هێزه‌كۍ سه‌ر به ده‌وڵه‌تو ئێرانی ژەنه چالاكوانێوەشا گېرتە
له‌یلا زیافه‌رە، ژەنه چالاكوانە و میدیاكارەی ئێرانیە، بەمەڵامەتو ۋەڵاکەرڎەیۊ تویتێوە سەرو حیجابی زۆره‌ملۍ، جە لایەنو هێزه‌كا سه‌ر به ده‌وڵه‌تو ئێرانیۊ گیریا.
دماو ئانەی له‌یلا زیافه‌رە، ژەنه چالاكە و میدیاكارەی ئێرانیە، تویتێۋەش جە بارەو حیجابی زۆره‌ملېۋە ۋەڵاکەرڎۊ، ڕۊو چوارشه‌ممه‌ی ١٩و ته‌مووزی، جە لایەنو هێزه‌كا سه‌ر به ده‌وڵه‌تو ئێرانی جە یانەو واڵەکېشەنە جە شارو تارانی گیریا.
به پاو سه‌رچەمەکا هه‌واڵی، دماتەر ئا هێزۍ یانەکەشا وشکنان و ده‌سشا گېرتەن سەرو كه‌لوپه‌له‌كاشو مۊبایلەکەیشەرە.
له‌یلا زیافه‌رە جە تویته‌كه‌شەنە نۋیستەنش: "مەحاڵا ئا ڕۍ گېرتېنەما ۋەر چنەش پەشیمانۍ بیمۍ. ئێمه پەی ناستەی حیجابی زۆره‌ملۍ گەشمەرڎېما دېنۍ. ڕا مەڎەیمۍ ۋنەو گەشمەرڎەکاما به زایە بلۊ".
یاگۍ باسیا، دماو ئانەی ڕۊو ١٦و ئه‌یلولو ٢٠٢٢، کناچېۋە گه‌نجەی كورڎە به‌نامۍ "ژینا ئه‌مینی"ۍ جە ئاکامو ئه‌شكه‌نجه‌و پۆلیسی ئه‌خلاقی تارانی و به بەهانۍ وەرچەم نەگېرتەی پیمەرەکا ده‌سه‌ڵاتی پۍ حیجابی زۆره‌ملۍ گیانش بەخشا، گەشمەرڎە بیەیش بی بە چه‌خماخه‌و سه‌رهۊردای و مدرامانی جە ۋەرکەوتوو کورڎسانی و ئێرانینە، كه به سەرمەشقی ژەنا و به دروشمەو "ژەنۍ، ژیای، ئازاڎیی" به چالاكی جۊر بە جۊر تا ئیسەیچ ۋه‌رده‌واما.
جە ۋەران ۋەرەنە ده‌وڵه‌تو ئێرانی حۊڵ مڎۊ به گېرتەی، زینڎانی کەرڎەی، كوشتەی و جە قەنارەدای و ته‌نانه‌ڎ ژه‌عراوی کەرڎەی کناچە ۋەنەرەکا، ئا سه‌رهوردای و مدرامانیە سه‌ركوت کەرۊ.
هـ . ش
