سیاسەتمەدار و ئەندامو کەنەکەی دکتۊر محمەد ئەمین پێنجوێنی ئاماژەش پانەیە دا؛ دەوڵەتو تورکی چەنی ئێران و عێراقی ماوەو یەرۍ ساڵان ئینۍ ئامزاڎەکاریی هجوومینە دژو گەلو کوردی، ئامایی ئەردۊگانیچ پەی پانیشتی و عێراقی چوارچوەو ئامزاڎەکاریی ئا هجوومینە دژو کوردا.

سەرو دۊخوو ئیسەی و ئامزاڎەکارییەکاو دەوڵەتو تورکی و هامکاری و چەمساقییەکاو پەدەکەی پەی هجوومکەرڎە سەرو گەریلاکاو ئازاڎیی کورڎسانی، سیاسەتمەدار و ئەندامو کەنەکەی دکتۊر محمەد ئەمین پێنجوێنی پەی ئاژانسو هەواڵو فورات (ANF)ی قسێش کەردۍ.

ئەوەڵو قسەکاشنە پێنجوێنی سەرنجەش وستە سەرو هەڵوێستو وەزارەتو وەرگێریی عێراقی، کە بە تورکیایش واتەن نمەلانۍ دلۍ هجوومو دژو پەکەکەیوە و واتش: "چون عێراق ئەرەیاونانش، پەکەکە عێراقنە نیا دلۍ لیستو تیرۊرینە، پەوکای ئێمە پەکەکەی پێسەو تیرۊرسێوی تەماشە نمەکەرمێن. هەرپاسە یەنەکە و سەرۊکو یەنەکەی بافڵ تاڵەبانی و چندین پارتۍ سیاسیۍ بە ئاشکرا واتەنشا بەشداریی جەنگو تورکیای دژو پەکەکەی نمەکەرا. چونکوم پەکەکە نیا هەرێمو یەنەکەینە."

'ئێران گەرەکش نیا سوپاو تورکو ئەندامەو ناتۊی نزیکۍ سەرحەدەکاش باوە'

بەرڎەوامیی قسەکاشنە پێنجوێنی باسش جە هەوڵدایەکاو دەوڵەتو تورکی کەرد پەی پەیداکەرڎەی هامکاری و هامبەشی جە جەنگو دژو کوردانە و واتش: "تورکیا داواش وەنەو ئێرانی کەردێنە هەمان وەختەنە هجووم بکەرۊ سەرو پژاکی، بەڵام ئێرانی ڕەت کەرڎەنۊ. ئێران گەرەکش نیا سوپاو تورکو ئەندامەو ناتۊی نزیکەو سەرحەدەکاش بۊوە، پەوکای پەشتگیری نمەکەرۊ، دۊخەکە تا ئیساتۍ چینەنە. چی پەرسینە هەڵای ئەرەیاونیای ڕسمی نەدریان، بەڵام بە پاو قسەوباسی سیساسەتمەداراو پانیشتی بۊ، باڵێو دلۍ پەدەکەینە لایەنگێرۍ ئانەینۍ کە پەدەکە بەشدارو جەنگو تورکیای بۊ دژو پەکەکەی. بەشێوی تەرشا ئانەیە بە خاس نمەزانا.

بەڵام گەلو پانیشتو کورڎسانی ئی هجووما، هجوومو هێزێوی کوردی بە سوپاو تورکیوە پەی سەرو قەندیلی قبووڵ نمەکەرۊ و دژش مدرۊوە، ئی جەنگە مبۊ بە کارەساتێوی گەورە. دۊخێوۍ چینەنە گورزی ئەوەڵ وەروو پانیشتو کورڎسانی مگنۊ. گەر هێزێوی کوردی، بۊ بە چەمساقو تورک و جەنگو هێزێوی تەرو کوردی بکەرۊ، ئانە دۊخێوی کارەساتاویین پەی کوردی، چێوە جەنگەکە جە جەنگو تورک و کوردیوە مفاڕیۊنۍ پەی جەنگو بەینو کورد و کوردی. نوێنەراو گردو پارتە کورڎسانییەکا بەشدارۍ کۊبییەیۊکاو کەنەکە بێنۍ، پەیام و داواو ئانەیشا دا، کە هیچ هێزێو پانیشتو کورڎسانینە هامکاریی هجوومەکاو سوپاو تورکی نەکەرۊ وەراوەر بە گەریلاکاو ئازاڎیی کورڎسانی."