پلاتفۊرمو ھورچنیەی هامپەیمانیی ڕەنج و ئازاڎیی جە شتوتگارت جە ١٠و نیسانو ٢٠٢٣ێنە جە هۊڵو ڕۊشنۋییری ئەرینای گلېرۊبیەێش پۍ گەلی رێکوست. سەرۊکو شەرەفی هەدەپەی "ئەرتوغروڵ کورکچو"، پەرلەمانتارو هەدەپەی و سەرۊک شارەوانیەو گۊرە شارو وانی "بەدیعە ئۊزگۆکچە ئەرتان"ە، پەرلەمانتارو دی لینکەی جە پەرلەمانو ئەڵمانیای "گۊکای ئاکبولوت" و هونەرمەنڎ دیار ئاماڎۍ گلېرۊبیەکەی بێنۍ.

جە گلېرۊبیەکەینە زانیاری سەرو دەنگدای و ۋۍ تۊمارکەرڎەی پۍ دەنگدای جە ھورچنیاکەینە وزیا ڕوۋە.

پەرلەمانتارو دی لینکەی "گۊکای ئاکبولوت" جە گلېرۊبیەکەینە ئەرەیاۋناش، پەشتیوانی جە هەدەپەی مکەرمۍ ۋەرو ئانەیچ پەشتیوانی جە پارتو چەپی سەوزی مکەرمۍ. ئاکبولوت ئەرەیاۋناش، دەسەڵاتو ئاکەپە و مەهەپەی بیەن بە ڕژێمێۋە دەسەڵاتوازی ۋۍ سەپن و ۋاتش، "ئەردۊغان چنڎین ساڵېن ھجوم کەرۊ سەرو کوردەکا، ئەرمەنییەکا، عەلەوییەکا، کرێکارا، زەحمەتکێشا، ژەنا و جوۋانا. سروشتی تاڵان مکەرۊ. هەزاران کەسۍ بە مەڵامەتو بوومەلەرزەکەیۊ گیانشا جە دەسدا و ۋڵاتەکەیچ بەرەو گێچەڵۍ و نا سەقامگیری بریۊ. مانگېرتەو کرێکارا قەدەغەن، ڕۊچنامەوانۍ و ئەکادیمییەکۍ ئەرەگیر کریا. پېسە ۋەڵتەری، ئێمە ئیسە پېسە پارتو دی لینکەی پەشتیوانی جە هەدەپەی مکەرمۍ، پەشتگیری جە پارتو چەپی سەوزی مکەرمۍ. حەوڵو وستەیرە هەدەپەی حەیاشیەین و ئێمە بە تنی شەرمەسارش مکەرمۍ. پۍ ئانەی ھورچنیەی هەلومەرجێۋە دیموکراسینە بلۊ ڕاۋە ئێمە پەشتیوانی جە هامپەیمانیی ڕەنج و ئازاڎیی مکەرمۍ."

ھەرپاسە "ئەرتوغروڵ کورکچو" باسش جە ماناو ھورچنیەکا ١٤و ئایاری کەرڎ و ۋاتش، " چی ھورچنیەنە دەنگدەراما جبەرو ۋڵاتی دەورێۋە ئەساسی مۋینا. پێویسا ئانەی بزانمۍ، کە دەنگېۋە نوێنەرێۋە سەروزۊ. پۊکەی ئێمە ھورچنیەی و دەنگدای جە ھورچنیاکانە بە گرنگ مزانمۍ".

حەرپاسە "بەدیعە ئۊزگۊکچە ئەرتان"ە ۋاتش، "ئەشۊ ئێمە جە جبەر و دلۍ ۋڵاتینە هیواکاما یۊ وزمۍ، هێزو ۋێما کەرمۍ بە یۊ و نوێنەرایەتیی ۋێما بەقوەتتەر کەرمۍ."

دماو پێشکەشکەرڎەو قسەکا، هونەرمەنڎ دیار هونەرەکەو ۋێش پێشکەش بە ئاماڎەبیا کەرڎ.

ھ.ش