ئەندامەو کۆمیتەو ناوەنڎی پەکەکەی هێلین ئومێدە جە میانوو بەرنامێوە تایبەتوو کەناڵوو مێدیا خەبەرینە هۊرسەنگنایش پۍ ئۆپراسیۆنی شۆڕشگێڵنی هێزەکاو هەپەگەی جە دژوو سوپاو تورکی کەرد.

هێلین ئومێدە جە سەرەتاو قسەکاشەنە واتش، "جارێوەتەر سڵام جە مدرامانی تاریخی ئیمراڵی کەروو. ئێمە پاما وستەن ساڵێوە تازێوە، بە کەمپینۍ شکۆدار پەی ئازاڎیی ڕابەر ئاپۆی و چارەسەری پرسوو کوردی دەسما بە ساڵەی تازۍ کەردەن. حەرپۊکەی متاومۍ واچمۍ کە جە مانگەو یووەموو ساڵەو ٢٠٢٤ینە بە چالاکی پۍ ئازاڎیی جەستەیی رابەر ئاپۆی جە کوردسان، تورکیا و مەنتیقە جیاجیاکا جەهانینە، سیستموو جینۆسایدی جە ئیمراڵینە یاوان بە بنبەست ".

هێلین ئومێدە ئانەش وست ڕووە، کە گرنگا ئا کەمپینە درێژەش پنە بڎریۆ و بەقوەتتەر کریۆ و واتش، "جە کەسایەتی ٥٦٤ کەسایەتیانە کە داواو ئازاڎیی ڕابەر ئاپۆیشا کەرڎەن، گلېرگەو تورکیای زیاتەر جە چارەسەری نەتەوەی دیموکراتیکی نزیک بۆوە".

هێلین ئومێدە باسش چانەی کەرڎ، کە داواکاری ئازاڎیی جەستەیی رابەروو گەلوو کوردی عەبدوڵا ئۆجالانی و داواو هۊرگێرتەی و دمایی ئارڎەی بە رژێموو قڕکەردەی ئیمراڵی بە مەعناو داواو دیموکراتیککەردەی تورکیاین.

'ئەرەگیرەکۍ مەتاوا کوردسانەنە مەناوە'

هێلین ئومێدە ئانەش وست ڕووە، کە ئانەی رۆژەڤوو تورکیای دیاری کەرۆ، جەنگا و پی جۆرە بەردەوامە بیە، "ئینە تەنیا رۆژەڤوو ئارۊی نییا. نزیکەو ١٠ساڵان ئێمە ئینایمۍ دلۍ جەنگێوە فرە دژوارینە. جە ساڵەو ٢٠٠٩ بەدماوە هجومېوە دژوار پۍ سەروو هەڕێمەکا پارېزنای مەدیای ئینا ئارانە و گەرەکشانە کە گەریلای پاکتاو کەرا. نزیکەو ساڵێوەیچا ئێمە بەردەوام واوەیش کەرمېوە و ماچمۍ ئینە پا جۆرە نییا، گەریلا جە کوردسانەنە بەرمەکریۆ، ئانە محاڵا، جە روو کۆمەڵایەتیوە محاڵا، جە روو زانستیوە ڕاش مەشۊنەو مەکریۆ. ناوەنڎوو پارێزنای گەلی، واتە فەرمانڎەکېما چا مژارەنە ئاگاڎیی گرنگشا دا. واتشا، نمەیدۍ. فرەو جاری ئانەشا وات. بێگومان ئانە پۍ هورخەڵەتنای نەبۍ، تەنیا قسۍ نەبۍ. ئێگە کوردسانا. تۆ مەی خاکوو کوردا ئەرەگیر کەری. ئایا ئەرەگیرکەردەیش ئاسانا؟ تۆ هێزێوە ئەرەگیرەنی چی خاکەنە. گەریلا رۆڵەو ئی خاکەینە. شارەزاو گرڎ بستە خاکێوەشا، پارێزگاری جە نیشتمانوو ۋێش کەرۆ. چ مافێوەت هەن بارەگا سەروو ئی خاکیۆ وەش کەری؟ بەهانەکێش حەرچی هەنە با بۆ... چنی متاوی چۍ مەنیۆ؟ چنی متاوی جەنگێوە پا جۆرەیە ڕاوەبەرکەری؟ جە روو کۆمەڵایەتیوە مەکریۆ.

' دەوڵەتوو تورکی زەرەرە گیانیەکاش جە راو گرڎینەی شارۊوە'

هەرمانېوە دژوارەنە کە مشتومڕ سەروو مەردەی مرۆڤەکا کریۆ. ئێمە جە یاۋنەریەکاوە چەمڎاری کەرمۍ. حکومەتێوە هەن پۍ مەنەیۆ دەسەڵاتەکەیش زارۊڵۍ زەحمەتکێشا و هەژارا بە ئاورایی پەروەردە کەرۆ، دماتەریچ پېسە سەروازێوە کە پۍ زەڕی جەنگ کەرۆ، ڕوانەشا کەرۆ. دیما کە بنەیانەکېشا چێروو خێمێنە ژیۋێنۍ. پی جۆرە ناچارکریێنۍ و چۆکشا پنە دریانەرە. بەراسیچ حەیفا، بە شێوېوە ناڕەوا ئا گەنجا، ئەو مرۆڤۍ چی جەنگەنە توشۍ بیېنۍ. ئاخۆ ئا گەنجۍ ئاگاڎارێنۍ پۍ چی چی جەنگەنە بەشداریشا پنەکریۆ و توشۍ کریا؟ سەڎەنە ٨٠ شا ئاگاڎارۍ نیەنۍ. ئێگە کوردسانا و تۆ جە کوردسان و پۍ ئەرەگیرکەرڎەو جوگرافیاو کوردسانی گلېرگەو تورکیای ئاماڎەکریۆ. سەڎەنە ١ و راسی جەنگیچ بە گلېرگەو تورکیای نیشانە مەڎریۆ. راسی مشاریۊوە. بە پاو مەسڵەحەتوو ۋېشا نیشانەش مڎا. ئیسە پەرسوو ئایا پۍ چی دەوڵەتوو تورکی ئا زەرەرە گیانیەشە وەرکۊت؟ ئەنجامەکۍ ئی ئۆپراسیۆنە شۆڕشگێڵنا فرە فرێنۍ. ئاڎۍ ماچا ٩، ئەگەر ئاڎۍ ماچا ٩، کەواتە ١٠ تەریچشا پێزیاڎ کەردۍ. پېسە هێزێوە کە ئینایمۍ جەنگەکەنە ئانەی مزانمۍ. ئێمە واچمۍ وەرووچەماوە ١٠ سەروازۍ مەردۍ، ئاڎۍ ماچا سەروازۍ مەردەن. تەنیا هەواڵوو سەروازۍ وەڵا کەراوە. گەرەکما ئانەی واچوو، دەوڵەتوو تورکی و ئاکەپە-مەهەپەی میکانیزمێوە شاراوەشا هەن. ئیسە چی شاراشۆ، گەرەکشانە چێش کەرا؟ ئامانجشا چێشا؟ دەوڵەتوو تورکی ئنڎە تەنگەتاو بیەن کە جە ڕاوەبەردەی جەنگینە تووشوو دژواری بۆ. گەرەکشا کە سەروو ئاستی میان نەتەوەیی پەشتیوانی هۊرگێرۆ".

'جە ۋەران ۋەروو گەریلاینە مەتاوا ۋێشا گێرا'

هێلین ئومێدە ئانەش وست ڕووە کە جە ئاستوو کتوپڕی جەنگینە سوپاو تورکی مەتاوۆ جە ۋەران ۋەروو هێزوو دایوەنەی و گورزەشاناو گەریلاینە ۋێش گێرۆ و ۋەران ۋەرشەنە مردۊوە و واتش، "جە ئیسەنە ئا ئاگاڎیۍ، کە وەڵتەر جە تەرەفوو گەریلاکاماوە، جە تەرەفوو هێزەکاو پارېزنای گەلیوە دریێبێنۍ، جە هەرێمەکا پارېزنای مەدیاینە بانۍ بە کردار و جابەجێ کریا. واتشا 'شمە لودۍ'، واتشا 'ئەگەر نەلدۍ شمە دلېنە مشدۍ، ئێمە ئاگاڎیتا پنە مڎەیمۍ'. ئیسە ئا ئاگاڎییە جابەجێ کریۆ. سوپاو تورکی مەتاوۆ ۋەران ۋەر پانەی مردۊوە".

هێلین ئومێدە ئاماژەش پانەیچ کەرد کە دەوڵەتوو تورکی سەروو ئاستی میان نەتەوەیی یاوان بە بنبەست و چەقای، پۍ ڕاوەبەردەی جەنگی داواو هێزی و پەشتیوانی کەرۆ و ئەرەیاۋناش، "هاموەخت جەنگ کەرۆ کارت و کەرسېوە سیاسەتی دلېینەنە. پی جۆرە جەنگ جە رۆژەڤەنە مازۊوە و ۋەران ۋەر بە کێشە ئابووریەکا تورکیایچ ماچا 'جەنگ ئینا ئارانە، بە مەڵامەتوو جەنگوو ئیسەیۆ ئاژەکە پی جۆرەنە".

هێلین ئومێدە باسش چانەیچ کەرڎ کە حکومەتوو ئاکەپە-مەهەپەی پی جۆرە پاسەکەرۆ کە گلېرگەو تورکیای دەنگ هۊرنەبڕۆ.

هێلینە ئەرەیاۋناش، "دەوڵەتوو تورکی جەنگێوە ناڕەوا ڕاوەبەرکەرۆ، جەنگوو قڕکەردەی ڕاوەبەر کەرۆ. کورد جەنگوو مەنەی و نەمەنەی و جەنگوو ئازاڎیی کەرۆ. کورد خاکوو ۋێش پارێزنۆ. ۋەروو ئانەی سوپاو تورکی مەحکوما بە دلېنەشیەی".

'پەکەکە تواناو ئانەیش هەن کە جە گرڎ ئاژێوەنە ئا جەنگەیە ڕاوەبەرکەرۆ'

هێلین ئومێدە واتش، "سڵام چا هەڤاڵاما کەروو کە ئی ئۆپراسیۆنە شۆڕشگێڵنیەشا ئەنجامدا. دلۍ ئی ۋەروێنە، پی زمسانە بە ئیراڎەی گەورەی شۆڕشگێڵنانەشا پاسە کەرا کە گلېرگەو تورکیای راسی جەنگی بوینۆ. بە ئێشا، بەڵام ناچارە کە رووبەڕووش مردۊوە. ۋەروو ئانەی دوژمنەکەما جە زۋانۍ تەری مەیاوۊنە. ئامان کوردسانی ئەرەگیر کەرۆ، جە گرڎ مەنتیقۍ کوردسانینە بارەگاش وەشکەردەن. نەک جەپانیشتوو کوردسانی، بەڵکم جە سەرنیشتوو کوردسانیچ بیەو تورکیای رەوا نییا". 

'جە دژوو تاوانەکا جەنگی جە ۋەرنیشت مشۊم سوریا گنۆ جموجوڵ'

جە درێژەو قسەکاشەنە هێلین ئومێدە سەرنجش وست سەرو هجومەکا دەوڵەتوو تورکی پۍ سەروو سەرنیشت و ۋەرکەوتوو سوریای و واتش، "دەوڵەتوو تورکی جە ۋەرنیشتنە تاوانەو جەنگی ئەنجام مڎۆ. وەروچەما دنیێوە ئا تاوانا کەرۆ. ئەگەر شۊنېوە بە نامۍ لاهای بیەیش بۆ، ئەگەر چا دادگېوە تاوانەکا جەنگی بیەیش بۆ، ئەگەر داڎگای میان نەتەوەیی بیەیش بۆ مشۊم گنۆ جموجوڵ. ئەفریقای پانیشت جە ۋەران ۋەروو ئیسرائیلی شەکواش تۆمار کەردە. ئیسە ئیسرائیل وەرگری جە ۋێش کەرۆ.

رژێموو بەشار ئەسەدی، رژێموو سوریای ئەگەر کەمێوەیچ وڵاتەکەشا وەش مسیۆ، ئەگەر دەوروو تورکیای جە گەمەکا دلۍ سوریاینە موینا و گەرەکشانە جە وەران وەروو ئانەینە چێوۍ کەرا، متاوا جە لاهاینە قەزیەش جە دژ کەراوە. چی؟ ۋەروو ئانەی تورکیا لووان دلۍ خاکوو سوریای، ئەرەگیرش کەردەن. گەمەش بە دیموگرافیاکەیش کەردەن. گەلوو رەسەنوو ئا جوگرافیایە واتە گەلوو کوردیش جە ماواو ۋېشەنە هۊرتەکنان. جە یاگۍ ئاڎیشایچەنە چەتەکۍ داعشیش ئەرەنیشتۍ کەردېنۍ. هەڵای پارێزنای جە ئیخوان موسلمینی کەرۆ، پېسە ڕاوەبەروو داعشی و ڕاوەبەروو حەماسی جمۊوە. ئێمەیچ ئانەی موینمۍ. ئایا ئانۍ کە سیاسەتوو جەهانی بەراڕاوە ئانەی مەوینا؟ ئا پرسیارۍ جە گرڎی کەرمۍ.

ئا جوگرافیایە بێ ساحێب نییا. ۋەرنیشتوو کوردسانی هینوو کوردەکان. جوگرافیاو کوردان. چا تاوانە دژوو مرۆڤایەتی ئەنجام مڎریۆ، تاوانەو جینۆسایدی ئەنجام مڎریۆ، گەرەکما ئانەی واچوو. کۆچبەرکەردەی مرۆڤەکا جە ماوا و نیشتمانوو ۋېشانە ئەگەر جە غەززەنە تاوانەنە دژوو مرۆڤایەتی، جە عەفرین، سەرێکانی و گرێ سپیچ تاوانەنە دژوو مرۆڤایەتی".