تیموو ئاماڎەکەرڎەی (هۊرگېڵنی کوردی-هۆرامی پەی کوردی-زازاکی / کوردی-زازاکی پەی کوردی-هۆرامی) جە یۊوەم وەڵاکراوەشە هەنە ئاماژەش پانەیە کەردەن کە جە ٨و ئایاریوە هۊرگېڵنەکەشا بە ١٨٠٠ واچۍ و ١٤٠٠ ڕستۍ وەڵاکریانۆ. داوایچشا جە کەسا 'دڵسۊزی' کەردەن "بە کیاستەی داتاو فەرهەنگە کوردییەکا ۋێشا بە شێوەو وۆرد/ئێکسڵی بەشداری ئی پڕۆژەیە بکەرا و فراوانتەرش بکەرا."

دەقوو وەڵاکەرڎەکەی:

#هۆرامی_زازاکی 

#زازاکی_هۆرامی

یەکەمین ۋەڵاکەرڎەی

(هۊرگېڵنی: ک.هۆرامی پەی ک.زازاکی  و  ک.زازاکی  پەی ک.هۆرامی)

ئارۊ (٢٠٢٤/٠٥/٠٨) بە هۊرگېڵنای زېیاتەر چە هەزار ۋاچۍ و یەرەسەڎ دەسەۋاچۍ بنەڕەتیۍ زازاکیۍ پەی هۆرامی هۊرگېڵنی (هۆرامی-زازاکی /زازاکی-هۆرامی) ڕاکۆت. 

بە هېمەتو دڵسۊزا ڕۊبەڕۊ ئی هۊرگېڵنە شان بە شانو پڕۆژە دیجیتاڵییەکا تەری ئاسانکاری و خزمەتگوزاری بە وانیارە کورڎیی-زۋانەکا (لوڕی تاکو لەکۍ و کەلهوڕی و هۆرامۍ و سۆرانۍ و کورمانجۍ و زازایۍ ) کەرۊ؛ پەرەپنەدای ئی هۊرگېڵنەیە یان هەر پڕۆژېۋی تەرو دیجیتاڵیزە کەرڎەی زۋانە کورڎییەکا بەتاییبەت زۋانی هۆرامی و کەلهوڕی و لەکی و لوڕی و زازاکی و دیالێکتەکاشا ئەرکو گرڎ کەسېۋی دڵسۊزی هەن، کە وېش ۋەراۋەرو کۊمەڵەکېش و زۋانی ئەڎایی وېش ۋەرپەرس بزانۊ.

هەرپاسە ئېمە (چالاکۍ هۊرگېڵنە کورڎییەکا) هومېڎوازۍ هەنمۍ، کە کەسانۍ دڵسۊزۍ تەرۍ بە بەشداری چالاکانە وېشا و بە کېیاستەی داتاو فەرهەنگاشا ئی پڕۆژا تەسەلتەر بکەرا.

بەکاربەرۍ بەڕێزە، بەکاربەری بەڕێز، 

ۋەرو ئانەی، کە چە ئارۊنە هۆرامی-زۋانەکۍ و زازا-زۋانەکۍ بە دۋۍ ئەلفابێتۍ جېیاۋازۍ منۋیسا و مواناۋە، ناچار بەشی زازاکی هۊرگېڵنەکەی بە هەر دۋە ئەلفابێتەکە نریانەرە، تاکو هەمکات هۆرامی-زۋانەکۍ و زازاکی-زۋانەکۍ بتاۋا چە هۊرگېڵنەکەنە بە ئەلفابێتە جېیاۋازەکا وېشا بنۋیسا و بواناۋە. بە ۋاتێۋە تەرە، هەمکات دۋۍ هۊرگېڵنۍ هەنۍ، یەکەمشا هەم بەشە هۆرامییەکەش و هەم بەشە زازاکییەکەش بە ئەلفابێتی (ئارامی) نریێنېرە و دوەمشا بەشە هۆرامییەکەش بە ئەلفابێتی (ئارامی)، بەڵام بەشە زازاکییەکەش بە ئەلفابێتی لاتینی نریانەرە.

پەی بەکاربەرڎەی هۊرگېڵنەکەی بە ئەلفابێتی (هۆرامی و زازاکۍ بە ئارامی) سەرو ئا لینکەیە کلیک کەرڎۍ:

https://lingojam.com/embed/Horami-ZazaTranslator

پەی بەکاربەرڎەی هۊرگېڵنەکەی بە ئەلفابێتی (هۆرامی بە ئارامی و زازاکۍ بە لاتینی) سەرو ئا لینکەیە کلیک کەرڎۍ

http://lingojam.com/embed/Kurdish-zaza-Kurdish-horami-Translator