حکومەتو تورکیای پیلاننامەو چالاکییەکا ۋێش پێشکەش بە کۆمیتەو وەزیرا کۆنسەو ئۆرووپای کەرڎ و ئەرەیاۋناش، کە حیچ فاڕیایې سەبارەت بە 'مافو هیوا'ی نمەکەرۆ، دۊڵەتو تورکی ڕابەر ئاپۆش جە مافو هیوای بێبەش کەرڎ.
جە پیلاننامەکەشەنە دۊڵەتو تورکی ئاماژەش پانەیە دا، ئا زینانیې کە سزای هەتاهەتایی قورسشا سەرەرە سەپیان نمەتاوا ئیسفاڎە جە مافو هیوای هۊرگێرا.
جە پیلاننامەکەنە کە ٢٧و حوزەیرانو ٢٠٢٥ پێشکەش کریان، ۋەرپرسیارییەکې چېرو ڕۆشنایی قەرارەکا (ژمارە ٢)ې دادگاو مافو مرۆڤو ئۊروپای سەبارەت بە ئەمین گووربان، جڤان بۆڵتان، حەیاتی قەیتانی و ڕابەر ئاپۆی هۊرسەنگیا.
داداگاکە چی دۆسیانە ئەرەیاۋنابێش کە نەڕەخسنای دەرفەتو لوایۆپۆرەی بە سزا یان هیواو ئازادکەردەی پەی ئا کەسا کە سزاو زینانی هەتاهەتایی قورسیشا سەرەرە سەپیان، پاشێلکەردەی مادەو ٣ـیەمو (قەڎەغەکەردەی مامەڵە یان سزای نامرۆڤانە و ئەشکەنجە)و پەیماننامەو مافو مرۆڤو ئۆروپایا.
پاگیری سەرو گۆشەگیری
جە پیلاننامەو چالاکییەکا حکومەتو تورکیاینە بانگەشەو ئانەی کریان، سەبارەت بە ڕابەر ئاپۆی 'پەنەوازش بە هۆرگێرتەی ڕاوجای کەسی نییا'، جە کاتێنە ڕابەر ئاپۆ جە ساڵۊو ١٩٩٩ یۆ تا ئیساتې ئینا زینانی تاکەکەسینە، ئی ئاژە بەرش وزۆ سەرەڕاو قەرارو دادگاو مافو مرۆڤو ئۊرووپای گۆشەگیری بەردەواما.
ڕەڎکەردەیۆ مافو هیوای
حکومەتو تورکیای بە سەرنامې "ئازاڎکەردەی مەرجدار"ی ئاماژەش پانەی دا، سزای زینانی هەتاهەتایی قورسی "ئیستیسنائی"ـیا و ئا کەسەی سزاکېش سەرەرە سەپیان نمەتاوۆ ئیسفاڎە جە میکانیزیمو ئازاڎکەردەی مەرجداری هۊرگێرۆ، پی جۆرە تورکیا بە فەرمی ئەرەیاۋناش، کە حیچ فاڕیایې جە یاساو "مافو هیوا"ـینە نمەکەرۆ.
یەڵماز تونچ، وەزیرو دادو دۊڵەتو تورکی مانگۊو ئایاری جە چەپنەکۊتەیێنە سەبارەت بە مافو هیوای پەی ڕابەر ئاپۆی ئاماژەش پانەی دابې، "ئاژێوە پی جۆرە نمە بۆ"، ئا واچې جە پیلاننامەکەنە ئاماژەشا پنە کریان، نیشانەش مڎا کە ئیتر ئی هەڵوێسە بیەن بە سیاسەتێوە فەرمی.
