بێریتان گونه‌شە، په‌رله‌مانتارەو مێردینوو پارتوو چه‌پی سه‌وزی ئەرەیاوناش، دماو ورچنیەی ١٤ ئایاریوە، ئیسەنە گرنگتەرینوو بابه‌ته‌كا لاو گه‌لیوە قه‌یرانی ئابووری، زینڎانییە نه‌وەشەکۍ و سیاسه‌توو كۊكوشكەرڎەی گلێرگەین.
په‌رله‌مانتاراو پارتوو چه‌پی سه‌وزی، كه دماو ورچنیەی ١٤ ئایاری خەریکۍ هەرمانۍ و چالاكییه‌كاشانۍ سەرنیشتوو كوردستانینە، گۊش جە داواكارییه‌كاو خەڵکی گێرا. یووە چا په‌رله‌مانتارایچە بێریتان گونه‌شەنە، په‌له‌مانتارەو بازنه‌و مێردینی.
گونه‌شە ئاماژه‌ش پانەیە كەرد، دماو ورچنیەی، قۊرتێوە سەرەکیی گلێرگەی قه‌یرانی ئابووریین. هه‌رپاسە بابه‌تێوە گرنگی تەر لاو گلێرگەیۊ، زینڎانیییە نەوەشەکۍ و ئا زینڎانیێنۍ، كه دماو ٣٠ ساڵا ئازادۍ نەکریێنۍ و واتش: مشۊم پەی ئا دووە بابه‌تا دەمودە‌س چاره‌سه‌ر وێزیۊوە.
گونه‌شە واتیچش: دماو ورچنیەی ١٤ ئایاری، بابه‌تێوە گرنگ لاو گلێرگەیۊ قه‌یرانی ئابووری و ئانەن، كه ڕوانە ڕووبه‌ڕووۍ به‌رزبییەیۊ نرخەو کەلوپەلی باوە، هاموەخت چەنی ئانەی كێشه‌كاو بنه‌یانەو زینڎانییا، جەنگ و ئاماره قورسه‌كاو جەنگی، بیێنۍ بابه‌تی گرنگ لاو گلێرگەیۊ، كه شۊنەو چاره‌سه‌ریرە پەی ئانیشا گێڵا. هه‌رپاسە پەرسا پەی سیاسه‌توو گۊشه‌گیری، كه گردوو زینڎانه‌كانە هەن چە پلانێوەتا هه‌نە؟. ئێمه سه‌رقاڵۍ ئا قۊرتا بیمۍ و گۊش جە داواكارییه‌كاشا گێرمۍ.
ئا په‌رله‌مانتاۍ پارتوو چه‌پی سه‌وزی ئانەیچش وست ڕووە، ئانۍ کە چەمش گنۊ پەنەشا ڕووبه‌ڕووۍ پاشێلكاریی فرەو مافه‌كاشا بیێنێوە، وەختۍ کوۍ بیمێوە، ئاماژه پەی ئانەیە کەرا، سیستمێوە كۊمه‌ڵایه‌تیی جیاكار هەن. وەروو ئانەی دەنگ بەرز کەراوە، گەرەکمانە پاڵپشتییشا کەرمۍ. ڕه‌نگا بییەی ئێمه‌ی په‌رله‌مانتارا ئه‌نجامه‌كەی نەفاڕۊ، چونكوم هەڵای فرەو په‌رله‌مانی ئینا دەسوو دەسەڵاتیوە. وەلۍ پڕۊسه‌كه گرنگتەرا جه ئه‌نجامه‌كهی. جە مەیدانوو كۊشیاینە به‌نرخا، كه ده‌نگوو مێردینی و گه‌لوو كوردین چاگە.
گونه‌شە جە باسوو پرسەو ئا زینڎانیانه كه ماوه‌و ٣٠ ساڵان ئینۍ زینڎاننە واتش: ماوه‌ی ویەرڎەنە بابه‌توو وستەیقنێرەو ئازادكەرڎەی ئانیشا ماوه‌و ٣٠ ساڵان ئینۍ زینڎاننە بابه‌تی سه‌ره‌كی و گرنگوو بنەیانەکا بۍ و فرەیچ چاره‌نویسسازها، چونكوم ماوه‌و ٣٠ ساڵان كێشه‌و كوردی چاره‌سه‌ر نه‌كریان و به‌رده‌واما.
هه‌وڵۍ مدا گه‌نجا جە ئشناسنامه‌کەیشا ماڵارە
گونه‌شە جە باسوو كاریگه‌رییه‌كاو سیاسه‌توو جەنگی تایبه‌توو ده‌وڵه‌توو توركینە سه‌روو گه‌نجا واتش: هه‌وڵۍ مدا گه‌نجاو كوردی جە شوناسه‌كه‌یشا بڕنارە. چی ساڵاو وەڵێنە ئانەیە وینمۍ، كه گه‌نجاو كوردی گەرەکشانە با به پۊلیسۍ. بێگۊمان مشۊم سه‌روو ئانەیە کە چەنی ئا وەرمە په‌ره‌ش سانا و بی بە بابه‌توو گه‌نجا مردمۍ و قسێش سەر کەرمۍ. ئا سیاسه‌ته ماڵایرەین جە ئشناسنامهی، بڕنایرەی جە كولتووری، تاریخی، زوانی و شاره‌كاشا، شۊنیشرە مارۊ و جیای ئانەیە بره‌و به سه‌رمایه‌داری مدۊ. پێسەیچ گه‌نجۍ تووشوو سه‌رەوەنەشیویای با. ئێمه گەرەکمانە ئا پڕۊسه‌یه چەنی گه‌نجا و ژەنا پەی وەڵۍ بەرمۍ. به پڕۊسه‌و ڕه‌خنەی و ڕه‌خنه‌دای چەنی ژەنا و گه‌نجا كوۍ بیمێوە.
"ئانۍ كه ٣٠ ساڵێن ئینۍ زینڎاننە قوەما مدا پەنە"
بێریتان گونه‌شە، كه قسێش چەنی ئا زینڎانییاو دماو ٣٠ ساڵا له زینڎاننە ئازادۍ كریێنۍ، كەرڎێنە، ئا كه‌سێشە پێسە به‌شێوە جە تاریخوو كوردستانی نامۍ نیۍ و واتش: ده‌وڵه‌ت جە ٣٠ ساڵی ویەرڎەنە گەرەکش بۍ ئانیشا سەرکوت کەرۊ، وەلۍ ئێمه پێچه‌وانه‌و ئا هه‌وڵا چا كه‌سانه وینمۍ كه ئازادۍ كریێنۍ. یۊ چانیشا، کە ئازاد كریان پەنەش واتا: ئی ٣٠ ساڵه نه جە قوەو ئێمه و نه جە قوەو شمە كه‌مش كەرڎەن. ئینەیچ وانێوە خاسا پەی ئانیشا کە٣٠ ساڵێن كێشه‌و كوردیشا چاره‌سه‌ر نه‌كەرڎەن. پێسە باوهڕما به كۊشیای پەی ئشناسنامهی و زوانی زیاتەر بی.
س.ز
