"ئەرشەد ساڵحی" پەرلەمانتاروو بەرەو تورکمانی جە پەرلەمانوو عێراقینە، کە وەرپەرسی وەڵینوو بەرەو تورکمانی بۍ و پاسە نامێش لوێبۍ، کە سەر بە دەزگاو هەواڵگێریی تورکیا (میت)ین، بەرڎەوامیچ حەوڵێش دێنۍ کە ئاژاوەگێڵنی بەینوو پێکئامایەکاو شارەکەینە وەش کەرۊ، یاگۍ باسین ١٥و ئی مانگۍ لە گێرتێوە ڤیدیۊیینە جە پەڕەی تایبەتی وێشنە وەڵاش کەرڎەبێوە، چند تۊمەتێوەش وستۍ پاڵوو گەڕەکەو "پەنجا عەلی" جە کەرکووکنە کە گەڕەکێوە کوردنشینەنە و واتش، "ئا گەڕەکۍ بیێنە ناوەندوو ماددەی هۊشەبەری و کوشتەی و تیرۊری".

ئۍ قسۍ ئا پیا نزیکەی جە تورکیا و دەزگا هەواڵگێرییەکەیش، حەر زوو کارارڎایۊش وەنە کەوتۊ و جە جادەی کورڎینە، بە ئاڕاستەکەرڎەی بوختانۍ و تۊمەتۍ ناڕەۍ و تێکدای ئارامی و ئاشتیی کۊمەڵایەتی و پێکەوەژیوای بەینوو پێکئامایەکاو شارەکەی، نامەبریا تۊمەتبار کریا.

وێرەگاو هیزی یەرەشەممە، جە بازاڕوو گەڕەکەو پەنجا عەلیی شاروو کەرکووکینە، بە مەبەسوو یاونای پەیاموو ئاشتی، تەبایی و پێوەرەژیوای، بە دروشموو (خەباتما هونەرا و ئامانجما پێوەرەژیواین) چالاکیێوە هونەری ڕێک وزیا، پەی جوابوو حەوڵە ئاژاوەگێڵنییەکاو تورکیای و بەکرێگیریایەکاشا جە کەرکووکنە.

چالاکییەکە بە بەشداریی حەر یۊ جە گرووپوو موسێقاو مێزۊپۊتامیای، تیپوو هونەری میللیی کەرکووکی و گرووپوو شانۊو هاواری لوا ڕاوە، پەی پەشتیوانیی گەڕەکەو پەنجا عەلی و جەختکەرڎەیۊ سەروو پێوەرەژیوای شارەکەنە، چالاکییەکە بەرهەموو مۊسیقای، ورپڕای، شانۊ و شیعرێش چەنەبێنۍ.

سەبارەت بە چالاکییە هونەرییەکەی، هاوار فارس-ە، کناچە شانۊکارەو گرووپوو شانۊو هاواری، بە ئاژانسوو هەواڵوو فورات (ANF)یش وات: "ئارۊ ئێمە پێسە گرووپوو شانۊو هاواری، گرووپوو موسێقاو مێزۊپۊتامیای و تیپوو هونەری میللیی کەرکووکی ئی چالاکییەما کەرد، کە پێک ئامابۍ جە (شانۊی، ورپڕای، مۊسیقای و گۊرانییا)، ئێمە جە ڕاو ئی چالاکییاوە گەرەکمانە جوابوو ئا نەیارا دەیمێوە، کە ماوەی ویەردنە پەنجۍ تۊمەتیشا پەی خەڵکوو گەڕەکێوە کوردنشینەو شاروو کەرکووکی درێژە کەرڎە، ئێمەیچ جە ڕاو هونەریوە جوابوو ئا نەیاراما داوە، چونکوم جە ڕاو هونەریوە متاومۍ جوانتەرین پەیام بکیانمۍ بە دروشموو (خەباتما هونەرا و ئامانجما پێوەرەژیواین) ".

ئینجا لاو وێشۊ، مامۊسا "حەسیبە عەبدوڵڵا" وەرپرسەو بۊردوو پێکئامایەکا جە ئەنجوومەنوو سەرکرڎایەتیی "یەنەکە"ینە بە ئاژانسوو هەواڵوو فورات (ANF)یش وات: "چند ڕوۍ  چێوەڵتەر دیما، کە کەسانۍ سیاسیۍ  کەرکووکنە بە مەبەسوو تێکدای ئارامی و ئاژاوەنیایۊ و شێویای پێسە هەرمانەو گرڎجارێشا، بڕۍ نامۍ ناقابلێشا نیۍ گەڕەکەو پەنجا عەلی-یوە، کە ئی گەڕەکۍ گەڕەکێوە ئارامە و سەرەبەرزەنە و جادەکاشنە نمایشی هونەری کریۊ، ئی چالاکییە هونەرییە خاستەرین جوابا پەی ئا کەسا، کە حەوڵۍ تێکدای پێوەرەژیوای مڎا کەرکووکنە، ئێمە چێوە گرڎ لایۍ دڵنیا کەرمێوە، کە بە حیچ کەسێوە ئی ئاشتی و ئارامی و پێوەرەژیوایە تێک مەشۊ".

س.ز