چن مانگێوە دما بەدماو ئەرەیاۋنای ڕزگار بیەو، کۆبانێ جە سەرسەعبێوە ئێجگار تاریکەنە بەئاگا ئاما، جە ٢٥ حوزەیرانو ٢٠١٥ ینە داعش خەڵکی مەدەنیشا کەرڎ ئامانج، ڕزگاربیا کۆمکوژییەکەی ئا ڕوەیە بە 'ڕوێوە تاریک' نامې بەرا کە پەی هەمیشەی جە یاڎەوەریشانە مەنۊوە.
دما و ئازاد کەردە و شارو کۆبانێ جە ٢٦ کانونو دووەمو ٢٠١٥ ی دما و مڏرامانێ تاریخی ١٣٤ ڕووەی، جەنگاوەرا یەپەگەی و یەپەژەی مڏرامانێ داستان ئامێزشا جە شارەکەنە تۆمار کەرد. داعش کە یۆن جە گۆرەتەرین ڕێکوزیا تیرۆرستییەکا جەهانی جە کۆبانێنە توشو شکستێوە گۆرەی بی. بەڵام چەتەکێ ئی شکەستەشا پنە قبوڵ نەکریا، پۆکەی سەر سەعبو ٢٥و حوزەیرانو ٢٠١٥ ینە جارێوە تەر خەڵکی مەدەنیشا کەرد ئامانج و کۆمکوژیشا ئەنجامدا.
داعش سەرەتا هرووژمش کەرد سەر و دەگا و بەرخ‌بۆتانی و دماتەر بەرەو کۆبانێ لوا و کۆمکوژییێ وەرفراوانش جە شارەکەنە ئەنجامدا. کە دلێشەنە بە سەدان هاموڵاتیێ مەدەنیێ بیێ ئامانج، هەرپاسە ژەنی و زاڕۆڵێ و بەتەمەنێ بە شێوێ دڕندانە کوشیێ.
شێخ عەدلانە، کە یووەنە جە شایەتحاڵەکا کۆمکوژییەکەی، دەربارەو ئا کاتا کە دلێشەنە ژیوێنە پەی ئاژانسو هەواڵو فوڕاتی (ANF) قسێش کەردێ. عەدلانە کە ئەرەنیشتې دەگا و زیارەتینە، ساڵە و ٢٠١٤یۆ تەوقە و کۆبانێ دەسش پنەکەردەن، شایەتەو ئەوەکۆشای گەلی بیێنە کە چنین وەرگیریشا جە شارەکەی کەردەن، ماچۆنە سەرسەعبو ٢٥و حوزەیرانی یۆ بێ جە ڕووە پەڕ ئێشەکا.
عەدلانە واتش"سەر سەعبو ئا ڕۆیە بە دەنگو ئەوەتەقایۆ هایما بییۆ، جە گرڏ لێوە دەنگو تەقەکەردەی ئێ، یاوایمێنە چێش ڕووەمڎۆنە، کاتێ لوانی بەر دووێ تڕۆمبێلێ پەڕ جە چەکدارێ ویەردێ لامەرە، بەڵام نەزانێنا کێنێ، دەسم بە هێماو سەرکۆتەی بەرزکەردۆ، بەڵام دما و لوای چوەریشا پەی خەسەخانە و مشتتەنووری، پەیم بەر کەوت کە چەتەکێ داعشینێ".
عەدلانە و خێزانەکەش تەرسێ گۆرێنە بێنێ. چەتەکێ چواردەورو یانەکەیشا گەمارۆ دابێ. کوڕەکەش هەوڵشدا بە تەوەرێوە کە جە دوکانەکەو وێشەنە ئاردەبێش، دیوارو یانەکەیشا وڕنۆنە و خێزانەکەیش ڕزگار بکەرۆ.
هەرپاسە واتش "چەتەکێ بەرە و یانەکەیشا ماڕا و ئامێ چووەر، ئا کاتە هامژینەکەم سەر و یاگێوە نیشتەبێرە، ئاڎێ داواو ئاوێشا چنە کەردانی و منیچ دێم پنە، دماتەر پنەشا واتانی کە نەلمێ بەر، خوا یارمەتیش دایمێ و چا دەقەنە ڕزگارما بی، دماتەر دیوارو یانەکەیما ماڕا و بڕەمایمێ بەرەو وەرکەوتوو شارەکەی. جەنگاوەرێما وینې پنەشا واتیمێ بەرەو وەرنیشتوو شارەکەی بلمۍ. ڕانە بێنمێ زانام کە وەیوەکێم زامڏارە بییێنە و هەڤاڵا پەی چارەسەرکەردە ی ڕەوانەو سەرنیشتوو کوردەسانیشا کەردێنە."
عەدلانە جە دما دماین و قسەکاشەنە واتش: "ئا ڕووە پەی ئێمە تاریکتەرین ڕۆ بێ، تەنانەت ئەر سەڎ ساڵێچ ویەرۆنە هەرگیز ئا ڕۆیە جە یاڏ نمەکەرمێ، ونی پێسە و لافاوی مجیا ئێمە ڕزگارما بی. بەڵام پەی هەمیشەی زامێ ئینا دلێمانە و ساڕێژ نمەبۆنە".
