٩ ساڵۍ سەروو کۊکوشیی ٣ ئابوو ٢٠١٤ شەنگالیرە لوان، کە دلێشەنە هەزار ئێزدیۍ لاو چەتەکاو داعشیوە جینۊسایدۍ کریۍ و هەزارای تەریچ کە فرێشا ژەنی و زارۊڵۍ بێنۍ بوون ئڕفانیۍ و سەدان هەزار ئێزدیێچ ئاوارۍ بیۍ. سەرباروو ئانەیە چندین ڕێکوزیۍ و وەڵاتۍ ئا کۊکوشییەشا بە جینۊساید ئشناسان، وەلۍ تا ئیساتێچ حوکمەتوو عێراقی ئا بابەتەشە پەی یەک ڕۊیچ نەوستەن بەرنامەو هەرمانەو پەرلەمانیوە.

  مشۊم حوکمەتوو عێراقی کۊکوشییەکەی پێسە جینۊسایدی بشناسنۊ

ئەنداموو ڕاوەبەریی شارەوانیی گلێرگەو زۊراڤای دڵشاد برۊ واتش: "گلێرگەکەما جە نانی و ئاوۍ زیادتەر پێویسش بە یۊگێرتەیین. تا ئیساتۍ حوکمەتوو عێراقی کۊکوشیی ئێزدییەکاش پێسە جینۊسایدی بەڕسمی نەشناسان، یانۍ چە هومێدێوەما پەنەش بۊ. ئێمەیچ هاموەڵاتۍ ئێگەینمۍ، ڕەنگا ئاینمان جیاواز بۊ، ئەگەر ددان بە بییەی و شناسنامەو ئێمەرە مەنییا، ئێمەیچ ئادیشا بە هیچ مەنیەیمێرە".

پەدەکە ڕاگێرا وەرڎەموو وێڕاوەبەریی شەنگالینە

دڵشاد برۊ ئانەیجس وست ڕووە، کە پەدەکە پەی ڕاگێری جە ئەرەمەرزنای وێڕاوەبەریی شەنگالی فرتوفێڵۍ فرۍ بەکار مارۊ، بە ئاماژەدای بە ڕاگێرییەکاو پەدەکەی جە گێڵایۊ ئاوارەکانە داواش کەرڎە، ئا ئاوارۍ جە کەمپەکاو باشووروو کوردستانینە هەنۍ گۊش پەی دروەکاو پەدەکەی نەگێرا و ئانەش یاد وستۊ، کە پەدەکە وەختوو کۊکوشیییەکەینە بە چە نۊعێوە ئێزدییەکێش بۍ پارێزنای و وەرگێری وەرڎەموو چەتەکاو داعشینە جیا ئاستۍ.

'ئێمە ئارۊنە فرە قەوەتتەرێنمێ'

برۊ باسیچش کەرد، 'ئارۊ جە ڕووەو سەروازی و هەمیچ ڕووەو ڕێکوستەی و ڕاوەبەرڎەیۊ فرە قەوەتێنۍ و پێویسشا بە کەسی نییا. هێزوو سەروازی یەبەشە، یەژەشە و ئاسایشوو ئێزیدخانی پارێزناشا و شەوێنە بەئاسوودەیی مووسا. با ئیتر کەس نەواچۊ گلێرگەی ئێزدی بێپەشتوپەنان، ئارۊنە فرە قەوەتێنۍ. 

'ئێمە جە ڕاو هێزوو وێماوە سەرۍ گنمێ'

وەرپەرسوو شارەوانیی گلێرگەو دهۊلای عیدۊ ڕەشۊ باسش کەرد، ئەگەر ئارۊنە حوکمەتوو عێراقی مەتاوۊ چەتەکاو داعشی دادگایی کەرۊ، ئانە بە ماناو ئانەیە مۍ کە هامکارشانە، ٩ ساڵۍ ملوو کۊکوشیی شەنگالیرە ویەرڎەن، حوکمەتوو عێراقی هیچ هەنگامێوەش پەی ئا شارەیە نەنیێنە. وستیچش ڕووە: "فرە وەڵاتۍ و ڕێکوزیۍ جیهانیۍ ئەمرەو شەنگالیشا پێسە 'جینۊساید'ی ئشناسێنە و هامکاریی ئێزدییەکاشا کەرڎەن. وەروو ئانەیە ئێزدییەکۍ بتاوا سەرجەنۊ ماواو وێشا ئاوەدان کەراوە، هامکاریێوە فرەی ئابوورییشا پێشکەش کریان، وەلۍ پەدەکە و دەسەڵاتوو پانیشتی وارڎەنشا و ناستەنشا بیاوۊ دەسوو ئێزدییەکا".

جە دمایینە ڕەشۊ واتش، کە شەنگال بییەی ئێزدییەکان پێسە بەرڎەوام بۍ، "شەنگال مەنەی و نەمەنەین. گەر شەنگال نەبۊ ئێمەیچ مەبیمۍ. گەورەکێما واچێنۍ شەنگال شاموو ئێزدییەکان" ئێمەیچ بە پاو ئانەیە وێگێری و وەرگێری کەرمی. بە بۍ ئانەیە پەشتی بە هیچ هێزێوە بەسمۍ ئێمە جە ڕاو هێزەکاماوە سەرۍ گنمێ".

س.ز