بە بۆنەو ٢٥ ساڵوەگێڵوو پیلانگێڵنیی میاننەتەوەیی ١٥ شوباتی، دژوو ڕابەروو گەلوو کوردی عەبدوڵا ئۆجالانی. ئەندامەو کۆردیناسیۆنوو کۆنگرەو ستاروو کانتۆنوو عەفرینی و شەهبای فەریدە ئیبۆ پەی ئاژانسوو هەواڵوو فوراتی (ANF) قسێش کەردێ.

'ویرۆکەو ئازادیی کوردستانی فاڕیۆ پەی ویرۆکەو ئازادیی گردوو جیهانی'

ئەوەڵوو قسەکاشنە فەریدە واتش: "چند ڕوێوە تەر ساڵوەگێڵوو پیلانگێڵنی میاننەتەوەیی ١٥و شوباتین، کە دژوو ڕابەروو گەلوو کوردی عەبدوڵا ئۆجالانی کریا. تارێخوو ئی پیلانگێڵنییە وەڵتەرێنە بەرکەوتەبێ. حەوڵێ دەوڵەتە بەرژەوەندیوازا ئارانە بێ پەی ئاستەنگکەردەی، فکر و فەلسەفەو ڕابەر ئاپۆی، کە پەی ئازادیی گەلوو کوردی و وەرکەوتوو دلێڕاسەی بەخشابێ. پەوکای ئانە کە موینمێش ئا هەوڵێ گرد بەتاڵێ بیێنێوە. وەروو ئانەی فکروو ڕابەر ئاپۆی ئازادیی کوردستانیش فاڕا پەی ئازادیی گردوو وەرکەوتوو دلێڕاسەی. پەوکای تا گەلوو کوردی ئازاد بۆ، مشۆم گەلوو تورکمانی، عەرەب و گردوو گەلای تەری ئازاد بۆ. پا مانێ فکروو ئازادیی کوردستانیش فاڕا پەی فکروو ئازادیی گردوو گەلا. وەروو ئانەی ئی فکراو ڕابەر ئاپۆیە دژوو بەرژەوەندییەکاو دەوڵەتە میاننەتەوەییا بێ، سەروو ئی بنەمێ دەوڵەتێ جە ڕاو هەواڵگێرییەکاشاوە هەوڵێشا دێ وەر بە وەڵابییەیۆ فکروو ڕابەر ئاپۆی گێرا".

'چالاکیی هامڕا ڤیان سۆرانێ دژوو پیلانگێڵنی بی بە نموونە'

ئیبۆ ئاماژەش پانەیە دا پەی ڕاگێریکەردەی جە قۆمیای جەنگی دا، ڕابەر ئاپۆ سوریاش جیا ئاست و واتش: "ڕابەرێتی بە هومێدوو ئاشتییوە لوا چندین دەوڵەتا، وەلێ بەداخۆ دەوڵەتێ خێرامایشا نەکەرد و دماجار ١٥ شوباتینە ڕابەر ئاپۆ گیریا و ئێشێ فرە گەورەما چەشت و هاڵیگاێوە گەورەش دلێ دڵوو گەلوو کوردی و خەباتکارانە وەش کەرد. دژوو پیلانگێڵنییەکەی چالاکیی جۆراوجۆراو کریا، ئی چالاکیێ جوابێ بێ پەی دەوڵەتە پیلانگێڵنا و بەتایبەت دەوڵەتی ئەرەگیرکەروو تورکی. چندین هامڕێ ژەنێ و گەنجێ چا قۆناغەنە پەی ڕابەر ئاپۆی چالاکیی گیانفیداییشا کەرد و گڕەشا وەنەو جەسەشا وەر دا. گیانفیدایی هامڕا ڤیان سۆرانێ بی بە نموونێوە پەی هێزوو ژەناو گەلوو کوردی".

'گردوو ئامانجەکاما ئازادیی جەسەیی ڕابەر ئاپۆین'

ئەندامەو کۆردیناسیۆنوو کۆنگرەو ستاروو کانتۆنوو عەفرینی و شەهبای فەریدە ئیبۆ ئاخرۆ واتش: "پیسە جمیەروو  ئازادیی ژەنا، هەرێموو شەهباینە خەبات کەرمێ. حەرچندە زەحمەتی و فشارما سەربێ، کەسانێوە خەباتشا کەرد چی  بوارەنە، بیێ بە نموونێوە و یاوای بە شەهادەتیشا، گرد وەختێ ڕاما ڕۆشنە کەراوە. سەروو ئی بنەمێ ئازاردای جەستەیی ڕابەر ئاپۆی و ئازادیی ژەنا یۆنێ. پەوکای ئێمە سەر وو خەتەو ژەنە سەرمەشقاما ساکینە، لەیلا، ناگیهان، زیلان، ئارین، ئاڤێستا و بارینێ ملمێ و کۆشیایما بەرزتەر کەرمێوە. ئانێ هەرمانە و خەبات کەرا حیچ وەخت مەمانیا. گردوو ئامانجیما ئازادیی جەستەیی ڕابەر ئاپۆی و ئازادیی گردوو ژەنە چەوسیاوان. سایێ پارادایموو ڕابەر ئاپۆیۆ شۆڕشوو ئازادی ژەنا بییەن بە شۆڕشێوە جیهانی و سەرچەمەو وێش ڕابەرێتیوە ورگێرۆ".