جارێوەتەروو جە ماوێوە کەمەنە ئێر جە بازاڕوو لەنگەو هەولێرینە کەوتۆ و پا مەڵامەتۆ دەیان دوکانۍ سۆتۍ و گروپێوە نەتەوە پەرسوو تورکی ئیجارەیچە سۊچنای بازاڕەکەیش گېرت ئەستۆ و تا ئیساتێچە ۋەرپەرسا حکومی چا بارۆ بێدەنگېنۍ.
سەرسەعبوو ڕۊو دووەشەممەی پەی دووەم جاری جە ماوەو کەمتەر جە دووۍ مانگانە ئێرێوە گەورە جە بازاڕوو لەنگەو هەولێرینە کەوتۆ و پا مەڵامەتۆ ٦٠ دوکانۍ سۊتۍ و زەرەروو چن ملوێن دۆلارێچ ۋەروو کاسبکارا ئا بازاڕیە کەوت.
هېزی شەوۍ دێرۍ گروپێوە نەتەوەپەرسوو تورکی بە نامۍ "رێکوزیاو پەیمانوو میللی" ئەرەیاۋنېوەش جە بارەو کەوتەیۆ ئاێرەکەو بازاڕوو لەنگەو هەولێری جە ئەستۆ گېرت و ئەرەیاۋناش: “ئێرما جە دڵوو کوردە ترسنۆکەکا ۋەردا، جە ١٦ یاگێوە ئێرما ۋەردا بازاڕەکەی و دلێمانە بەرد”.
ئینە جە وەختێنە، وەڵتەر ئێر جە هەریۆ جە بازاڕەکا ئەحمەد ئاغاینە جە کەرکووک، لەنگە هەولێرەنە و چەلێ جە دهۆکەنە، کەوتۆ، هەر دماو ڕووەداکەی، ئا گرووپە تنڕەوە جە یەرۍ ئەرەیاۋنێنە ۋەرپرسیاری ۋێشا جە سۊچنای هەریەرە بازاڕەکەینە ئەرەیاۋنا و ئاماژەشا پانەی کەردەن، “سنوورەکاو پەیمانی نیشتیمانیی هۊرگێرمۍ”، کە(مەبەسشا جە زینڎەکەردەیۆ میساقی میللیی دەوڵەتوو عوسمانین).
تا ئیساتێچە دەسەڵاڎدارا هەرێموو پانیشتوو کوردسانی، هیچ ڕۊشنکەردەیۆشا جە بارەو ئا ئایرا و ئەرەیاۋناکاو ئا گرووپەیۆ نەڎان، جە وەختێنە ئا گرووپە جە هەڕەشەکاشا بەردەوامېنۍ و ماچا: “مشۊم وەزارەتوو پێشمەرگەی هۊرشێویۆوە و بۆ بە بەشێ جە سوپاکېما”.
