ئەنداماو شاندو ئیمراڵی پارتو یەکسانی و دیموکراسی گەلا (دەم پارتی)، پەروین بوڵدانە و مەتحەد سانجار پېوەس بە پرۆسەکەیۆ ئارۆ چنی سەرۆکو پەرلەمانو تورکیای نوعمان کورتولموشی گلېرې بیێوە. گلېرۊبیەکەی دوور جە چەمې ئەرەیاۋناکا نیم سەعاتش خواینا، دماو تەمامبیەو گلېرۊبیەکەی کۆنگرېوە ڕۆنامەوانی بینیا.

'گلېرۊبیەکەیما ئەرێنی بې'

جە کۆنگرە ڕۆنامەوانییەکەنە پەروین بوڵدانە دەربارەو گلېرۊبیەکەی قسێش کەردۍ و ئینەش وات: " جە گلېرۊبیەکەینە بە مەڵامەتو هۊرچنیەیشۆ بە سەرۆکو پەرلەمانی مبارەکبایما جە ئېژا سەرۆکو پەرلەمانی نوعمان کورتولموشی کەرد، چنیش ئاستو ئیساتې پرۆسەو ئاشتیما هۊرسەنگنا، گفتوگۆی وردما جە بارەشۆ کەرد و پەیلواکێما فاڕێوە. بە گرڎیی سەرۋنەداکەیما کە نیم سەعاتش خواینا فرە ئەرێنی بې."

'پرۆسەکە یاوان بە قۆناغێوە گرنگ'

پېوەس بە وردەکاری گلېرۊبیەکەی و قسەکەردەی سەرو پرۆسەکەی پەروین بوڵدانە ئینەش وات: "ئا خێرئامەییەی کورتولموش نیشانەش دایمې گرنگا، سوپاسش مکەرمې. جە ئایندەنە گلېرۊبیەی زیاتەرما بۆ. ۋەروئانەی پرۆسەکە پڕانۆ پەی قۆناغێوە گرنگی. جە ڕوانی ئایندەنە قسې زیاتەرش جە بارۆ مکەرمې، بەڵام پەی ئیساتۍ ئانەی متاوو واچوش ئانەنە؛ پرۆسەکە یاوان بە قۆناغێوە گرنگ."

دماو گلېرۊبیەی چنی ئەردۆغانی و باخچەلی سەرۋنەو ئیمراڵی مڎەیمې

جە بەردەوامینە پەروین بوڵدانە ئەرەیاۋناش پېسە شاندو ئیمراڵی چنی ئەردۆغانی و باخچەلی و ئۆزەلی کوې باوە و دماتەر ملانە ئیمراڵی و ئینەش وات: "فرە گرنگا ئی پرۆسە سەرو زەمینەو دیالۆگی و پەرلەمانی پەرەش پنە بڎریۆ.چی دووە حەفتەی ئایندەنە سەر ۋنەو ئېژا باخچەلی، ئۆزگور ئۆزەلی و سەرۆککۆمار ئەردۆغانی مڎەیمې و دماو ئا گلېرۊبیا، جە ئیمراڵینە چنی ئېژا عەبدوڵا ئۆجالانی دیدار ئەنجام مڎەیمې."

کۆمیسیۆنو پەرلەمان

دماتەر مەتحەد سانجاریچ پېوەس پا کۆمیسۆنەی جە پەرلەمانەنە دەربارەو پرۆسەکەی پێکمې قسێش کەردې و واتش: "ماوێوە فرەن قسې جە بارەو ئانەیۆ مکریۆ پەی ئانەی ئی پرۆسە بە بەشداربیەی و پاڵپەشتی کۆمەڵایەتییوە بلۊڕاوە، جە ڕاو ئاشتینە پەنەوازا هەنگامەی بەهێزتەرە بنریۆ و پەرلەمان ئەرکو ۋێش جابەجێ بکەرۊ. داواو ئێمەیچ هەر ئینە بیەن. چی مژارەنە هەنگامەی هەرە کاریگەرە پێکئاوردەی کۆمیسیۆنێوەن جە پەرلەمانەنە. چی مژارەنە ڕای گرڎیی و پارتە سیاسییەکێچ کۆکێنې سەرش."