشان دەکات، بە تایبەت ژەنە ڕۆنامەنویسا مبۆوە، ئی بەئامانجگێرتەیە بەرش موزۆ ژەنی ڕۆنامەنویسێ بە قەڵەم و کامێرەکاشا رووەی هەقەتینەو ئەرەگیرا و ورماڵا و پیلانەکاو سیستموو سەرمایەداری و بەرژەوەندییوازی و پیای سەردەسی موزانە ڕووە و ڕێبازوو کۆشیای ژەنێ پەی ئازادی و حەقیقەتی مجانێرە.

وەختیوە پێسەو ئیساتێنە کە هجوومە هەمەلایەنەکێ هەسێ بیێنیوە و رۆنامەنویسێ ئازادێ پانیشتوو کوردسانینە و گردوو ئا ڕۆنامەنویسا، کە دەنگ و ڕەنگ و قەڵەم و کامێرەکەشا پەی نیشتمانی و خاکەکەیشانە،ئینێ وەردەموو ئا تەرسێنە، کە هامشێوەو هامڕایاما بکریانە ئامانجوو هێزە ئەرەگیرەکا، بەتایبەت دەوڵەتوو تورکی تاریخوو ئەرەیاونای کوردیچ داراو نەریتێوە گەورەو مدرامانین، ئێمەیچ پێسەو ژەنە ڕۆنامەنویسا، درێژەپەنەدەرێ ئی نەریتەینمێ، چونکوم تارێخوو ئەرەیاونای ئازادی یەکسانا بە تارێخوو مدرامانوو گەلی و بە ونەو هامڕا و هامپیشە ڕۆنامەنویسەکاما کە درێژەشا بە نەریتوو ڕۆنامەنویسیی ئازادی دا، تا ئیساتێچ ئی مدرامانە بەردەوامییش هەن.

ئێمە پێسەو ژنە ڕۆنامەنویسە ئازاداو پانیشتوو کوردسانی، ئی هجوومەیە سەرکۆنە و ڕسوا مکەرمێ. نەعلەتە کەرمێ وەنەو بکەراش، گەلەکەیما هۆشیار مکەرمێوە، کە ئەگەر مەرامەکاو تورکیای سەر بگێرا، هیچ کەسیوە چی پانیشتەنە پانیشایچۆ کە جەنگ سەروو دەسەڵاتی مکەرا پارێزیێ نمەبا.

داوا وەنەو سەندیکاکاو ڕۆنامەنویسا، ڕێکوزیاکاو گلێرگەی مەدەنی و  ژەنا،حزب و لایەنەکا و دەسەڵاتداراو  هەرێموو کوردسانی و عێراقی مکەرمێ.ئاستوو ئی هجوومیەنە بێدەنگێ نەبا و دەنگوو وێشا بیاونا گردوو ناوەندە میاندەوڵەرییەکا و بانە بە ڕاگێرێ وەردەموو هجوومەکاو دەوڵەتوو تورکینە، چونکوم بێدەنگییشا بۆ بە ڕووەسیاویی تاریخی، گەرەکیچمانە بە گەلوو وێما بواچمێ: ئی هجوومێ نمەتاوانە یەک هەنگام باراماوە دماوە، ئێمە بیمێ بە دەنگوو ئا راسییە کە ئارۆ گەل باوڕش پەنەشەن.

مەنەنۆ بواچمێ قەدەغەکەردەی و فشار و تۆقنای و تیرۆرکەردەی حەرگیز ڕۆنامەنویسا جە ڕای ڕاسی دوور نمەوزاوە، ژەنی ڕێکوزیێ ئەرەیاوناینە بەروزەو حەقیقەتی و ئازادیین و پێوە کامێرە و قەڵەمەکەو گولستانێ و هێرۆی زەمینەنە جیا نمازمێ و درێژەپەنەدەرێ ڕێبازەکەیشا مبیمێ".

دماو ئانەیە دیاری محەمەد، ڕاوەبەروو سەنتەروو میترۆی وتارێوەش واناوە و واتش:" چەمەڕاو ئامادەبییەی زیاتەروو ڕۆنامەنویسە ئازادا کەرێنمێ، وەروو ئانەیە ئینە مکریۆ پەی گردوو دەزگاێوە میدیای ئازادی ڕووە بدۆ، ئارۆ دوێ ژەنێ کەناڵوو ستێرکی گەشمەردێ بیێ، سەوای مکریۆ پەی هەریۆ تەریما بۆ، بەتندی ئیدانەو ئی نۆعە هجووم و پەلامارا مکەرمێ پەی سەروو ڕۆنامەنویسە ئازادا و ئجۆما ئینە توانێوە گەورەن دژ بە ڕۆنامەوانا، کە خەڵکێ مەدەنیێنێ و هەرمانەی یاساییەو وێشا مکەرا".

دماو ئانەیە سارا ڕەزا، ئەندامەودەسەو راوەبەریی ژەناو تەڤگەروو ئازادیی کوردسانی بەیاننامیوەش واناوە و واتش:" بەتندی سەرکۆنە و ئیدانەو ئی هەرمانە تیرۆرستیێ مکەروو، کە دەوڵەتوو تورکی پەی سەروو ڕۆنامەوانە ئازادا کەردەش و سەرەو ڕێز ی و نەوازشی پەی گەشمەردا مکۆمنمێرە و ڕا و ڕێبازوو گەشمەردەکاما گوم نمەکەرمێ، ئی هەرمانە تیرۆرستیێ دەوڵەتی فاشیستوو تورکی گردوو سنوورەکاش ویەرنێنێ و بە چەمساقیی دلێ تاوانش پێسە هجووم بکەرۆ سەروو میدیا ئازادەکاو ئێمە".

دماو ئینیشا، شەیما ڕەزا جە دەسەو ڕژاکی و هاوکار عیززەدین جە فیدراسیۆنوو ڕۆنامەنویسا سەربەوێ-ڕۆنووس، وتارشا واناوە و دڵگرانیی وێشا پەی ڕووەدایەکەی ئەرەیاونا و بۆردومان و کردەوەکاو دەوڵەتوو تورکی ئەرەگیریشا شەرمەزار کەرد.

ئاخروو گردوو بەیاننامەکانە دروشمەکاو "ژەنی، ژیوای، ئازادی"ی و "گەشمەردێ نمەمرا" و " نەعلەت جە ئەرەگیری و خەتەو خیانەت"ی وچیێنێوە.