شاروو دراگینیەنوو فەرەنساینە بە سەرمەشقایەتیی گەنجاو کوردستانی فەڕەنسانە (جەکەفە) ڕاپیماێوە ساز کریا. ماوەو ٤٠ مانگان هیچ هەواڵێوە ڕابەروو گەلوو کوردی عەبدوڵا ئۆجالانی نییەن و گەنجێ چا ڕاپیامەیەنە بەتندی گۆشەگیریی ئیمراڵییشا شەرمەزار کەرد. هەرپاسە گەنجێ هجوومە ئەرەگیرکاریکەرییەکاو دەوڵەتوو تورکی فاشیستیشا پەی سەروو پانیشتوو کوردستانی و خەتەو خیانەتوو پەدەکەیشا بەنەفرەت کەردێ.

ڕاپیمایەکە دراگینیەن لاپۆستۆ دەسش پەنە کەرد و تا بیناو پارێزگاری بەردەوام بی. سەرەمڕ دروشموو "بژیۆ سەرۆک ئاپۆ" و بە فەڕەنسییچ دروشموو ' ئازادیی پەی ڕابەر ئاپۆی" وچیاوە. جەماوەرەکە وەردەموو بیناو پارێزگاینە، چالاکییەکەشا فاڕا پەی جەمۆبییەی و ئەوەڵ پەی ڕێزگێرتەی جە یادوو گەشمەرداو کوردستانی دەیەقێوە بە بێدەنگی مدرێ و دماییچ ئەرەیاونایشا واناوە. بە نامێ گەنجاوە ئەرهان کۆپ ئەرەیاونایەکەش واناوە و ئاماژەش پانەیە کەرد، " تا گۆشەگیریی سەروو ڕابەر ئاپۆیوە مەڕنیۆ، پێسەو گەنجاو کوردی ئەوروپانە بەردەوام مەیدانەکانە بیمێ. چارەسەروو گردوو کێشەکا وەرکەوتوو دلێڕاسەینە ڕابەر ئاپۆن".

ئەرەیاونایەکەنە ئاماژە بە هجوومەکاو دەوڵەتوو تورکی فاشیستی پەی سەروو پانیشتوو کوردستانی دریابێ و ئامابێ: "دەوڵەتوو تورکی ئەرەگیرکاری پانیشتوو کوردستانینە تاوانوو جەنگی مکەرۆ، بەبێ ئانەیە یاسای میاننەتەوەییێ بشناسۆ، خەڵکی یانەکاشانە بەر مکەرۆ. سەرباروو ئانەیە هیچ مافێوەشا نییەن، خاڵەو وشکنای و بازگە بنیارە. مشۆم گەلوو  پانیشتی هورزاوە سەروو پایا و دژوو ئانەی هەڵوێست برمانا".

چالاکییەکەنە پلاکاردێوی بەرز کریاوە کە بەفەڕەنسی سەرشۆ نویسیابێ "نا پەی ئەرەگیرکاری دەوڵەتوو تورکی" و "ئازادیی پەی عەبدوڵا ئۆجالانی" و هەرپاسە پۆستەرەکاو ڕابەروو گەلوو کوردی عەبدوڵا ئۆجالانی بەرزێ کریێوە.