عومەر فاروق هولاکو پەڕلەمانتارو بازنەو چەولیکو دەم پارتی باسش چانەیەکەرد بە وەرنەڎای زینانیا نەوەشی قورسی هرووژم ۋەرا ۋەرو مافو ژیواینە ئەنجام مڎریۆ، واتش سیستەمو جابەجێکەردەو سزادای پەنەوازیش بە فاڕییای هەن.

عومەر فاروق هولاکو پەڕلەمانتارو چەولیکو دەم پارتی پەی ئاژانسیما قسێش کەردێ و دەسنیشانشکەرد سزای هەتاهەتاییە تورکیانە جیا جە سزێوە یاسایی، کریان بە ئامرازو فشاری و سەرکوتکەردەی هیواو ئازادی زینان کریایا. هولاکو ئاماژەش پانەیچدا پاشێلکەردەو 'مافو هیوای' پێسەو مەردەی تەمامەتی سەرو زینانیا نیشانە مڎریۆ، سزاکۍ دژو ماف و شکۆو مرۆڤایەتین و واتش: "بە تایبەتی گۆشەگیری ڕەهاو سەرو ئێژا ئۆجالانی هەڵوێسو سیستەمو سزێ جە تورکیانە جە ۋەرا ۋەرو زینانیا سیاسینە نیشانە مڎۆ. نەک تەنیا پێسەو مافێوە کەسی جە هەمانکاتەنە پەی چەسپنای دادپەروەری و ئاشتی کۆمەڵایەتی 'مافو هیوا'ی پەنەوازیا. جابەجێکەردەو ئی مافەیە سەر ڕاسکەردەیۆ گونجیان بە پاو پیمەرە گەردونییەکا یاسا و مافەکا مرۆڤی."

جە بەردەوامی قسەکاشەنە هولاکو سەرنجش وست سەرو پاشێلکەردەو مافو هیوای جە زینانەکا تورکیاینە و دەسنیشانشکەرد کە وەرنەڎای ئا زینانیا کە نەوەشی قورسشا هەن، پاشێلکەردەیۍ جدی مافە بنەڕەتییەکا مرۆڤین و بە ماناو سەپنای مەردەی جەسەیی و دەرونی مێنە. ڕۆشنیچشکەردۆ وەرنەڎای سزادریایا نەوەشی بەرش وزۆ کە سیستەمو جابەجێکەردەی سزێ پنەوازیش بە فاڕییای خێرای هەن سەرو بنەماو مافەکا مرۆڤی.

جە دما دماینە هولاکو جەختش چانەی کەرڎۆ کە پەی پارێزناو مافە بنەڕەتییەکا زینانیا دەمودەس ئی چن هەنگامۍ بنیریا:

*ئەرەمەزیای کۆمسیۆنو تەندروسی سەربەخۆ پەی مسۆگەرکەردەی  تەندروسی گیریایا و زینانیە نەوەشەکا ڕاسەوخۆ وەرۍ بڎریا.

*ئاژەو زینانیەکا خاس بکریۆنە، بە تایبەتی دمایی بە گۆشەگیری بارانە.

*جە سیستەمو جابەجێکەردەو سزادای پیمەرە میاننەتەوەییەکا مافەکا مرۆڤی جابەجێ بکریا.

*کۆنترۆڵکەردەی ئاژەو زینانیا جە لایەنو کۆمسیۆنە سەربەخۆکاوە.