تونجەر باقرخان و تولای حاتەم ئۆغولاریە هامسەرۆکاو دەم پارتی سەرشا ۋنەو هامسەرۆکا وەڵینو هەدەپەی دا و داواشا کەرڎ پەی ئانەی بەشداری جە پرۆسەو ئاشتینە بکەرا ئەشۆ ئازاڎې بکریا.
تونجەر باقرخان و تولای حاتەم ئۆغولاریە هامسەرۆکاو دەم پارتی، هېزی جە زینانو کەندرای جە کۆجاعەلی چنی فیگەن یوکسەکداغې و سەمرا گوزەلې کوې بیێوە و ئارۊیچ چنی سەلاحەدین دەمیرتاشی و سەلچوک مزراکلی جە زینانو ئەدرنەینە دیدارشا کەرڎ.
دماو گلېرۆبیەکەی، تونجەر باقرخان ۋەربەرەو زینانو ئەدرنەینە قسێش کەرڎې. باقرخان ئەرەیاۋناش کە مۆڕاڵ و تەندروسی زینانییەکا عال بې و واتش: "پێشنیارێوە فرە بەقیمەتشا پێشکەش کەرڎ ئاڎې ئەرەیاۋناشا کە هەر ئەرکێوەشا پنە بڎریۆ پەی وەڵێوستەی پرۆسەکەی جابەجاش مکەرا."
باقرخان جە درێژەو قسەکاشەنە واتش: "ئاڎې نەتاواشا ئی مژارەیە ئەرەیاۋنا، بەڵام ئێمە باسش مکەرمې، جە پڕۆسێوە چامنەنە کە باسو ئاشتی مکەرمې و جە مەراسیمێوەنە چەکەکێچ نریێرە، ئا کەسې کە جە دۆسیەو پیلانگێڵنی کۆبانێنە دادگایی مکریا، چانیشا سەلاحەدین دەمیرتاش، فیگەن یوکسەکداغە و هەڤاڵا تەریما، پەنەوازا چی پڕۊسەنە پەی وەڵێوستەی ئی پرۆسەیە، چنیما با."
باقرخان بە ئاماژەدای بە پاشێلکەردەی مافو سەلاحەدین دەمیرتاشی کە جە لایەنو دادگاو مافو مرۆڤو ئۊروپایۆ ئاماژەش پنەکریابې ئەرەیاۋناش: "پەی ئانەی ئی پرۆسە عالتەر بلۊ وەڵێوە، پەنەوازا ئا هەڤاڵې کە جە دۆسیەو پیلانگێڵنی کۆبانێنە تاوانبار و دادگایی مکریا، بە ۋەرچەمگێرتەی قەرارو دادگاو مافو مرۆڤو ئۆروپای ئازاڎې بکریا."
هەرپاسە تولای حاتەم ئۆغولاریە جەختش چانەیە کەرڎۆ کە ئاڎۍ ئینې پرۆسێوەنە کە چەکەکې بێدەنگې کریا و زوانو ئاشتی پەرە مسانۆ و واتش: "جگە چانەیچ ئینایمې پرۆسێوەنە کە باس جە ئەرەمەرزنای ئاشتی و گلېرگەی دیموکراتیکی مکەرمې. جە پرۆسێوە چامنەنە قەناعەتما هەن کە ئەنجامێوە دەمودەسی بەدی بۍ. ئینەیچ بۆ بەمەڵامەتوو ئانەی کە گلېرگەو تورکیای، تورک، کورد، لەز، چەرکەس ،گەلو کوردی و ٧٢ نەتەوې دڵوەشې با."
