هەڵمەت دیرلووك، وێش بۊ بە ئەفسانە و بە كاوەی هامدەم، لە دێرەلووكنە پەیدا بۊ و پەی پارێزنای نیشتیمانی گیانیش بەخت مکەرۊ. هەڵمەت شاهین، گەورە پێسە گەورەیی ڕۊی و مانگۍ. بە گەورەیی هەست و هومێدەکاو زارۊڵاو كورڎسانی.
كاوە تاکور، ئشناسیا بە "هەڵمەت شاهین"، نامۍ گەریلێوی گەشمەرڎەی، كە ورگێرو حەقیقەتی و پێناسەو دوۍ فەرماندا و دوۍ شۊڕشگێڵنا. یۊشا پانیشتو وەڵاتینە و ئەوی تەر سەرنیشتو دڵی و گیانینە. هەڵمەت ـ شاهین سرڎەو بەستەیوە دووۍ پارچا جەسەو نیشتیمانی لتلەتکریاکەو وەڵاتو ڕۊین. خەتێو جە ژیوای و مدرامان و وێگیریی جە قۊناغو جەنگو شۊڕشگێڵنیی گەلینە. هێز و مۊڕال و ورە جە هەڵمەتە و قوربانینە و شاهین ئاسا کەشەکاو وەڵاتی و ژیوای گەریلایەتیی مکەرۊ بە هێلیانەو ژیوای ئازاڎی و وێگێری و مەنەیۊ و بییەی.
بە زانایی و دانایی ژیواێوە ورمچنۊ، كە تاویایۊ ڕۊحی و جەستەی و هەستین دلێنە. هامڕا هەڵمەت شاهین دێرلووك، ئیتر بییەبۍ بە یەرۍ ئەفسانۍ تاریخیۍ ئینسانی و پا هەست و نەستۊ وە ملۊ جەنگی ئەهریمن ئاساو هامچەرخەكەو ڕۊزگارو ئارۊیماوە.
ونگەرم، عەینو گەرمایی دڵو ئەدا جەرگسۊتاو كورڎی. ونگەرم، پێسەو باوشەو خوداوەند ستێرك و مامانیکەرڎەیش پەی تارێخی و گەورەیی ئینسانی. ونگەرم پێسەو بۊركانو ئاراراتی و جوودی. سەركەش و سەربەرز، هامچەشنو فەرماندە هەڵمەتی و فەرماندە شاهینی.
هەڵمەت دیرلووك، وێش بۊ بە ئەفسانە و بە كاوەی هامدەم، دێرەلووكنە پەیدا بۊ و سەرو پارێزنایی نیشتیمانی گیانیش بەخت مکەرۊ. هەلمەت شاهین، گەورە پێسەو گەورەیی ڕۊجیاری و مانگۍ. گەورەیی هەست و هومێدەکاو زارۊڵاو كورڎسانی. هومێدبەخشو هامسەنگەرا پەی بۊ دماڕۊی و ورسوڕیایا هامچەشنو وای ڕوەو ولێرە، ناسك ناسك، پەلۍ مگێرۊ و خونچۍ مدۊ وەنە و بۊ بە جمنەرەو چەرخەكاو تاریخو كۊشیای هامچەرخەكەو كورڎی. كۊشیاێو پەی ئازاڎی و سەربەسی. پەی نەمری و مەنەیۊ کەشو شەهادەتی بۊ بە هامكارەوانو گەشمەرڎاو وەڵاتو ڕۊی.
هامڕا هەڵمەت شاهین؛ جە زارۊڵەییوە. بەئاووهەوای سەرڎو کەشا گۊش كریابۍ و بە سەماو پەپوولەكا و ڕۊشنایی هەسارەی و مانگۍ و وەرەتاوی سەرچۊپیی ژیوای و سەركەوتەی گەریلای نزیكۊ هەست پەنە کەرۍ.
هامڕا هەڵمەت شاهین؛ عەلەمەو ئەرەپڕای دەسو دەروازەو ئەرەپڕای ٩١و ڕانیەیۊ ورگێرۊ و بەرۊشۊ هەرێمو بادینانی و دێرلووك و ئامێدی. ئەگەر هیزی ڕانیە دەروازەو ئەرەپڕای پانیشتو وەڵاتی بۊ وەراوەرو ڕژێمو بەعسی، ئارۊنە دێرەلووك عەلەمەکۍ ورگێرۊ و بۊ بە دەسەواڵۍ ئەرەپڕای و دەروازەو هومێدی.
هەڵمەت شاهین؛ هەڵمەت ئاسا و هەقسان، گەرەکشا هەمیشە بەرزیینە هامچەشنو شاهینی بژیوۊ. بە گەورەبیییەی؛ ماناکاو ژیوایش گەورۍ و گەورەتەرۍ مبانۍ. بە قوەو مانۍ و وێبونیادنیای ورکێشیۊ. هامشانو هامڕای گەورە مبۊ، مبۊ پا چڵۊسکۍ كاوەی ئاسنگەری و سەنگەر بەسەنگەر و پەشت بەپەشت بۊ بە سکەڵ، مەنتێقەو بادینانی و عەلەمەو پارێزنای شكۊو كورڎسانی بادینانۊ مگەشیۊوە.
هامڕا هەڵمەت چندە عومرنە گولانەن، بەڵام ویر و ویرۊکەرڎەی و خولیێکێش گەورێنۍ و پێسەو فەرماندێوی بەرمگنۊن. وەشکەرڎەی ماكێتو دوشكای سەروبانو یانەکەیشۊ و بەرڎەوام و گۊرانییۍ گەریلاكاو ئازاڎی و دروشمەكاشا مواچۊوە و بە هەست و ڕۊح چەنی گەریلای چا عومرە كەمەشنە ژیوان و بە ویەرڎەی وەختی، خولییێکێش گەورۍ بیێنۍ، تا كە بە جەسەیچ دلۍ ڕیزەكاو گەریلاو ئازاڎیی كورڎسانینە وێش موینۊوە.
هامڕا هەڵمەت دێرەلووك، ژیوای فەرماندە و چەنەئامایا و قارەمانا و فیداییا و گەریلا گەشمەرڎا پێسەو سیمبۊلو كۊشیای ورمچنۊ و پا ڕۊحەوە پا منیۊ مەیدانو گەریلای و جەنگی شۊڕشگێڵنیی گەریلای پێسەو بەرڎەوامیی سۊز و وەعد و پەیمان و دۊزو گەشمەرڎا ورمچنۊ و چەك و تاقمو ئادیشا ورمگێرۊ و پا ورە و وزەوە جە گەشمەرڎا و ڕابەراتیوە ورشگێرتەن، هەڵمەتە بەرۊ سەرو دوژمنی و تارومارشا مکەرۊ.
هامڕا كاوە تاکور؛ ئا هەستە پەنگوارڎەو ناخو تاك بەتاكو بادینانی بەتایبەتی شێلادزۍ و دێرەلووك و ...هتدین. ڕۊحو هەقۊساناین جە جەندرما و جاشا و وێورەشا و بەكرێگیریایاو دەوڵەتی ئەرەگیركەرو توركی. ڕۊحو گەنە تووڕا و وەڵاتپارێزناو دەڤەرو بادینانین، كە حیچ وەختێو سەرشۊڕی و دەستەمۊبییەیشا قبووڵ نەكەرڎەن و بەئازاڎی ژیوێنۍ. هەستو وەڵاتپارێزنی و وەشەسیای وەڵاتی لاو تاك بەتاكو گەلەكەیماوە چا یاگانە مگێرۊ كۊڵۍ و ئا هەست و ئیرادەیە میاونۊ قەلاپۊپە.
چاند و كەلتوورو مدرامانو گەلەكەیما بادیناننە و ئیرادەو وێگیری و وەشەسیای نیشتیمانی تێكەڵ بە ژیوای و ونێشا بییەن. ئانە ئەگەر زاڕۊ بۊ یا پیر و كاڵ، هەرڎویشانە ڕۊحی پەنگوارڎەو گەشمەرڎە سادق عومەریشا دلێنە شارتەنۊ. ئانە چاندو مدرامانین، كە ئامێتەو ونۍ و پێشا و دەمارەكانشا بییەن و كەس نمەتاوۊن بسڕۊشەوە. ئەگەر چی پەدەكە گەرەکشا ئا ڕۊحە یاخی و سەركەش و تەسلیمنەبییەیە، بارۊ چۊکێرە، بەڵام بادینانی هەمیشە سەربەرز كۊڵ نمەدۊ و پەی دەسوستەی ئازاڎی و ڕوومەتی و كەرامەتیشا و وەڵاتەكەیشا چندە قوربانیی بدانۍ، سەرەشا پەی حیچ دەسەڵات و هێزێو نمەکۊمنارە. هامڕا هەڵمەتیچ سەرو ئا كەلتوورەیە پەیدا مبۊ و باڵا مکەرۊن.
هامڕا هەڵمەت دێرەلووك، مزانۊ ئەگەر نازنامۍ هامڕا هەڵمەتی هورگێرۊ، ئانە مشۊم خاوەندارێتیی جە نازنامەکۍ بکەرۊن. ڕاسیینە هامڕا هەڵمەت شاهین، ئا پەیامە داش بە دۊس و دۊژمنی، كە كورڎسان داراو هەزاران هەڵمەتا و قوربانییان. داراو هەزاران شاهینان. یانۍ هامڕا هەڵمەت شاهین، ویر و قسۍ و پراكتیکش یۊنۍ و بە چالاكیی فیداییانە و نەبەزانەش پەی سەرچەتە و جەندرماو دەوڵەتو توركی ئەرەگیركەری سەلەمناش چالاكییش زوانحاڵو ویر و قسە شۊڕشگێڵنییە ئاپۊییان.
هامڕا كاوە ، شۊڕشگێڵنێو جە ڕەگەزو خاكی و بە مۊڕال و جۊشوخرۊش بۍ. پەكەكە و گەریلایچ یاگۍ گەنجا و شۊڕشگێڵنە چانیشان. بە هەرمانۍ زارۊڵانێوە تاکوری سەرقاڵی نمەکرۊن، وێش بە كێشەو جەنگی و مدرامانو وەڵاتی و گەلەكەیش و ئینسانیەتیوە سەرقاڵ مکەرۊ و كورڎساننە مبۊنە بە خەتەو كۊشیای و ڕێکوستەی ئیرادەی ئازاڎانەو تاك و گەنجی و گلێرگەی بەگرڎی.
هامڕا شاهین، بنەڕەتنە، كەسایەتیی وێش رێكوستە بۍ، خەتەو كۊشیای ئاپۊیینە بە باوەڕ و دڵ و گیان چەنی هزر و ڕێبازی شۊڕشگێڵنی و گەریلایەتیی ئاپۊیینە بییەبێوە یۊ. بەقووڵی هەستش پانەیە کەرڎەبۍ، وێش چەنی ئامانجەكاش کەرڎەبێوە یۊ و پەی سەروستەی ئا ئامانج و پلان و بەرناما بەجەسارەت و فیداكاریێوی گەورە و بەبۍ حیساب بەشداریی چالاكیی بۍ. چا ڕاسییەیچە بەئاگا بۍ، كە پەی سەركەوتەی و ئازاڎی بۊ، هزر و مەژگ و قسێش یۊ با و جو خەبات و چالاكیێوی یۊگێرتانەنە بەرۊشا ڕاوە. هامڕاێو و شۊڕشگێڵنێو بۍ، كە بە دروشمۍ نەژیوۍ، هزر و ویرۊکەرڎەی و چالاكییش یاونابۍ یۊی. كادرێو بۍ بەتەمامی وێش ڕێك وستە بۍ.
كۊشەر و شۊڕشگێڵن، تەنیا بە قسۍ نمەتاوۊ بیاوۊ بە ئامانجەكا، هەرمانەی سەرەكییەش سەرمەشقایەتیین، گەشمەرڎە هەڵمەت شاهین، واتش و هەم كەرڎش. سەرمەشقو خەتەو كۊشیای ئازاڎییش جە كەسایەتییشنە یاونابۍ یاگۍ. ژیوای ڕێکوستەیشنە، مەژگو وێش بە پلانۍ و بەرنامەوە سەرقاڵ کەرۍ. هەمیشە بە پلان و بەرنامە لوۍ سەرو هەرمانۍ و سەركەوتەی تاكە ئامانجی سەرەكییش بۍ. بنەكەوتەی و شكسش قبووڵ نەبۍ. ژیوای گەنجیی وێشنە و ژیوای ڕێكوستەینە، كەسایەتیێوی تا ئاخر بەدیسپلین و ساعیب كاراكتەرێوی گەوهەرییانە بۍ. بەنزیكبییەی و پاگێرتەیرە سەروو پیمانەی و پرەنسیپە ژیوای و ڕێكوستەیەکا، بی یاگۍ هومێدی پەی گرڎو هامڕایاش. وەشەسیای و حەزكەرڎەێوە پاسنە ژیوۍ.
گەشمەرڎ هەڵمەت شاهین؛ تەنیا ڕۊڵەو بادینانی و دێرلووك نییا؛ بەڵكوم ڕۊڵە و قارەمانو گەلێوی چل ملوێنۍ و ڕاو حەقیقەت و ژیوای ئازاڎو فەلسەفەو مۊدیرنیتەی دیموكراتیك و گەریلێوی هامچەرخ و گەشمەرڎەو ئینسانیەتین و هەمیشە دڵ و گیان و مەژگ و تارێخو گەلەكەیشنە بەزیندەیی مەنۊوە.
