بە واچەو سەرچەمېوە یۆ جە بنکەکا دەنگدای جە ناحیەو ریازی سەر بە قەزاو حەویجەی، ئەفسەرێوە جە پێکئاماو عەرەبی چەمدار و نوێنەراو قەوارە سیاسیە کوردییەکا سەروو سنووقەکا دەنگدانیۆ دوورۍ وزۊوە و هەڕەشېشا ۋنەکەرۆ.
پڕۆسەو دەنگدای تایبەتوو هۊرچنیەو ئەنجومەنوو پارێزگاکا عێراقی بەردەواما و بە قسۍ سەرچەمېوە تایبەتی پۍ ئاژانسەکەیما کە جە قەزاو حەویجەی، یۊجە بنکەکا دەنگداینە جە ناحیەو ریازی ئەفسەرێوە عەرەب چەمڎارا و نوێنەراو قەوارە سیاسیە کوردییەکا سەروو سندووقەکاو دەنگدایۆ دورۍ وزۆوە.
بە قسۍ ئا سەرچەمەیە، ئەفسەرەکە چېروو نامۍ هەواڵگریی و ئاسایشی نیشتمانیی عێراقینە هەڕەشۍ جە چەمڎارا و نوێنەراو لایەنە سیاسیە کوردییەکا کەرۆ و وێنە و ڤیدیۆشا تۆمار کەرۆ.
وەڵتەریچ شێرزاد سەمەد وەرپەرسوو بەشوو هۊرچنیەو یۊبیەی نیشتمانیی کوردسانی (یەنەکە) بە ئاژانسەکەیماش ئەرەیاۋنا، "جە مەنتیقە کوردنشینەکاو کەرکوکینە بەشێوە جە ئامێرەکاو دلۍ وێستگەکاو دەنگدای جە هەرمانە کۊتېنۍ و پانەیچ گومانەو ئانەی وەشەبیېنە کە ئینە حۊڵۍ بۆ پۍ کەمکەرڎەیۆ رێژەو دەنگوو کوردی چا پاڕێزگانە".
واتیچش، سەرەڕاو گرڎوو وەبەس و لەمپەرەکا کە بەشێوە جە تورکمانی و عەرەبە شۆڤێنییەکا وەششا کەرڎەن، تا ئی وەختە ژمارېوە وەرچەم جە کوردی بەشداریشا جە دەنگدای تایبەتینە کەرڎەن.
قەرارا ڕۊو ١٨و ئی مانگۍ دەنگدای گرڎیی هۊرچنیەو ئەنجومەنوو پارێزگاکا عێراقی بلۊڕاوە و لایەنە کوردیەکۍ بە چن لیستێوە حۊڵوو بەدەسئارڎەی بەشێوە جە کورسیەکا ئەنجومەنوو پارێزگاکا نەینەوا، کەرکوک، سەڵاحەدینی و دیالەی مڎا.
جە پارێزگاو کەرکوکینە کورد بە چن لیستێوە بەشدارا چا هۊرچنیەینە و وەڵتەر تەڤگەروو ئازاڎیی گلېرگەو کوردسانی داواش جە دەنگدەرا و لایەنگراش کەرڎەبۍ دەنگ بە کاندیدەکاو هامپەیمانی 'کەرکوک هێز و ئیرادەیمانە'ی بڎا، کە جە هامپەیمانی بەینوو یۊبیەی نیشتیمانی و پارتوو شیوعی پێکمۍ.
