هجوومەکاو دژوو ڕۆنامەوانا و کولتووری کوردی شەرمەزارێ کریێ
شاروو بێرنوو پایتەختوو سویسراینە بە چالاکیێوە هجوومەکاو دەوڵەتوو تورکی دژ بە ڕۆنامەوانا و کولتووری کوردیی شەرمەزارێ کریێ.
کوردسانیێ بێرنوو پایتەختوو سویسراینە سەروو داواو ئەنجوومەنوو ژەناو بەرژین زەندای و ناوەندوو گلێرگەی کوردی دیموکراتیکی (جەدەکە-بێرن)ی لە باهنهۆف پلاتزنە جەمێ بیێوە و هجوومەکاو دەوڵەتوو تورکی ئەرەگیریشا دژوو ڕۆنامەوانا و چاند و زوانی کوردی شەرمەزار کەرد.
چالاکییەکەنە بورهان کارەکۆچ ئەنداموو ناوەندوو گلێرگەو کوردی دیموکراتیک (جەدەکە-بێرن)ی قسێش کەردێ و هجوومەکاو دەوڵەتوو تورکی ئەرەگیریش شەرنەزارێ کەردێ و واتش:" دەوڵەتوو تورکی هجووم مکەرۆ سەروو کولتووری و زوانی کوردیما، پەوکای وەراوەروو ئانەینە ئێمە سەرەمڕ کۆشیەیمێ و خاوەنداریی جە کولتور و زوانو وێما مکەرمێ."
بەشیوی تەروو قسەکاشەنە کارەکۆچ هجوومەکاو سەروو ڕۆنامەواناو چاپەمەنیی ئازادی (گوڵستان تارا و هێرۆ بەهادین)ێش شەرمەزار کەرد.
حەر جە چالاکییەکەنە هامسەرۆکوو دیوانوو هامسەرۆکایەتیی دیموکراتیکوو سویسرای (جەدەکە-سویسرا) نەجدەت ئاتالای سەرەنجەش وستە سەروو ڕێککەوتەینامەو بەینوو ئەنقەرەی و بەغدای و ناڕەزایەتیی وێش پەی هامکارییەکاو بنەیانەو بارزانی بەروست و واتش:" پەنەوازا پەدەکە دەسبەرداروو ئی سیاسەتا بۆ و نەبۆ بە بەشێوە جە سیاسەتوو کۆکوشیی کوردا."
