ئەندامەو کۊمیتەو ناوەندی پەکەکەی هیلین ئومێدە ئاماژەش پانەی کەرد کە ڕاو دمایی ئاردەی بە گۊشەگیری ئانېنە جە گرڎ شۊنېنە داواو ئازاڎیی و بېیەیما بکەرمۍ، بانگەشەو ئانەی بکەرمۍ و سیاسەتێوە پا جۊرە بارمېنە ئاراوە.
هێلین ئومێدە مېمانە بۍ جە بەرنامەو مەدیا خەبەرینە و واتش: "پێویسا ئەرەکۊشای چینایەتی بەرمۍ ڕاوە، سەروو ئی بنەمایۍ بەهاکاو ژیۋای کۆمیناڵی بەروزمۍ و کۆمۆن ئەرەمەرزنمۍ. پێویسا کۆمۆن، کۆمیتە و ئەنجوومەن پەی گرڎوو ئا کەسا بۆ کە پەی ئازاڎیی جەستەی ڕابەر ئاپۆی ئەرەکۊشا. پێویسا ئینۍ جە ژیۋاینە با و سەروو گلېرگەیرە سەپیا. بەبێ ڕەخسنای ئی چېوا گنمۍ دلۍ ئاژېوە کە زۋانما چېوۍ ماچۆ و کردارما چېوێتەر ماچۆ."
**
ئەندامەو کۊمیتەو ناوەندی پەکەکەی هیلین ئومێدە پی جۊرە دەسش بە قسەکاش کەرد:
"سەرەتا بەنامۍ هامڕایاماوە وەشەسیای و سڵامما پەی ڕابەر ئاپۆی کیانمۍ. بە گرڎوو هێزوو تەواناو ۋێمۆ نەفرەت چانیشا مکەروو کە سیستموو قڕکەردەی ئیمراڵیشا ئەرەمەرزنان.
گۆشەگیری بەردەواما، جە حەقەتینەنە بەردەوامبیەی سیستموو گۆشەگیری بە ماناو بەردەوامی سیستموو فشاری و قڕکەردەیا. گەرەکما سەرنجوو ۋێم بوزوو سەرو گرنگی حەقیقەتوو ئیمراڵی.
ئەرەکۊشای دژوو گۆشەگیری بەردەواما. پەیوەس پی مژارەیۆ کۊششی گرنگوو گەلو کوردی، دۆسا کوردی و ڕای گرڎیی دیموکراتیکی هەن. بەڵام سیستموو جەنگی تایبەتی جە ۋەرا ۋەرمانە، بە جەختکەردەیۆ ئی کۊششا پەردەپۆش مکەرۆ، تەنانە کۊشش مکەرۆ ۋەربەسی یاسایی جە دژش بنیۆرە و بەهانېش پەی بارۊوە. چی ڕووانگۆ تەماشەکەردەیما جە سیستموو ئیمراڵی بە ماناو تەماشەکەردەین جە حەقیقەتوو ۋێما.
بەتایبەت پەی حەقیقەتوو گەلوو کوردی و ئا گلېرگا پەی ئازاڎیی ئەرەکۊشا، ڕابەر ئاپۆ سەرچەمەو هیواین. وەختۍ نامۍ ڕابەر ئاپۆی مۍ ئاژېوە پی جۊرە مېنە خیاڵ و ئینسانی. بە تایبەت پەی گەلو کوردی ڕابەر ئاپۆ سەرچەمەو هیوایا، ڕۆشناین، کۆبیەیۆ هیواو خەیاڵکەردەی دما ڕۊیمانە. ڕابەر ئاپۆ حەقیقەتێوەن کە گرڎوو بەها جە دەسشییەکا مرۆڤایەتیش جە ۋێشەنە کوۍ کەردێنۍ. جە وەرا ۋەروو ڕابەر ئاپۆینە پێناسېوە چی جۊرەیما هەن.
ڕابەرایەتیما ماچۆ: "من کۆبیەیۆ گرڎوو حەسرەتەکا شمەنا. جە منەنە ۋێتا مویندېوە، پۊکەی شمە جە منەنە بەرجەسۍ بیدۍ." هەڵبەتە ئینەش جە واقعیچەنە نیشانە دان.
وەختۍ هۊرسەنگنای پەی ڕابەر ئاپۆی مکەرمۍ، تەنیا پېسە رابەرێوە سیاسی و سەروازی هورش مەسەنگنمۍ. جە ژیۋایمانە حەقیقەتێوە جیاوازتەرش هەن. جە بڕېمانە بە شێوەی زانسی چنەشەنە مژیومۆ، پەی بڕېما تەماموو ژیۋاین و پەی بڕێچما مزانمۍ کە ڕابەر ئاپۆ ناوەندوو هێزێوە سەرنج کېشیا. جە ڕوانگەو گەلو کوردسانیوە، جە ڕوانگەو گەنجاوە و بە تاتیبەت پەی ژەنە گەنجا ڕابەر ئاپۆ ناوەندوو هێزێوە سەرنج کېشیا. پەنەواز مکەرۆ ئی ڕاسیە دەسنیشان بکەرمۍ کە ڕابەرایەتی چی پی جۊرەنە؟ تەنیا بەربڕیەی حەسرەتیما جە وەرا ۋەرو ئی ڕاسیەینە تێرکەر نیا. چی ڕوۆ بە تەمامی ئی چېوەشە چنە داواکەردیمۍ؛ ماچۆ، "گەرەکما بە دروسی بۋنییەوە، بە دروسی بیاودێمەنە." ئینە چ پەیوەندیېوەش بە مژارەکەیماوە هەن؟ گەر بە عالی جە ڕابەر ئاپۆی نەیاۋمېنە، ئانە مەتاومۍ بە دروسی ئا کۊشیایە وەڵۍ وزمۍ کە پەی ئانەی بەرمېش ڕاوە. تا عالتەر جە حەقیقەتوو ڕابەر ئاپۆی بیاومېنە، ئانڎە کۊشیایما پەی ئازاڎیی جەستەی ڕابەر ئاپۆی دروستەربۆ.
ڕابەرایەتی سیستمێوا
ڕابەرایەتی گردوو ئا بابەتانێ کە باسێما کەردێ، بەڵام چانەیە زیاتەر ڕابەرایەتی سیستمێوا. سیستمێو هەن ڕاسیی ڕابەرایەتی نیشانە مدۆ. پەنەوازا فرە خاس چی بابەتەیە بیاومێنە. پەی نموونەی پەنەوازا گردوو گەلوو کورد و خەڵکی هۆشیار، دیموکرات، سۆسیالیست و شۆڕشگێڵن ئی پەرسێ بکەرا. چی سیستمی کۆکوشی ئیمرالیینە مەرزیارە؟ چی سیستمێوی پاسە تایبەت پەی سەرۆک ئاپۆی بەکار مێ؟ ڕەنگای ئینە بابەتێوی فرە فراوان بۆ و ئجۆم پەنەوازا بەش بە بەش ورش بسەنگنمێ. ڕەنگای ئیساتێ نەتاوونە گردیشا بوزوونە مەڕووە، بەڵام راسیی ڕابەرایەتی پێسەو سیستمێوە پێناسە مکەروو، پێسەو یۆگێرتەیی ئامانجی موینووش، یانێ ڕابەرایەتی پێسەو کەسێوی ئامانجداری موینوونە، چی چوارچوەنە چەنەش مکۆڵییەووە و بە ورسەنگنای گۆشەگیری سەپیا پیسەو سیستمێوی جەنگی و هجوومی پەی ڕاگێریکەردەی جە بەدیئاردەی ئی ئامانجا مشۆم فرە بەوردی وەرەچەم بگێرمێ.
پەی نموونەی ئەگەر ئی ئامانجێ، ڕاسیی ڕابەرایەتی، فەلسەفەو ژیوای ئازادی، کە ڕاسی ڕابەرایەتی نوێنەرایەتییش مکەرۆ و سیستمی کۆمەڵایەتی وەرگێرییش مکەرۆ، بیاومێنە و پراکتیزەش بکەرمێ، ئانە ڕاسیینە گۆشەگیری بێمانا مبۆنە. چونکوم ئی گۆشەگیرییە پەی ڕاگریکەردەین جە بەدیئاردەی ئا ئامانج و مەبەستا کە میاونیا یاگێ. ئی مەبەسێ چێشێنێ؟ یوەم: چارەسەرکەردەی مەسەلێ بییەی و ئازادیی کوردی. ئەگەر هجوومە کۆکوشییەکاو تورکیای ئیمرالینە پاسە تندێ با، ئانە ماناش ئانێنە، کە جەنگێوی فرە قورس چا مکریۆ و گەرەکشانە چا بەدەسش بارا. گەرەکشانە ئیرادە و کۆشیای گەلوو کوردی پەی بییەی و ئازادیی چا بماڕا. ئینەە ئامانجی ئەوەڵینشانە، دژ بە گەلوو کوردی.
ڕابەر ئاپۆ یانێ ڕابەرێو، کە وەرگێری جە بییەی و ئازادیی گەلوو کوردی مکەرۆ. یانێ مشۆم داواکاریی ئازادی و بییەیما، داواو شناسنامەی ئازادی و شناسنامەی ئازادیما گرد یاگێونە ئاشکرا بکەرمێ، پەنەوازا زیاتەر وەرش بگێرمێ، مشۆم باسش بکەرمێ. مشۆم ئا ئەدەبیاتەی بوزمێ وەڵێ و سیاسەتێوەش پەی مجمێرە. ئینەیچە ڕاێوی گرنگەنە پەی ورشانایوە گۆشەگیری.
دووەم; ئەگەر ڕاسیی ڕابەرایەتی سیستەمێو بۆ، یانێ ئەگەر تەنیا یەک کەس نەبۆ، ئەگەر کۆمەڵێو ویرۆکێ با، ئەگەر وەرموو جیهانێوی تازەی بۆ، ئەگەر ئیدیاڵێوی ژیوای بۆ، ئانە مشۆم نامێوەش پەی دیاریی بکریۆ. ڕابەر ئاپۆ ئینەش بە پێناسەکاش پێسەو سۆسیالیزمی دیموکراتیک، مۆدێرنیتەی دیموکراتیکی وێڕاوەبەریی دیموکراتیکی پێشکەش کەردەن، ئانەنە کە ئارۆ میاویۆ یاگێ. بە مانێوە تەرە واتش من پێشەواو گلێرگەی دیموکراتیکینا. دمایی ئەگەر بەڕاسی باوڕ و متمانە و وەشەسیایما پەی ڕابەر ئاپۆی پێسەو کۆشەرێوە هەن، مبیمێ بە بەشێو چی پارادایمەیە، هێزی بنیاتنەر و پارێزنەر، وتار، زوان، گۆرانییێ، فۆلکلۆر و پڕوپاگەندەو ئی ئەم سیستەمەیە کە لە لاو ڕابەر ئاپۆیوە پەرەش پەنە دان، ئێمە مفاڕیەیمێ. بەڵام ڕاسیی پەکەکەی و ڕابەرایەتییەکەیش بییەن بە ڕاسیێوی جەماوەری نەک حزبی. گوزارشت جە واقیعوو گەلێوی مکەرۆ. هەرپاسە پێویسا گەلەکەما خاس بیاوۆشنە، کە سیستمی کۆمەڵایەتیی دیموکراتیک و گلێرگەی دیموکراتیک چێشا.
'ئەوەڵ مشۆم دەوڵەت مەژگنە دلێنە بشۆ'
درێژەو ورسەنگنایەکاشنە، هێلین ئومیتە سەرنجەش پەی گلێرگەی دیموکراتیکی کێشتە و واتش: "مشۆم دەوڵەتی مەژگوو وێمانە دلێنە بەرمێ. ئەوەڵ ئینە پەی گلێرگەی کوردی مواچوو، ڕاسیینە پەی گردوو گەلا و گلێرگەی تورکییچ بە هەمان شێوە ماچوو. یوەم: مشۆم بواری دەروونییوە دلێنە بشۆ. دەوڵەت چارەسەر نییا، ئامرازوو چارەسەری نییا. چکۆنە دەوڵەت بۆ، کۆیلایەتییچ هەن. ئەگەر ئازادیما گەرەکا، ئانە مشۆم گلێرگێوی بێدەوڵەت ڕێک بوزمێ. چی ئینەیە ماچوو؟ مەسەلەکێ ئیساتێ ئانێنە کە گلێرگەی کوردی، ڕای گردینی دیموکراتیک، کەسێ ساعیب هەستێ گردوو جیهانیوە بەشداری جە هەڵمەتەو جیهانیینە پەی ئازادیی ڕابەر ئاپۆی مکەرانێ. حەر چوار پارچەو کوردستانینە چالاکییەکا مکەرانێ. ڕاسیینە ئینێ هەڵای وەسێ نییەنێ. پەنەوازا گەورەتەر بۆ و گەشە بکەرۆ. بەتایبەت شێوازوو سەرنیشتوو کوردستانیوە، گەرەکما بواچوو؛ نمەتاومێ دەوڵەتی چەمەڕا بکەرمێ.
یانێ ئیتر ی کۆشیایە چەنی بۆ؟ ئینە وەختێوە ڕووە مدۆ، کە گلێرگا حەر بوارێوەنە وێش ڕێک بوز و بکەرۆش بە ئیرادە. ئینەیچ بەبێ ڕێکوستەی وێما پەی هێزێوی ڕێکوزیای ڕووە نمەدۆ. نەک تەنیا سیستمی پەرلەمانیینە، بەڵکوم گرد بوارێوەنە مشۆم ڕێک بوزیۆ. بەڕاسی دەوڵەت نەتەوەو تورکی، پاسە پەتەش کەردێنە ملەو گلێرگەی، حەروەختیو گەرەکش بۆ پی لاو پەولارە بکێشیۆ. ڕاو زاڵبییەی سەروو ئینەیرە، ڕێکوستەی وێتا گردوو بوارەکانە، جە ڕەهەندی ئابوورییوە تا ڕەهەندی ڕۆشنویری و تەندروستی. ئەگەر بتاومێ چی بوارانە سەرێبگنمێ. ئەگەر گلێرگەی کوردی و گلێرگەی تورکی بتاوا سەروو ئا بنەمێ وێشا ڕێکێ بوزانێ، ئانە هەنگامێو جە ئازادی و دیموکراسی نزیکی بانێوە. ئندا نمەتاویۆ جە ئەزموونوو بەشبییەی تندینە، کۆیلایەتی، ملکەچبییەی چێروو گوتاری دیموکراسیینە بە ئازادی بیاوۆ.
پەوکای پەنەوازا بەردەوامێ بیمێ و دژوو گۆشەگیری کۆشیایما فراوانتەر بکەرمێ، ئەگەر نەتاومێ چانەیە بیاومێنە، ئەگەر نەتاومێ وێما ئازاد بکەرمێ، ئەگەر نەتاومێ وێما جە ئازادیی نزیک بکەرمێوە، نمەتاومێ پەی ئازادیی جەسەیی ڕابەر ئاپۆی بکۆشیەیمێ. قسێ و هەرمانەکێما جیاوازێنێ. ئینەیچە پیمەرێوی گرنگو ئەخلاقیێنی وەرکەوتوو دلێڕاسەینە.مسۆم قسێ و هەرمانەکێت پێسەو یۆی بانێ. مسۆم پێسەو وێت بەربگنینە، پاسە بژیوی، کە ویرێش چنە مکەریوە یا پێسەو ئانەیە مژیوی ویرێ بکەرۆ. چی بوارەنە پێویس بە یۆگێرتەی هەن. ئەگەر بواچمێ ئێمە گەلوو ڕابەر ئاپۆی و نەتەوێوی دیموکراتیکینمێ، مشۆم شێوازوو ژیوای و ڕێکوستەی ئێمە سەروو ئینەیە بنیات بنریۆ.
مشۆم گردوو ئانیشا پەی ئازادیی ڕابەر ئاپۆی کۆشیانێ، پەنەوازا کۆمۆنشا بۆ
نەتەوێوی دیموکراتیک بەشبیەی چینایەتی قبووڵ نمەکەرۆ. نمەتاویۆ بەرە پەی ئا جۆرە تایبەتمەندییە یە بەکراوەیی بازیۆوە. ئینە نمەتاویۆ بە ڕەوا و ڕاس هەژمار بکریۆ. هەڵوێستێوی سازشکارانەن وەراوەر بە قۆرخکارییەکا و چینوو دلێڕاسەی و ئانیشا سەروو ڕەنجوو گلێرگەیوە مژیوانێ. پەنەوازا کۆشیاێوی دروس بکریۆ و چی بابەتەنە هامسەنگی گونجیا بەدەس بارۆ. کۆشیای چینایەتی کوردستاننە فرە گرنگا. پەنەوازا کۆشیای چینایەتی بکریۆ، بەهاکاو ژیوای گلێرگەی سەروو ئی بنەمێوە ئاشکرێ بکریا و کۆمۆنەکێ وەشێ بکریانێ. حەرکەسێو پەی ئازادیی جەسەیی ڕابەر ئاپۆی مکۆشیۆ، مشۆم کۆمۆن و کۆمیتە و مەجلیسش بۆ. نمەبۆ بەبێ ئانیشا بژیوۆ، مشۆم کۆمەڵایەتیبییەی وێش چا بارەوە بنیات بنیۆ. بەبێ ئینەیە قسێ و هەرمانێما جە یۆی جیێ مبانێوە.
گرد بوارێوەنە کۆشیای دژوو گۆشەگیری بەردەواما. حەرپێسەو ئاماژەت پەنە دا لاو دۆس و هامڕایا و زیندانییە سیاسیاوە زیندانەکانە چالاکی مکریۆ. چالاکییەکێ لاو کەسوکاروو زیندانیییاو بەریوە مکریانێ. جگە چینەیچە چالاکیێ مکریانێ. چوارچوە هەڵمەتەو ئازادیی جیهانیینە فرەو یاگەکانە چالاکییەکێ پەی ئازادیی جەسەیی ڕابەر ئاپۆی مکریۆ.
بە نهێنی کەرکووک و موسڵنە چەتەکێ ڕێکێ موزیانێ
گەرەکما سەرنجە پەی لایەنێوی تەروو هجوومەکاو سەروو پانیشتوو کوردستانی و عێراقی بکێشوو. حەرچەندە بییەی جمیەرەکەیما چێگەنە پێسەو بەهانێ نیشانە مدۆ، بەڵام ئامانجی سەرەکیی دەوڵەتوو تورکی دەسملەرەگێرتەی کێڵگە نەوتییەکاو موسڵی و کەرکووکین. وەختێو تەماشەو میدیاو جەنگی تایبەتیی تورکی مکەری، بە ئاسانی موینی کە ورمێزا و منیشارە، کە خەزێنەو غازی چەمالی، بڕوو نەوتەو کەرکووکی، نمەزانوو چندە نەوتە بەرئامیێنە، نمەزانوونێ سەرچەمەو سەروەت و سامانوو کوردستانی چندا، ئینێ لاو پەکەکەیوە دەسشا ملەرە گیریان.... و هتد. ئینێ گرد قسێ بێمانێنێ. دۆخێوی پاسنە نییارێ ئادێ مەبەسی سەرەکییسا ئەرەگیرکەردەی پانیشتوو کوردستانییا.
بەڵام تەرسەی هەقەتینە چێشەنە؟ پەی نموونەی لوەرە کەرکووک، لوە موسڵ، تەنیا یەک دەسەڵات هەن، کە بەنهێنی تاوانباراو ویش چێ ڕێک موزۆنە، کە تورکیان. تورکیا ڕاو پەیوەندییەکاشوە چەنی بەرەی تورکمانی و داعشی چەتەکاش ڕێک موزۆنە و هەوڵێ مدۆ چا بوارەنە کاریگەر بۆ.
قەت ویرما نەشۆ تورکیا ڕێبازێوی پاسنەش هەن. بە واتەو تورکیای، کورد تورکێ نەخوێندەوارێنێ. ئی وەڵاتە حەر یاگێونە کوردش چنە مژیوۆ پێسەو یاگێ فراوانبییەی وێش موینۆش. پا جوگرافیایە پێناسە کریان، کە تورک و کورد سەردەموو ئەرەمەرزنای کۆمارینە دلێشەنە ژیوێنێ. چا سیاسەتوو بەتورکبییەی مکەرانێ و پێسە تەماشەو کوردی مکەرا. پەوکای شمە بە موخاتەبەت نمەوینۆ، بەڵکوم بێڕێزی مکەرۆ.
سەرۆک ئاپۆ ئەوەڵ پارێزنامەشنە ئی ڕستەو واریشە بەکارئاردەن وەختێو گیریا. کینیانە ئارێنێم، پێسەو ئانەیە ئاژەڵێوی کەشی ڕام بکەرا، نزیکێم بێنیوە. ئیساتێ ئینە ڕابەرایەتیی ئێمەن. ئینە ڕابەرایەتی گەلوو کوردین. ئی ڕێبازە لاو گەلوو کوردیوە ڕابەرایەتی مکریۆ. ئینەیچ پا مانێنە، کە چەنی گردوو گەلوو کوردی پاسە نزیکێ مباوە پێسە ئانەیە دڕندێوی ڕام بکەرا. سەرو ئی بنەمێوە دەس بە هجوومی ئەرەگیرکاری مکەرا. تەماشەو ڕوانگەی و ڕێبازەکاشا بکەرا. کورد جە حیچ یاگێوەنە نمەتاوۆ وێش بەرۆ ڕاوە. نمەتاوانێ بۆشا. بە شناسنامەو وێشۆ بژیوۆ. بەڕاسی ئینە پێویسا خاس بیاواشنە و پێویسا بویناش جەنگەکە چی ئاستەنە بەردەواما. سەروو بنەماو ئینەیچە گەریلا، شۆڕشگێڵنێ و ئاپۆییەکێ هەرێمەکاو پارێزنای میدیاینە وەرگێرییش کەرا و درێژە بە کۆشیای مدانێ. ئێمە مدرامان مکەرمێ، مکۆشیەیمێ و جەنگ مکەرمێ. بەڵام جارێوی تەر جەخت چانەیە مکەرووە، کە ئینە کۆشیاێوە کۆمەڵایەتیی گەورەن و پاسەیچ مشۆم گردوو وەڵاتپارێزنا جە ستراتیژوو جەنگوو گەلی شۆڕشگێڵنینە بەشدارێ با.
چوارچوەو جەنگوو فاشیزمی ئەرەگیرکەرینە یۆ چا یاگا ڕووەش کەردەنەنە وەرنیشتوو کوردستانین. زلهێزە میاندەوڵەتییەکا شەرمەزار مکەروو. گەلێو کە دژ بە هێزێوی فاشیستی پێسەو داعشی مدرانۆ و شکسشا پنە ئاردەن، وەراوەروو هجوومەکاو دەوڵەتوو تورکینە بەتەنیا جیائازیان. وەرنیشتنە، کۆبانێنە، بەڕاسی شۆڕش تەنیا شۆرشوو گلێرگەی کوردیی نەبێ. مدرامان تەنیا پەی گلێرگەی کوردییچ نەبێ، پەی ئینسانیەتی مدرامان کریا. ئیساتێچ گەلوو وەرنیشتی ڕووبەڕوو هجوومی کۆکوشیی بیەنۆ.
بڕوام پاسنێنە ئەسەد هەڵوێستێوی سیاسیی شکۆمەند نیشانە بدۆ
چێش مکەردێ، هەڵبەت گەلوو سوریای و وەرنیشتی وێشا قەرار مدانێ. قەراروو ورچنیەیشا دا، ئینە قەراروو وێشانە. پەنەوازا ئینسان ڕێز چا قەرارەیە بگێرۆ. پەنەوازا ئینسان ئی ئیرادەیە بوینۆ و ددانش بنیۆ پۆرە. هەوڵێ مدانێ دماو جەنگی، یانێ دماو هجوومە سەختەکاو داعشی، ژیواێوی تازە چاگە بنیات بنیانێ. جڤاکێو کە هەوڵێ مەنەیوە مدۆنێ. ئی جڤاکە پاسە دۆڵەمەند نییارێ، جڤاکێوی هەژارا. گەرەکشەن بگنۆ وەڵێ و بوینیۆ و وێش بنیات بنیۆ. پەنەوازا ئینسان پەشتگیریی وەنەو ئی هەرمانێ بکەرا. هومێدەوارنا ڕژێموو سوریای پەی ئینەیە کریاوە بۆ و پێسە ئایندەو سوریای سەروو بناغەو هامپەیمانی چەنی کوردی مسۆگەر بکەرۆ. تاتەو ئەسەدی هەوڵێش دێ ئی سیاسەتەیە بمجۆرە. سەبارەت بە سەردەموو تاتە ئەسەدی ڕەخنێ فرێما بێنێ، کورد زەرەری فرەش پنە یاوا. بەڵام ڕژێموو ئەسەدی هەرگیز پێسەو ڕژێموو دەوڵەت نەتەوەی تورکیای هەڵوێستی نکۆڵیی تند و تیژش نەگێرترە وەر. بڕوام پاسنێنە بەشار ئەسەد سەروو ئا بناغەیە هەڵوێستێوی سیاسیی شکۆمەند نیشانە مدۆنێ.
ئەرەیاونیاو ئەمریکای چی بارەو بێ، جیهان پەی ئامادەکارییەکا مدیۆ، مدیۆ پەی ورچنیەیەکاو واگەی. دەوڵەتوو تورکی ماچۆ هجووم مکەروو. پەی واگەی چێوێوی تازە نییەن. جەنگ حەرگیز نەمدران، هجوومەکێ حەرگیز نەمدرێنێ. هەمیشە قوربانیێ مەدەنیێ بیێنێ. جە هەرحاڵەتێوەنە جڤاکی کوردی وەرنیشتنەنە، جڤاکوو عەرەب و سوریانی و مەسیحی پارێزگاریی چا سیستمە جڤاکییە مکەران، کە تا ئیساتێ پەرەشا پنە دان. ئەگەر ورچنیەی بکریۆ و هجووم دژش بکریۆ، ئیرادەو جڤاکی دژوو ئینەیە هەن. ئی ئیرادە جڤاکییە، ئیرادەو گەلی، داعشش ماڕا و ئینەیچە ئیرادێوی شکۆمەندا. ئا ئیرادەنە هجوومە فاشیست و داگیرکارییەکا مدرنۆ. بڕوام پاسنێنە ساعیبوو ئا ئەو باوڕ و هەستیارییەینێ".
