کەمپینوو "ئازاڎیی پەی عەبدوڵا ئۆجالانی، چارەسەری سیاسی پەی پرسوو کوردی" بە چالاکی جۊراو جۊر بەردەواما، چالاکی 'ڕوەکا ۋەنایۆ کتېبەکا عەبدوڵا ئۆجالان'یچ یۊن چا چالاکیا. هەر چا چوارچېوەنە خەڵکوو سەرنیشت و ۋەرکەوتوو سوریای بە شێوێوە چالاکانە بەشدارۍ ئی کەمپینەیە بێنۍ و ژەنا بەرهەمەکاو ڕابەروو گەلو کوردی عەبدوڵا ئۆجالانیشا ۋەنێوە و ۋەڵاکەرڎەیۆ پارادایېمەکاشا بە ئەرکوو ۋێشا زانا.

جە گەڕەکەو غەربی قامیشلۆینە ٢٥ ژەنۍ دلۍ حۊت گرووپانە کوۍ بیێوە، کتێبوو سۆسۆلۆژیایی ئازاڎییشا ۋەناوە و دماتەر گفتوگۆشا سەر کەرد. ژەنا بەنامۍ 'ئەنایاوای جە سیستموو شارستانیەتی دیموکراتیک'ی پەیلوای ۋێشا سەروو مژارەکەی باسکەرد و ۋیرکەرڎەیۆ ۋێشا پنە بەقوەتتەرکەرد.

'کۊشیای گلېرگێوەر دیموکراتیکیش ڕاوەبەر کەرد'

جە گرووپەکەنە پەروین جەمیل-ە مافوو قسەکەردەیش هۊرگېرت و واتش: "مەکریۆ دیموکراسی، دادپەروەری و یەکسانی جە یۊترینی بڕمێرە. ڕابەر ئاپۆ ئی چەمکېشە جە کتێبەکا ۋێشەنە بە قوڵی باسکەردەن. هەر پېسە ئانەی چا یاگێنە یۆ چا یەرا بیەیش نەبۆ، ئانە باسکەردەی چەویشای تەری هیچ مانېوە مەیاونۆ. ڕابەر ئاپۆ ئی پێناسەشە جە واقعەنە ئارد ئاراوە و پەی ئەرەمەرزنای ژیۋایۍ دیموکراتیکی کۊشیا. پۊکاتی ئێمەیچ بە ۋەنایۆ بەرهەمەکاو ڕابەر ئاپۆی هەنگامە بەرەو بنیاڎنیای گلېرگێوە دیموکراتیکی، دادپەرەوەری و یەکسانی هەنگامە منیەیمۍ."

حەرپاسە یووەتەرە جە بەشدارا چالاکیەکەی بەنامۍ فاتمە عومەری قسێش کەردۍ و ئاماژەش پانەی کەرد، "ئارۊنە پارادیمەکۍ ڕابەر ئاپۆی جە گرڎ وەختۍ زیاتەر وەڵۍ بیێنۍ. پۊکەی چی گلېرۊبیەیەمانە بە پیمەرەکا فکری ڕابەر ئاپۆیۆ گفتوگۆ سەروو پیمەرەکا گلێرگەی دیموکراتیکی مکەرمۍ. بنیاڎنیای شۆڕشوو ۋەرنیشتی فکر و پارادیمەکۍ ڕابەر ئاپۆینۍ."

جە ڕاوەبەری کۆنگرە ستاری گەڕەکەو خەربی قامیشلۆینە ڕۆمەدینا بەشێرە باسش جە گرنگی بەرهەمەکا ڕابەروو گەلو کوردی عەبدوڵا ئۆجالانی کەرد و واتش "چی ڕێوە حۊڵمڎەیمۍ عالتەر جە فکرو ڕابەر ئاپۆی بیاومېنە. پارادیمەکاو ڕابەر ئاپۆی پەی گلېرگێوە ئازاڎیی و ژەنۍ پرۆژەی فرە دۊڵەمەنڎ پێشکەش مکەرۆ. جە سەیەو کۊشیای هوشیارانەو ژەنێوە ئارۊنە ژەنی پەی ئازاڎیی ئەرەکۊشۆ و قوربانی مڎۆ. پۊکەی پێویسا پەی ئازاڎیی جەستەی ڕابەر ئاپۆی کۊشیای بەقوەتتەر بکەرمۍ."