بە سەرمەشقایەتی پارتو هەرێمە دیموکراتیکەکا (دەبەپە) ی پارتو یەکسانی و دیموکراسی گەلا (دەم پارتی) جە ناوچەو یەنیشەهیرو ئامەدینە جە مێڏانو ئیستاسیۆنی گلێرۆبییەی " ئازادی پەی ئاشتی" ئەنجام مڎریۆنە. پەی بەشداربییەی جە ڕاپیماکەینە بە هەزاران کەسێ جە هاموڵاتییا ئامەدی و شارەکا تەرو سەرنیشتوو کوردەسانی کەوتێڕا و بەشدارێ بیێ.

جە مێڏانو گلێرۆبییەکەینە درووشمەکا "چارەسەرو دیموکراتیکی پەی ئایندێوە ئازاد"ی، "ڕاو چارەسەری دیموکراتیکو ئازادیی" و "ژەنی ژیوای ئازادی" ماچاوە.

جە گلێرۆبییەکەینە هامسەرۆکا دەم پارتی، هامسەرۆکەو گرڏی دەبەپەی چیدەم کلچگون ئوچارە، چالاکێ تەڤگەرو ژەنە ئازادا (تەژەئا) و ئەڏێیاو ئاشتی قسێ مکەرا.

هەرپاسە هامسەرۆکەو گرڏی دەبەپەی کەسکین بایندر، پەڕلەمانتارا دەم پارتی و جەهەپەی و هامسەرۆکاکا شارەوانی ئامەدی و ناوچەکێش بەشدارێ بانە.

چنی وەرفراوان بییەو گلێرۆبییەکەی بە هەزاران کەسێ درووشمو "ژەنی ژیوای ئازادی" ماچاوە.

دماتەر هامسەرۆکو ڕێکوزتەی ئامەدی دەم پارتی عەباس شاهین قسێش کەردێ و واتش: "با ئی مێڏانە بۆ بە مێڏانو ئاشتی، کات کاتو ئاشتین. بەیدێ پێوەرە بە خەباتو هامبەشیما ئاشتیێ شکۆدار بنیاد بنیەیمێ."

دماتەر چالاکوانو تەژەئای چاغلار دەمیرەڵ قسێش کەردێ و واتش: "ئازادی گلێرگە و ژەنا جە ئازادی عەبدوڵا ئۆجالانینە وینمێ. وەرو ئینەی جە وەرکەوتوو مییامینی، جە تورکیا و جەهانەنە گرڏ ڕوێ ژەنی گەشمەرڏێ کریۆنە. هرووژمەکێ سەرو ژەنا زیاشا کەردەن. دۆڵەت-نەتەوە، ئەرەگیر و زیهنیەتو پیای گرڏ ڕوێ ژەنی گەشمەرڏێ مکەرۆ، بەڵام ئێمە و ژەنا ئاشتییما گەرەکا، گرڏ کاتێ گرڏ یاگێنە  پەی ئاشتیی و ئازادی ماچمێنە "ژەنی، ژیوای، ئازادی"

واتیشش: "ئاشتییما گەرەکا، دیموکراسی و ئازادییما گەرەکا. هەرپۆکەی وەڵێ گرڏ چێوێ دان بە ستاتۆو وەرنیستینە نسۆم نریۆنە. چونکە وەرنیشت پەی جەهانی نمونەن. تەژەئای جە گرڏ یاگێنە سەرمەشقایەتی مکەرۆ. پەی ئاشتیی و یۆبییەی گەلا سەرمەشقایەتی مکەرۆ. گەلوو ئامەدی و ژەنا کوردی ئاشتی و دیموکراسیشا گەرەکا. وەڵێ گرڏ چێوێ مشۆم گۆشەگیری سەرو ڕابەرو گەلوو کوردی ئێژا ئۆجالانی هورگیریۆنە، پەی ئازادی ڕابەر ئاپۆی ئینایمێ مێڏانەکانە. ئازادی نزیکا، ئازادی ڕابەر ئاپۆی نزیکا".

کاتو قسەکەردەی چاغلاردێنە جەماوەر چن جارێ پێ مردای دروشمو "بژیوۆ سەرۆک ئاپۆ"، "ژەنی، ژیوای، ئازادی" و "بژیو مڏرامنو وەرنیشتی" بەرزکریاوە.