هامسەرۆکەو گرڎینەو دەم پارتی تولای حاتەم ئۆغۆللاریە جە چالاکی ئەرەنیشتەینە دژوو کودەتاو قەیومی، واتش: "چېوی هەرە گرنگ چی وڵاتەنە ڕەزامەندیی گەلین. گەر خێرتا جە قەیومی دییەبیۍ، ئانڎە چی هەرێمەنە تووشوو تاونایۆ نەبېندۍ".
هامسەرۆکەو گرڎینەو پارتوو یەکسانی و دیموکراسیی گەلا (دەم پارتی) تولای حاتەم ئۆغۆللاریە جە چالاکی ئەرەنیشتەینە دژوو نیایرەو قەیومی جە شارەوانی جولەمێرگینە ۋەروودەم و بیناو دادگاینە، قسېش کەردۍ.
ئەرەیاۋناش ئی کودەتا بە ئەمرەو کۊشکۍ و جە ڕاو وەزیروو دادی و بە بەکارئاردەی هېزە ئەمنییەکا ئەنجامدریان.
حاتەم ئۆغۆللاریە واتش: "چېوی هەرە گرنگ چی وڵاتەنە ڕەزامەندیی گەلین، مەتاوی بە قەیومی ئیدارەو وڵاتی بڎەی. گەر خێرتا جە قەیومی دییەبیۍ، جە هەرېمەکەنە ئاڼە تووشوو تاونایۆ نەبېندۍ. ئانەی شمە کەرتا وەرا ۋەر بە گەلی مدرامانکەری، ئەرەیاۋناو جەنگوو کۊشکېن دژوو گەلی. گەل پا گیرا سەرو بناغېوە دیموکراتیکی درێژە بە ئەرەکۊشای بڎۆ. گەل سەرو بناغەو دیموکراتیکی مافی یاسایی ۋێش بەکارمارۆ و هەمیشە دژوو ڕژێموو قەیومیبۊ. ڕژێموو قەیومی حەجگیز سەرمەگنۆ و مەتاوا پەی هەمیشەی قەیومی بازاوە".
حاتەم ئۆغۆللاریە ڕوەش کەردە قەیومی و واتش: "ئەی قەیوم دەس جە شارەوانیەکەیما هۊرگېرە، دەس سەرو گەلو جولەمێرگی هۊرگېرە".
