ئەڎاو گەشمەرڎە یلدرمی، زەینەت یلدرم کە کوڕەکەش جە تەرەفوو سوپاو تورکیوە گەشمەرڎەکریا، ئاماژەش پانەی کەرد کە پێویسا ئیتر هیچ کەسۍ جە ۋەرا ۋەروو ئی ستەمەینە بێدەنگ نەبۊ و واتش: "با ئیتر دەوڵەت نەواچۊ واڵە و برایا کوردیما، جە وەختێنە کۊمکوژێما مکەرا."
ئەڎا و واڵۍ محمەد یەلدرم (سۆفی) کە لجێنە جە تەرەفوو سوپاو تورکیوە گەشمەرڎە کریا. پەی ئاژانسوو هەواڵوو فوراتی (ANF)ی قسېشا کەردۍ و باسشا جە ساتەوەختوو ڕووەداکەی کەرد.
قودرەت چەلیکە واڵۍ گەشمەرڎە محمەد یلدرمی باسش چانەی کەرد وەڵۍ ئۆپراسیۆنەکەی ترۊمبێلێوە سەروازی ئاما ۋەروو دەم و دەگاکۍ و دماتەر هێزوو سوپۍ ئاماڎۍ بیۍ و جە گرڎوو دەگاکېنە وەڵۍ بیێوە و پی جۊرە بەردەوامە بۍ جە قسەکاش: "هەرکە دەنگوو ترۊمبێلەکاما ئەژنی یاوایمێنە چێوۍ ڕووە مڎۆ، بەڵام نەزانام پەی ۋشکنای یانەکان. وێرەگا وەختەبۍ، ڕۆ بەرەو تاریک بیەی لووۍ. دماو چارەکێ دەنگوو تەقەیما ئەژنی و ڕاسەوخۆ یانەشا گوولە ۋاران کەرد. پەی دڵنیایی ۋێما زاوڵەکېما جە یاگېنە شارتێوە. سۆفی برایچم چا وەختەنە حۊل دۍ بیاوۆنە چانەی کە چێش ڕووەمڎۆ. دماتەر حۊلوو ۋێپارېزنایش دا و حۊلش دا جە پەشتەو یانەیۆ ۋێش قوتاربکەرۆ، چا وەختەنە گولۍ ۋەرو سۆفی گنۆ و گەشمەرڎە بۆ. هەر چا وەختەنە بە بەردەوامی دەسڕێژوو گولا جە یانەکا کریۍ، پۊکەی حاڵیما نەبۍ چێش ڕووە مڎۆ. دماو ئانەی تەقەکەردەی مردا، یانەنە زیایمېرە، گریمانەو ئانەی کەرێنمۍ کە سۆفی بە زامڎاری جە دەگاکېنە بەرشیەبۆ. پۊکەی تا دێرێچ نەزاناما سۆڤی گەشمەرڎەبیەن تا ئا وەختەی کوڕەکەم کە جە ئامەدەنە ۋانۍ نیمەو شەوۍ گېڵاوە و پنەش واتیمۍ لالۊم گەشمەرڎەبیەن."
چەلیکە جە دمایی قسەکاشەنە باسش جە ستەموو سوپاو تورکی کەرد و ئاماژەش پانەی کەرد کە دماو ئانەی براکەیش گەشمەرڎە مکەرا تەرمەکەیش چنی ۋێشا بەرا و سوپایچ هەتا سەرسەعب دلۍ دەگاکېنە بێنۍ و ستەم جە خەڵکوو دەگاکۍ کەرێنۍ و واتش: "ئێمە مەزانمۍ چێش بکەرمۍ. تاکەی ئی ستەمیە مۋینمۍ؟ ئیتر ئی ستەمیەە قبوڵ مەکەرمۍ. ئی دەوڵەتە چەوەتەی هەن کۆمکوژێما مکەرۆ. تاکەی ئی ستەمە بەردەوام بۆ؟"
جە ۋەرا ۋەروو ئی ستەمەینە ئیتر بێدەنگۍ مەبیمۍ
زینەت یەڵدرمە ئەڎاو گەشمەرڎە محمەدی ئاماژەش پانەی کەرد کە پێویسا ئیتر هیچ کەسۍ ۋەرا ۋەر پی ستەمیە بێدەنگ نەبۆ و واتش: "دماو ئانەی کوڕەکەم ئاما دلۍ دەگاکۍ دماو دووۍ سەعاتا سوپا یاوا دلۍ دەگاکۍ. ئاگاڎارۍ ئامای کوڕەکەیم نەبێنمۍ، ئایە دەوڵەت چنی پینەیش زانا؟ با حەقوو کوڕەکەیم هۊرگێرمېوە. جەرگم سۊت، ئیتر حەرچێوۍ واچوو زیاڎەن. با حیج وەختۍ دەوڵەت پنەما نەواچۆ 'واڵە و برایا کوردیما' واڵەو برۍ شمە نیەنمۍ. جە وەختێنە کوشدێما برایەتی چێشا؟ مەزانوو فریاو جەرگی سۊتەیم گنوو، فریاو ژەنۍ و زاوڵەکا کوڕی گەشمەرڎە کریایم گنوو؟ ئی دەوڵەتە چە ستەم و زۆرداریما ۋەرا ۋەر مکەرۆ و پارچەما مکەرۆ؟
