دەوڵەتی ئەرەگیروو تورکی نزیکوو سەیدسادەقوو پارێزگاو سلێمانیینە سەیارێوەش کەرد ئامانج، دلێشنە دوێ ڕۆنامەنویسە ژەنێ چەتری گوڵستان تارا و هێرۆ بەهادینە گەشمەردێ بیێ.  

پارێزگاروو سلێمانیی، هەڤاڵ ئەبوبەکر ئەرەیاوناێوەنە هجوومەکەش شەرمەزار کەرد و واتش: "بەتندی سەرکۆنەو هجوومە بەردەوامە سەروازییەکا پەی سەروو هەرێموو کاوردسانی و سنورو پاریزگاکەیما و پەی سەروو گیان و یانەو هاموەڵاتا مکەروو."

هەرپاسە هەڤاڵ ئەبوبەکر ماچۆ: "دروودێ پەی ڕۆحوو ڕۆنامەوانا خاتوو هێرۆ بەهادینە و خاتوو گوڵستان تارێ مکیانمێ و هومێدوو خاسبییەیۆ پەی بریندارەکا موازمێ، کە ئارۆ بیێ قوربانی".

 پارێزگاروو سلێمانیی ئاخرۆ ماچۆ: "جەنگ و پەلاماردای و چارەسەری سەروازی قۆرتەکا چارێ نمەکەرا و دۆخەکەی خراپتەر مکەرا، داوا وەنەو گرد لایێوە مکەرمێ بگێڵانێوە پەی سەروو ڕاو واتەواچی و یاواینەیە جە یۆی و ڕاڕەوی هەقەتینوو ئاشتی، دمایی پی دۆخە ناهەموارەیە بارمێ، کە مەنتێقەکەش وستەن سەروو سکێ کەوتەی و ناسەقامگیریێوە تەرسئاوەریوە".