جە ئەڎا بیەو ڕابەر ئۊجالانی جە ئەڎا بیەو قوەتو ڕۊشناییا جە ۋەران ۋەرو تاریكینە!، جە ئەڎابیەیش زینڎەبیەیۊ عەشقو ژیایا ۋەران ۋەرو زیهنیەتو مەرگ دۊسینە! جە ئەڎابیەو ڕابەر ئاپۊی جە ئەڎابیەو ئازاڎییا، پەی ئازاڎیی! جە كتێبو ۋەرگیری کەرڎەی جە گەلێنە ڕابەر ئاپۊ ماچۊ:"حەركەسۍ یا گلېرگېۋە یا نەتەۋێۋە بە جەنگو ئازاڎیی ۋێشۊ نەبۊ، گرڎو هێزو دنیۍ مەتاۋۊ نەجاتش بڎۊ! پۊکەی حەقیقەت عەشقا و عەشقیچ ژیۋایۍ ئازاڎ. زەرورا گرڎو ئا مرۊڤا كە جە ئارۊنە ۋەردەوام داواو ئازاڎ كەرڎەو ڕابەر ئۊجالانی مکەرا پێۋیسا سەرەتا ۋێشا نەجاڎ بڎا! چوونكی سحرو فەلسەفەو ڕابەر ئاپۊی ئینا چېرو ئی تیۊریەینە.

‌‎ ماچا گالالییۊی ۋاتەن حیچ کەسۍ نیا کە بتاۋۊ چێۋۍ فێرو کەسۍ تەری کەرۊ، بەڵکم تەنیا ھامکاری کەسەکەی مکەرۊ پۍ وشیارکەرڎەیۊ ئانەی کە ھاەناوشەنە ھەن. ئازاڎیچ بەھېۋەن حیچ کەسۍ مەتاۋۊ بە تەمامی خۊتانکەرڎەیش چنە کەرۊ. کەس مەتاۋۊ بەخشۊنەش بە کەسۍ یا گروپېۋە. بەڵکم تەنیا ھامکاری کەسەکا مکریۊ پۍ وشیارکەرڎیۊ ئا میقدارە سنووردارکریا جە ئازاڎیی کە هەناوشانە ھەن. کەجەکە چا راسییەیە عال یاۋانەنە کە تەمامو هێزو دنیۍ وزینە ھەرمانە پۍ ئازاڎ کەرڎەو کۊیلېۋە ئەگەر نەتاۋی چا پنتەو دلۍ هەناویشەنە دەسپنەکەری پۍ ئازاڎ بیەی، رەنجەکەت خەسار مشۊ. پۊکەی فەرهەنگو کەجەکەینە چەمکو ئازاڎیی مەعنېۋە جیاش ھەن چانەی کە فرەیما یاۋێنمېشەنە. ۋەختۍ ئەحمەڎیی موفتیزادە جە زینڎانەنە ئازاڎ بۊ، موفتیزادە ماچۊ؛"تەمامو قودرەتو دنیۍ گنۊ ھەرمانە پۍ زینڎانیکەرڎەو کەسۍ ئازاڎیی، مەتاۋا زەڕێۋە جە ئیراڎەو ئازاڎیی کەمکەراۋە". ئی جۊرە جە ئازاڎیی چێۋێۋی نەواخنین. ئینا هەناوو ئینسانەکانە. پەیوەنڎیش بە یاگۍ و جەستەیۊ نیا. فرەو جارا ڕابەر ئاپۊ جە زینڎانۊ بە ھامڕا خەباتکارەکا جمیەرو ڕزگاریوازو کورڎسانی ۋاچۍ؛"لودۍ ۋێتا ئازاڎ کەرڎۍ، خەمو منتا نەبۊ". پی پیمەرەو ئازاڎیی کە جە هزرو خەباتکارا کەجەکەینە ھەن، ئا دەیان هەزار خەباتکەرەی کە جە زینڎانەکا دۊڵەتو ترکی وئېرانی و ۋڵاتا تەریچەنە هەنۍ، تەنیا بە جەسە گیریێنۍ ئەما بە رۊحو ئیراڎە ئازاڎێنۍ. ھەمان ۋەختیچنە ئا ملۋێنان کورڎەی کە جە ئەنجامو" تەرسۍ یان تەماحۍ" تەسلیم بە ویست و ئیراڎەو ئەرەگیرا بیێنۍ و بە جۊرێۋە پەیۋەس بە ژیای کۊیلایەتی مۊدێرنەی بیێنۍ؛ ئەگەر رواڵەتیچنە ئازاڎۍ باو بتاۋا بە تەیارەیچ گێڵاو ۋڵاتا کەرا، بەڵام حەقیقەتەنە ئاڎۍ ئازاڎۍ نیەنۍ..

فەلسەفەو کەجەکەینە، ئەگەر کەسێۋە گەرەکش بۊ بیاۋۊ پلەو ئازاڎبیەی، ئەشۊ تاۋۊنە سەرو یەرۍ جۊرا جە تەرسېنە زاڵ بۊ. یاخود کریۊ ۋاچمۍ ئەشۊ جە ملەملانۍ ژیاینە یەرۍ ئاژۍ ۋێڕسکۍ و فرە بەقوەتۍ جە ژیای ۋێشەنە بەزنۊڼە. یوۋەم: ئەشۊ ئا کەسە تەرسەو نان پەیڎاکەرڎەی جە ۋێشەنە دلېنەبەرۊ. پێویسا خەمو نانی و وارڎەی و ئیسراحەتی مادیی و ژیای ئاسایش نەبۊ. ئینە مەعناو ئانەی نییا کە نەژیۋۊ و نان نەۋەرۊ. مەعناو تەمەڵیی و وازئارڎەی جە ھەرمانۍ و پەیڎاکەرڎەو مەعیشەتیچ نییا. بەڵام مەبۊ بە حیچ جۊرێۋە تەرسیش جە نانی و ئیسراحەتی بۊ. مەبۊ پەی حیچکامی حیچ تەنازولێۋە کەرۊ. دووەم: ئەشۊ غەریزەی سێکسی بەتەمامی جە ۋێشەنە کۊنترۊڵ و هامسەنگ کەرۊ. ئینەیچ مەعناو رەبەنی و دەست جە (سێکس)ورگېرتەی تەمامی نییا؛ بەڵکم بە ماناو ئانەی مۍ کە مەبۊ بە مەڵامەتو سێکسیۊ بە حیچ جۊرێۋە حیچ تەنازولێۋە جە خەباتی و هەوڵدای پۍ ژیای ئازاڎیی کەرۊ. بە ماناو ئانەینە نەبۊ بە کۊیلەو ئا جۊرە جە ژیای کە بازاڕو سەرمایەداری دەورش پنە دان و بە نامۍ ئازاڎییۋە نیشانەو خەڵکی دریان. هەزاران کوڕۍ و کناچۍ گەریلۍ حەر بە فیعلی و بەراسیی مەسەلۍ سېکسیشا نیان لاۋە، بەڵام ئانە رەوشێۋە تایبەتا و تەنیا ئا کەسێنۍ کە ۋێشا تەسلیمو ئا جمیەرە ئازاڎیوازەیە کەرڎەن. کۊو گرڎی خەڵکی و فرەینەو خەباڎکارا دلۍ سیستەمو کەجەکەی پەیڕەوی جە ژیای ئاسایی، جە چۋارچێۋەی هامژینی ئازاڎیی مکەرا. بەڵام ئا کەسۍ کە متاۋا بیاۋا بە پلەو ئازاڎبیەی، ئیتر خېزان و سێکس لاشاۋە بە حیچ جۊرێۋە مەبۊ بە راگیر جە ۋەردەوامیشا سەرو ڕاو ئازاڎیی. یەرەم:  جە گرڎی زەرورتەر، تەرسینە جە مەرڎەی. کەسۍ کە گەرەکشبۊ  ئازاڎ بۊ، ئەشۊ مەرڎەیش تاقیکەرڎەبۊۋە و سیحر و تەرسەو مەرڎەیش پوچ کەرڎەبۊۋە. حەچکەسۍ جە مەرڎەی تەرسۊ مەتاۋۊ رێبوارو ڕاو حەقیقەتی و عەشقی و ئازاڎیی بۊ. ئی پەی لوایە فرە دژا چنی یاۋاینە ئایینییەکەی کە بە حساب مەرڎەی بۊ بە مەڵامەتو تەسلیمبیەی ئینسانی بە حەقیقەتی. تەنانەڎ بەعزۍ شرۆڤۍ ئایینیۍ وشۍ "یەقین"ی ۋەران ۋەرو وشۍ مەرڎەینە منیارە. جە راسینە تەرسی جە مەرڎەی ئینسانی وێڵ و گومرا مکەرۊ. مکەرۊش بە کۊیلە. کەسۍ کە جە مەرڎەی نەتەرسۊ متاۋۊ بەرەو ئازاڎبیەی ھەنگامە ھورگېرۊ..

جە قۊناغێۋی تەرەنە، کەسانۍ کە ئازاڎۍ بیێنۍ یان سەرو ڕاو ئازاڎیی ۋەردەوامۍ بیێنۍ؛ ئەگەرو ئانەیشا ھەن کە بتاۋا ئا ماتەوزەو ئازاڎیی کە ئینا هەناوو خەڵکینە، وشیارش بکەراۋە و پېسە ۋێشا خەڵکی وزا سەرو ڕۍ پۍ ئازاڎبیەی. ئا جۊرە جە ئازاڎیی کە هزرو ڕابەر ئاپۊینە هەن، بە رواڵەت و بە پیمەرو سەردەمی ئازاڎیی نییا. چونکی پەڕا جە ۋەرپرسیاریی و حەوڵدای، پەڕا جە شەونخونیی و فیڎاكاری و ئیستاتیكا و ورڎەکاریی. پۊکەی پێناسەو ئازاڎیی جە هزرو کەجەکەینە یەکسانە بە ۋەرپرسیاری. کەسۍ ۋەرپرسیارۍ ئازادێنۍ. ئی جۊرە جە ئازاڎیی راسەوراس دژوو فەوزای و بۍ سیستەمییا. جە راسینە کەسۍ ئەگەر خەمو نانی و سێکسی و مەرڎەیش نەبۊ، ئیتر حیچی تەر مەمەنۊ جەنگش پۍ کەرۊ بێجگە جە بەهێۋۍ مرۊیی گۊرەی کە ئازاڎییا. جارێۋی تەریچ گەرەکما ئانەی ۋاچو کە جە سەرەتاو ۋەشبیەیشۊ تا ئارۊ، کەجەکە تەنیا ئامانجێۋەش بیەن کە ئاڎیچ ئازاڎییا. کەجەکە قەناعەتش چانەن، ۋەختۍ ئینسان ئازاڎبی، ئیتر متاۋۊ چارەنۋیسو ۋێش دیاری کەرۊ. متاۋۊ شێوازو ژیای ۋێش ھورچنۊ. ئانەی کە ئیسە گلېرگەنە ۋینمێش جۊرێۋەن جە ژیای کە پێما دیارییکریان؛ سەرمارە سەپیان، لاماۋە شیرین کریان، ناچارکریێنمۍ کە بڕەمۍ شۊنیشەرە. کەچی فرەو جاری ئا جۊرە جە ژیای ناچاریی و زەلیلیی و پەڕ جە درواما بە نامۍ ئازاڎییۋە پنە ورەشاۋە..

کەجەکە چنی چەمکو ئازاڎیی و پۍ شکڵگێرتەی و پنەیاۋنای ئازاڎیی، چەمکو مدرامانی وەڵۍ وزۊ. کەسۍ گەرەکش بۊ ئازاڎ بۊ و جە مەرڎەی و نانی و خېزانی نەتەرسۊ، ئیتر ژیایش بە تەمامی بۊ بە مدرامان. دروشمەو"مدرامای ژیۋاین" راس گوزارشتا چا ئاژەی کە مرۊڤێۋی ئازاڎ چنەشەنە مژیۋۊ. ئیتەر ژیایش گرڎ بیەن بە مدرامای. چی بەینەنە، نامۍ ساکینە جانسزۍ ۋەرجەسڎەو یۊبیەی چەمکو ئازاڎیی و مدرامانی مکەرۊ. جە زینڎانەکانە مدرامانۍ پاسە ۋەرجەسە مکەرۊ، جەللادەکا دڵنیا مکەرۊۋە کە ئا کەسەی جە راسینە ئازاڎەنە ساکینەنە نەک جەللادەکۍ. ئانەیچ کە زینڎان و کۊیلە و بێئیراڎەن جەللادەکێنۍ نەک ساکینە..

جە مەیڎانی پراکتیکینە، دیسان مەسەلەکۍ پا رەهایییە نیەنۍ کە بتاۋا کەسۍ یان جەمۍ جە خەڵکی بەتەمامی ۋێشا بڕارە چا دنیۍ کە کۊیلایەتی و زەلیلیش بە نرخەو ئازاڎیی بە خەڵکی ورەتەن. بەڵام هیوا و ھومېڎو ئازاڎبیەی ۋەردەوامی جە فەرهەنگو ئا جمیەرەینە بیەن. پېسە چنڎین جارا تەریچ نۋیسیان، تاکە ئامانجۍ نەفاڕیاو سابتو کەجەکەی جە ئەۋەڵو ڕۊیۊ تا ئارۊ  تەنیا بریتی بیەن جە ئازاڎیی. ئانەیچ بیەن بە مایەو سەروستەو ئا تەڤگەرەیە کە قەرارشدان ئا پنتەو ئازاڎیی  هەناوو خەڵکینە بێزۊۋە و ئاشناشا کەرۊ بە ئازاڎیی. ڕابەر ئاپۊ ڕێبوارێۋی ڕاو عەشقی و ئازاڎیین، جە ئەڎابیەو ڕابەر ئاپۊی جە ئەڎابیێۋە فیزیكی نییا! ئانڎەی جە ئەڎابیێۋە تازەن پەی مەعنا كەرڎەی و پێناسەكەرڎەیۊ حەقیقەتو ژیای، جە ئەڎابیەو ڕابەر ئاپۊی جە ئەڎابیەو گۊرانیە و ئازاڎیینە.

ھ . ش‌‎