هەپەگە بە ئەرەیاۋنێوە یاڎو گەشمەرڎا مەتینایش کەردۆ و واتش: "هەمڕێیاما چەکڎار، بۆتان و ئۆزگور بە بێ دووەدڵی بە فیداکارییوە پەی ئەرەکۊشای ئازاڎیی گەلەکەیما جەنگشا کەرد. بە ڕێزداری، پنەزانای و عەشقۆ جە ساڵوەگەڕو گەشمەرڎەبیەیشانە یاڎشا مکەرمێوە."
ئەرەیاۋناو مېیانی و ئەرەیاۋنای و چاپەمەنی هەپەگەی پێوەس بە گەشمەردا مەتینایۆ پی جۆرەنە:
"جە ڕۆو ٢٧و ئابو ٢٠٢١ینە جە هەرێمو کەشو هەکارینە جە مەتینا جە هرووژم و سوپاو تورکی ئەرەگیرینە، جەنگاوەرا ئاپۆیی هەمڕێ سەنگینێما؛ چەکڎار خەلیلا، بۆتان سێگرکێ و ئۆزگور تۆڵهەڵدان گەشمەرڎۍ بیۍ. هەمڕێما چەکڎار، بۆتان و ئۆزگور بە بێ دووەدڵی بە فیداکارییوە پەی ئەرەکۊشای ئازاڎیی گەلیما جەنگشا کەرد. بە ڕێزداری، پنەزانای و عەشقۆ جە ساڵوەگەڕو گەشمەرڎەبیەیشانە یاڎشا مکەرمێوە و قەول مڎەیمۍ ئەرەکۊشایشا بیاونمۍ بە سەرکۊتەی.
ڕۆڵەی بەقیمەتوو هۆزو خەلیلامانی هەمڕا چەکڎار بە باوەڕداریێوە قەوەتۆ دڵسۆزو ئەرەکۊشای ئازاڎیی گەلەکەیما بۍ کە بە سەرمەشقایەتی ڕابەر ئاپۆی و پارتیما (پەکەکە)ی ڕاوەبەر مکریۆ. جە گرڎ ساتێوە ژیۋایشەنە بە فیداکارییوە ئەرەکۆشا و ئینەش کەردەبۍ بە سیمبولی بنەڕەتی ژیۋای ۋێش. هەمڕاما چەکڎار بە ژیۋای، هەڵوێس و هەمڕایی قەوەتیشۆ بی بە جەنگاوەرێوە ئاپۆیی و کە پەی گرڎوو هەمڕاکاش بیە بۍ بە نمونە. جە گرڎ شۆنێنە هەمڕا چەکڎار پېسە پراکتیزەکارێوە ئاپۆیی بەرگنۍ و ئی تایبەتمەندییەو ۋێش جە گرڎ یاگێنە پەی هەمڕایاش بەروزۍ. فیداکاریش پېسە شێوازێوە ژیۋای پەسینا و تا ساتو گەشمەرڎەبیەیش جە فیدایەتی پەشیمان نەبیۆ.
جەنگاوەری حەقسان و ئازاو هۆزی گۆیی وڵاتپارێزنما و هەمڕاما بۆتان، دژوو سیاسەتو دژمنی کە پەی پارچەکەردەی ئەرەکۊشای ئازاڎیی گەلەکەیما ڕاوەبەرش مکەرۆ، توڕەیۍ فرەش بۍ. هەمڕاما ئا توڕەییەو ناخیش فاڕاش پەی ئەرەکۊشایۍ ماناڎاری و ئاما پەی کەشەکا کورڎەسانی و بەشدارو دلۍ ریزەکا گەریلای بی. هەمڕاما باوەریش چامنەبۍ کە تەنیا پی جۆرە متاویۆ ئا خنجەرۍ کە دڵوو گەلەکەیمارە چەقێنە، بەرمێوە و بۆ بە دەرمان. پی جۆرە بی بە خاوەنو ئەرەکۊشایۍ بەردەوامی. هەمڕاما جە چڼین هەرێمێنە گەریلایەتیش کەرڎ و پی جۆرە بی بە گەریلێوە قارەمان. بە هەڵوێسەکاش جوابێوە قەوەتش دا بە سیاسەتو پارچەکەردەی گەلەکەیما. پی خسوسیەتا ۋێشۆ بی بە جەنگاوەرێوە نمونەیی پەی گرڎوو ئا جوانا کورڎی کە دڵشا پەی ئازاڎیی مڎۆ ۋنە.
هەمڕاما ئۆزگور بە دانایی جە پراکتیکییۆ، توانێوە بێهامتا بەخشۍ بە هەمڕاکاش و بە ڕووە وەشەکێشۆ جە دڵو هەمڕاکاشەنە یاگۍ ۋێش گێرۍ. بە ژیۋایۍ پەڕ بە ماناو نامەکۍ ۋێش کەشەکا کورڎەسانیرە گێڵا. هەر کاتێ پەنەوازش کەردەبیۍ جە مەڕەکا مڎرامانینە هەرمانە کەرۍ. چا کاتەنە پەنەوازش کەردەبیۍ جە چالاکیەکانە عەگیدێوە بۍ کە تەرسی وزۍ دڵو دژمنی و بڕۍ وەختیچ سەرمەشقۍ بۍ کە هەمڕاکاش یاۋنۍ بە مېڎانەکا ئەرەکۊشای. هەمڕاما ئۆزگور بە ئایدیا و باوەڕداریێوە بەرزۆ ئاما کەشەکا کورڎەسانی و بی بە خاوەنو ژیۋایۍ ماناڎاری. بە دڵسۆزی و ئەرەکۊشایش پەی ئازاڎیی بی بە میلتانێوە نمونەیی پەی هەزاران جوانا کورڎەسانی.
جارێوەتەر جە ساڵوەگەڕو گەشمەرڎەبیەیشانە، بە ڕێزداری و عەشقۆ یاڎو هەمڕێما چەکڎار، بۆتان و ئۆزگوری مکەرمێوە. سەرەوەشی ۋێما پەی بنەیانەی بەقیمەتو هەمڕایاما و گەلی وڵاتپارێزنو کورڎەسانیما بەربڕمۍ.
زانیارییەکۍ دەربارەو ئشناسنامەو هەمڕا گەشمەرڎەکاما پی جۆرەنە:
ناسنامۍ / چەکدار خەلیلا
نامۍ و دمانامۍ / عومەر سالگور
شۊنەماو جە ئەڎابیەی / وان
نامۍ ئەڎۍ و نامۍ تاتەی / خەزال – حوسەین
شۆنەماو کاتو گەشمەرڎەبیەی / ٢٧و ئابو ٢٠٢١ / مەتینا
*****
ناسنامۍ / بۆتان سێگرکێ
نامۍ و دمانامۍ / سادق گوڤەرجین
شۊنەماو جە ئەڎابیەی / شڕناخ
نامۍ ئەڎۍ و نامۍ تاتەی / مەرجان – ئەمین
شۆنەماو کاتو گەشمەرڎەبیەی /٢٧و ئابو ٢٠٢١ / مەتینا
*****
ناسنامۍ / ئۆزگور تۆڵهەڵدان
نامۍ و دمانامۍ / ئەحمەد محەمەد
شۊنەماو جە ئەڎابیەی / نسێبین
نامۍ ئەڎۍ و نامۍ تاتەی / حەزینە – عەبدولرەحیم
شۆنەماو کاتو گەشمەرڎەبیەی /٢٧و ئابو ٢٠٢١ / مەتینا
*****
