سەردەمێوەنە کە گەلوو کوردی لوۍ دلۍ قۆناغێوە تازەیۆ، جە ڕاو بەرکەوتەی ڕابەر ئاپۆیۆ جە ٢٧ تشرینوو دووەموو ١٩٧٨ پەکەکە دامەزرا و پەی ڕزگاریی کورڎسانی هومێد ئاما ئاراوە. بە مدرامانوو زیندانییاو پەکەکەی زیندانەکانە و دەسپەنەکەردەی هەنگامەو ١٥و ئابوو ١٩٨٤، ئیتر شۆڕش کورڎسانەنە لوا دلۍ قۆناغێوە تازەیۆ. ئیتر کۆشیای بە حەر چوارپارچەو کورڎسانی و وەرکەوتوو دلیڕاسەیرە وەڵا بیۆ. وەختێوە چانەنە هامڕا خەبات دێرکیچ پێسە فرەو گەنجاو کوردی وەرنیشتوو کورڎسانینە، کە بە سیاسەتوو نکۆڵی و چەوسنایۆ و پەی دابینکەردەی بژێویی بنەیانەکەیش ناچار بی بلۆ بەروو وەڵاتی.

هامڕا خەبات لوبناننە کادرە سەرمەشقەکاو پەکەکەیش ئشناسێ. ڕاو چارەسەرکەردەی سەرجەموو کێشەکاش ئشناسۍ و یاوانە، کە ئەگەر کۆشیای گەلی پەی ئازاڎیی قەوەت نەکریۆ، ئەسەما حیچ کەس و بنەیانێوە بتاوۆ شکۆمەندانە و بەئازاڎییوە بژیوۆ. سەروو ئا بنەمی ساڵەو  ١٩٨٣ پەیوەندییش چەنی کادرەکاو پەکەکەی ساز کەرد. ئیتر لوبناننە  بی بە لایەنگێر و خەباتکارێوە شۆڕشوو کورڎسانی. ساڵەو ١٩٨٥ دەرفەتش پەی ڕەخسیا بلۆ ئەکادیمیاو مەعسوم کۆرکمازی، پەروەردەی بیردۆزی و سەروازییش دی و چا ڕابەر ئاپۆش ئشناسا. ڕاستەوخۆ ڕابەر ئاپۆیۆ فێروو ئەرەمەنەی ڕامان و ژیوای شۆڕشگێڵنی بی، بی بە کادرێوە پەکەکەی. هامڕا خەبات بە ڕۆحی نیشتمانپەروەری، ڕەنجدەری، گیانبازی ئشناسیا و بڕواش چانۍ بێ، کە چارەنویسوو حەر چوار پارچەو کورڎسانی پێوە بەسیانۆ.

واچی: " تا ئێمە قبووڵ کەرا، مشۆم ئەوەڵ وێما بییەی وێما سەلەمنمێ. بیمۍ بە هێزێوە سەروازی، کۆمەڵایەتی و سیاسی". بە بڕوێوە پتەوە و بۍ دووەدڵی ساڵەو ١٩٨٧ ڕووەش کەردە کەشەکاو کورڎسانی و تێکەڵ بە ڕیزەکاو گەریلای بی. بریندار بی، فرە دژواریۍ و تەنگوچەڵەمێش دیێ، وەلۍ سەرباروو ئانەیچ گەشمەرڎە خەبات بە گیانبازیێوە گەورەوە درێژەش بە کۆشیای دا. بەردەوام فەرماندەو جەنگی و چالاکییەکا بێ. سەرمەشق و جەنگوانوو ئازاڎیی بێ. هەمان وەختنە کادرێوە سەرمەشقوو پارتەکەیش بێ.  وێش بە وانیار و جەنگاوەرێوە خەتەو فەلسەفەو ژیوای ڕابەر ئاپۆی نیێرە. حەرچندە فرەو جارا پێسەو فەرماندێوە سەروازی ئشناسییێ، وەلۍ وەختۍ خەتەو بیردۆز و ڕێکوستەی پارتەکەی ڕووبەڕوو هجوومی بێوە، سڵ نەکەرێوە و جە کۆشیای پەی پارێزنایی خەتەو پارتەکەی بێهەڵوێست نەبێ. پەی پارێزنای بەها و پیمانەکاو ژیوای پارتەکەی بە پاو  فەلسەفەو ڕابەر ئاپۆی ئامادە بۍ گرد چێوۍ کەرۆ، ئەگەر پێویس بیۍ ئامادە بۍ وێش فیدایی کەرۆ. گەشمەرڎە خەبات نموونەو ئازایەتی و هامڕایەتی بێ.  پاسە ئامادە بۍ دژوو دوژمنوو بەری گژیۆ و کۆشیۆ، پاسەیچ ئامادە بێ، کە دژوو مامەڵەو دلۍ بەروو خەتەو ڕابەرایەتی و پارتەکەی کۆشییۆ.هەرمانە و وەرپەرسبییەیش دلۍ ڕێکوستەینە  یاوا حاسوو کۆمیتەو ناوەندیی پارتەکەی. حەرپاسە جە ڕووەو سەروازییوە بەرزتەرین حاسنە بی بە فەرماندەو مەیدانەکاو گەریلای و گردوو مەیدانەکانە گژیا و مدرامانش گرد یاگێوەنە کەرد.  

قۆناغوو شۆڕشینە ئاماوە پەی وەرنیشتی

چا ساڵە دوورودرێژاو کۆشیایشنە دلۍ مەیدانی گەرموو ڕیزەکاو٣ گەریلاینە بی بە سەرمەشق و فەرماندە. بی بە شایەتوو فرەو سەرکەوتەیەکا، وەلۍ هەمان وەختەنە فرە هامڕێچش پاڵشنە گەشمەرڎۍ بیێ. گرد وەختۍ لوای سەروو ڕێبازوو هامڕاە گەشمەرڎەکاش بە بنەما گێرت، وەفاداری بە گەشمەرڎاش بە بنەما گێرت. وەختوو وەهاروو گەلانە وەختۍ سوریانە بە گردی و وەرنیشتوو کورڎسانینە شۆڕش دەسش پەنە کەرد، یۆ بۍ چا هامرایا کە بۍ دووەدڵۍ شانەش دا چێروو هەرمانەو سەردەمی و گێڵاوە پەی وەرنیشتوو کورڎسانی. فرە دڵوەشۍ بێنمۍ و شانازیما کەرد وەختۍ هامڕا خەبات ئاما. وەروو ئانەی ساعیبوو ئەزمون و دەوڵەمەندیی جەنگی و ڕێکوستەی بێ. پێسە مزانیۆ جگە جە پارێزنای کۆمەڵایەتی، سیاسی و بیردۆزی، پارێزنای سەروازییچ فرە گرنگا. پەوکای سەروو بنەماو پارێزنای جەوهەروو هێزێوە کی سەروازی خولقیا . گەشمەرڎە خەبات سەرباروو دەرفەتی کەمیچ چەنی هامڕایاش شەو و ڕۆ گەنجۍ ڕێکۍ وزۍ و بییەی خولقنێ. بەتایبەتییچ چا پراتیکەنە ئا گەنجا بە دەرفەتی کەمۆ مەیدانوو قارەمانێتیینە گەورێشا کەرێ.  پێسە گەل بڕواش بۍ پەنەش. ماوێوە کەمنە هەزاران گەنجێش دەوررە کوۍ بیێوە و بێی بەشێوە چا گرووپەیە. شۆڕشوو وەرنیشتی سەروو ئا بنەمێوە کەوت وەڵێ.  

هامڕا خەبات بارەو بەهاکاو پارتیوە هامڕاێوە ڕۆشن بێ،  ١٢ی کانوونوو دووەموو ٢٠١٢  پەی چارەسەرکەردەی کێشێوە سەرۍ قامیشلۆی دا و چاگە ئەنجاموو پیلانگێڵنیێوەنە بریندار بی. ١٤ی کانوونوو دووەموو ٢٠١٢ سەرباروو هەوڵە پزیشکییەکا، گەشمەرڎە بی. گەشمەرڎەبییەی هامڕا خەباتی کۆسێوە  گەورە بێ. دوای گەشمەرڎەبییەیش دژوو خیانەتی و ستەمکاری تووڕەیێوە گەورە ئاما ئاراوە. بە هەزاران گەنجۍ کە دڵسۆزۍ و وەفادارۍ یادوو گەشمەرڎەی بێنی، بوون، بەشدارییشا شۆڕشنە کەرد.

بە بەشداریی هەزاران گەنجا هێزەکاو یەپەگەی و یەپەژەی بونیادۍ نریێ. هامڕا خەبات بی بە هێماو شۆڕشوو وەرنیشتوو کورڎسانی. سایۍ ڕەنج و مدرامانوو سەرجەموو گەشمەرڎاوە بەتایبەتی گەشمەرڎە خەبات ئارۆنە شۆڕشوو وەرنیشتی یاوان حاسوو  شۆڕشوو سەرنیشت و وەرکەوتوو سوریای.

ئا شۆرشە پەی گردوو گەلاو سوریای و وەرکەوتوو دلێڕاسەی بی بە هومێد. هامڕێما پێسە گەشمەرڎە خەباتی گرد وەختۍ با سەرمەشقۍ و ڕەمز. تا شۆڕشوو ئازاڎی و دیموکراسی بیاوۆ سەرکەوتەی، ئێمە گرد وەخت هێز و ئازایەتییشا کەرمۍ بە نموونە.  

دماو شۆڕشی هجوومی فرە گەورە پەی سەروو سەرنیشت و وەرکەوتوو سوریای دەسش پەنە کەرد. لاێوە مشۆم دژوو ئا هجووما خاکیما پارێزنمێ. لیوە تەرۆ مشۆم دژوو سیستموو نەتەوە-دەوڵەتی سیستموو وێڕاوەبەریی دیموکراتیکی وزمۍ وەڵێ. ئانەیچ بە شێواز و زانابییەی شۆڕشگێڵنییوە بەسیانۆ. ژەنی ئازاڎە و گلێرگەی ئازاڎ بە زانابییەی تازەوە خولقییۆ. ئانەیچ پاسە گنۆ وەڵۍ گرد لێوە بە پاوە پاڕادایموو ڕابەر ئاپۆی وێشا ڕێک وزا و سەروو ڕاو گەشمەرڎاوە بلۆ ڕارە.  ئیساتۍ پەیمانەی کۆمەڵایەتییە  پەسەندە کریا، کە بۆ بە بنەماو واوەی بونیادنیایوەی سیستمی. ئەگەر ئارۆ سەرباروو گردوو هجووم  و هەڕەشەکا هەڵوێست و شێوازوو کۆشیایی گەشمەرڎا بە نموونە گێرمێ، سەرگنمێ.