پارتوو چەپی سەوزی، کە جۊلەمێرگنە پەشتگیرۍ فرێش هەنۍ، گەرەکشا چا شارەنە یەرۍ کورسیۍ پەرلەمانی بەدەس بارۊ. جە مەنتێقەو شەمزینانی کە مدرامان، سروشت و تاریخوو کوردسانی دلێشنە ڕەنگەش دێنۊ، هامحدوودا چەنی وەرکەوت و پانیشتوو کوردسانی.

یونس ئوزکویونجو هامسەرۊکوو پارتی دیموکراتوو گەلا (هەدەپە)ی شەمزینانە ئەرەیاوناش، ورچنیایەکاو ١٤و ئایاری ورچنیەی دماینێنۍ و واتش، " پێویسا گرڎ کەسێوە بەویژدانۊ جووڵیۊوە و دمایی پی زوڵموزۊرییە بارۊ. گەلوو کوردی جوابێوە بەقووەت جە ١٤و ئایارینە مڎۊوە. دەسەڵات دەنگداننە شکس مارۊ. جە ڕاو پارتوو چەپی سەوزیوە ١٠٠ کورسیۍ پەرلەمانی  بەدەس مارمۍ."

ئەگەر دەس وزمۍ دلۍ دەسی، حیچ گەمێوە کاریگەری سەروو ئێمەوە مەنیۊرە

ئوزکویونجو ئەرەیاوناش، کە ئادۍ زوۊن شەمزیناننە دەسشا بە هەرمانەو ورچنیەی کەرڎەن و واتش، " هامڕێما گرڎشا بە خەموەریێوە گەورەوە هەرمانە کەرا. ڕاوەبەر و هامڕێما گرڎ بە خەموەرییوە هەرمانە کەرا. جە گرڎ گەڕەکێوەنە خەریکێنۍ، گەلەکەما گەرەکشا دماو ورچنیەی ٢٠٢٣ هەناسێوە بڎۊ. جە لایەنی ئابووری هەم سیاسیوە گەرەکشا ئارام بۊوە. جە ١٤و ئایارینە دیکتاتۊری ور شانمێوە و فرتوفێڵی دلێنە بەرمۍ. پێویسا گەلەکەما بزانۊ کە ئێمە گەمەکا تێکۍ مڎەیمۍ، تا ئاخر چەنی گەلوو وێما مەنمێوە. دماو ئانەی دەسما وست دلۍ دەسوو یۊترینی، حیچ گەمێوە مەتاوۊ کاریگەریما سەرۊ بنیۊرە. ئێمە یەک چێوما جە گەلەکەیما گەرەکا ، ئانەن کە جە ١٤و ئایارینە داراو دەنگەکاو وێما با، تا دەنگوو وێما پەی ئاشتی و ئازاڎی بەکار بارمۍ."

س.ز